مصر م الأخر...

مصر م الأخر ده الكتاب اللى المفروض انا كنت بعمله والهدف منه نقل لقطه ساخره من غلبنا وحياتنا للناس اللى جاية بعدنا يديك ويدينى طولة العمر بأه... بس من ساعة ما كتبت عنه فى المدونة وانا معمولى عمل ومش عارف اكتب حاجه فيه خالص وزهأت انا أصلا من موضوع الكتاب ده فقررت نخليها تدوينات وخلاص وبعدين نبقى نجمعها بعدين بأه براحتنا... فيارب تستحملونى ويعجبكم الكلام... ونقول بسم الله

-------------------------------------------------------------------------------

كلمتين تسليك...

أخى الشاب المصرى الذى يعيش فى سنة 3010 بعد التحيه والتقدير،،،،،

يسعدنى ويزأططنى جدا أن أكتب لك هذه النصايح الغالية -اه والنبى الغالية وبكره تصدقنى- والتى ستكون بمثابة كبسولات لفهم طبيعة الدنيا التى كنا نعيش فيها وذلك من خلال اللى احنا شايفينوه وطالع على جتتنا فى الايام اللى مش عارفينلها شكل دى... وعشان مايطلعش على جتتككم انتوا كمان وتاخدوها من أصيرها وماتعملوش زينا وتفضلوا تأاوحوا وتوهموا فى نفسكم وف الأخر تتصدموا وتطلعوا بنفس النتيجه زى ما احنا طلعنا... ولكن دعنى أولا أن أعرفك بنفسى فأنا شاب مصرى فى مثل سنك فى الخامسه والعشرين من عمرى وأعيش الأن فى سنة 2010 أى يفصل بينى وبينك تقريبا قرن من الزمان... ترددت على مسامعنا هذه الأيام أنه ربما تنتهى حضاراتنا بنهاية 2012 لذلك قررت أن أنور بصيرتك وأطلعك على العالم الذى كنا نعيش فيه تحسبا لأى عملية نصب ممكن تتعمل عليك زى ما إتعمل معانا فى كتب التاريخ بتاعة المدارس... فنحن للاسف عزيزى الشاب مكسنا ربيع عمرنا نتعلم فى مدارس الحكومه وتمت برمجتنا على حقائق تاريخيه وعلميه ورياضيه ودينيه ولكنه عندما تم الزج بنا فى طاحونة الحياه إكتشفنا حقائق مؤلمه... فإن ما درسناه لم يكن مفيدا الا فى الضحك والسخسخه لدرجة وجع البطن لما تفتكر أد ايه كان بيضحك عليك وان المستفيد الحقيقى من كتب الوزاره لم يكن الا بتاع الطعميه -أكله مصريه ميه فى الميه عباره عن حاجات كتير أوى معجونه فى بعضها وبتتقلى فى زيت الذى يشترط فيه أن يكون اسودا وبيعمل تش وأعتقد أنها موجوده عندكم الأن الا إذا كنتوا نضفتوا شوية- فلم يكن التاريخ الذى درسناه ماهو الا أرقام معقده فى مسأله رياضيه يتعين عليك أولا فهم أبايتها الشعريه ركنا ركنا حتى يتسنى لك المقدرة على وزن تلك المعادلة الكيمائيه لإثبات أنها نظريه فيزيائيه لم يتم التوصل اليها بعد... وأنا أتفهم تماما أنك تقول ما هذه الكلمات المعقده فى السطرين السابقين ولكن هذا ما أريده بالضبط فما حدث معك الأن فى أنك لم تفهم شيئا هو ما حدث معنا طيلة فترات دراستنا التى للأسف كانت فى زهور عمرنا...

أطلعك على العالم الذى كنا نعيش فيه لكى لا تظن بنا ظن سيئ باننا كنا خرونجات وكنا موافقين على اللى بيحصلنا وكنا واقفين نتفرج وخلاص... ولكى تدرك تماما اننا كنا عاملين زى الاقفاص ومغلوب على امرنا ولا بيدنا اى حاجه... سأحكى لك عن شكلنا وازاى كانت طعم الحياة عندنا... سأحكى لك عن دمعنا وازاى كانت القهقهه جوه قلبنا... سأحكى لك عن ضغطنا وازاى كان السكر يلتهم صحتنا... سأحكى لك عن أكلنا وازاى كانت الطماطم غالية عندنا... سأحكى لك من التعليم للــ البطاله ومن الطيبة للــ البلطجة ومن التعاون للــ الندالة ومن برانا للــ جوانا ومن النزاهه للــ السرقة ومن الوطنية للــ الوطينة ومن السواقين للــ التباعين ومن المنطق للــ الاستهبال ومن البوكسرات للــ التسقيط ومن البديهات للــ الميكاب... سأحكى لك عن الشباب السيس والبنات البيس... سأحكى لك عن الفرانكو والفيس بوك والتاتو... سأحكى لك عن شيوخ الفضائيات وهوانم لا حياء فى العلم... سأحكى لك عن انتصاراتنا ووكساتنا... سأفرق لك بين أخلاق العوالم وأخلاق البرامج الرياضية... سأفرق لك بين الفتنة وبين التوك شو... سأفرق لك بين النفاق وبين مرشحين مجلس الشعب... سأفرق لك بين الاحباط وبين هيفاء وهبى... سأفرق لك بين التفوق العلمى وبين الفنان ولاعب الكوره... سأفرق لك بين امبارح والنهارده وبكرانا...

سأقدم لك ياصديقى حياتنا زى ماعشناها مش زى ما هايكتبو عنها... سأشهدك ياصديقى على أمانينا الدفينة وأحلامنا المغتالة... سأرسل لك ياصديقى رسايلى عبر الزمن وامرى لله بس على الله تعرف تقراها بقى... فأرجو من الله ان تستمتع بتلك النصايح وتدعيلى بالرحمة -اذا طمر فيك يعنى- ولو نسيت أقولك على حاجه ماتدعيش عليا... وبينا يلا نتوكل على الله...

وانتظروا النوت الجاى بأه...