* تدوينات مميـزة *

الأميرة والدغف...

منذ فترة ليست بالقليلة وأنا أتابع كتابات الجنس الناعم المنتشرة على صفحات الإنترنت أو على صفحات البلوجر (الله يستره)... ومن أكثر الأشياء المعروفة هو أن معظم كتابتهن تتمحور حول الحب والحبيب والمشاعر والأحاسيس ،، وذلك يبدو أمراً طبيعيا جدا ،، اذ أنهن منذ طفولتهن وهن يحلمن ويتمنين ذلك الفارس ذو الحصان الأبيض الذى يأتى من بعيد ليخطفها ويذهب بها بعيدا الى الجنة التى رسمتها دائما فى أحلامها...

Read More
* تدوينات مميـزة *

صدفة قابلتك...

قررت هذه المره أن أفعل مثل ما تفعل الناس المتهنيه وأحجز فى أحد القطارات المكيفه للرجوع الى المنصورة وذلك كبداية للتمرد على حبيبى وعشرة عمرى الميكروباص... وفى الطريق الى القطار غصت الى ذهنى أفكر فى ذلك البرستيج الذى يتعامل به أهل ذلك القطار المكيف عادة... إذ أنهم لا يأخذون المحطة جرى من أولها لأخرها عشان يلحق القطار كما كنا نفعل...

Read More
* تدوينات مميـزة *

مِتـقَـدّمْـلى عروسة...

بينما أنا أدخل من باب بيتنا فعلمتُ بوجود غرباء عندنا فى غرفة الضيوف.. فدخلتُ إلى غرفتى متجاهلاً إياهم فلحقتنى أمى عند باب غرفتى قائلة »عارف مين جوه«... فهززت رأسى نافياً... فقالت لى »مدام أميرة وبنتها سارة«... فانتهبت إلى ذكر كلمة بنتها سارة وقلتُ لها »ما سألوش عليا..؟؟«... فقالت »لأ ،، سألو عليك.. انته تعرف أصلاً هما جايين ليه..؟؟«... فقولت »ليه..؟؟«...

Read More
* تدوينات مميـزة *

فى إنتظار اللـى ما يتسمى...

اكتر كلمه تلاقيها على لسان الشعب المصرى كلمة "يالله على ما تفرج" وهى كلمة تعنى انتظار الفرج وربما ياتى وربما لن ياتى ابدا ولكن اهو احنا مستنيين... ويعرف فى التاريخ ان المراه هى من تحترف الانتظار وخاصة المراه الصحراويه... اذ انها اعتادت ان تنتظر الاب او الاخ او الحبيب الذى يرحل عنها لغرض ما كتجاره اوحرب او صيد او غير ذلك واحترفته لانها كانت تستطيع النظر الى السحب فى السماء وتدرك قدوم الحبيب او عدم قدومه...

Read More
* تدوينات مميـزة *

حاجه تجنن...

دقة عقارب.. عدت دقايق.. واتسرقت ساعات... أنا كنت حابب.. اقولك حقايق.. وشوية حاجات... لما جيت اضحك.. عينيا دمعت.. وخطفنى السكات... ولما جربت ابكى.. عينيا رفضت.. تهدينى الدمعات.. حاجه تجنن!!! لا عارف ابتسم.. ولا راضيه ترتسم.. على شكلى الابتسامات... وكل ما افتكر.. احاول اتسطل.. وتضرب معايا اتجاهات...

Read More
* تدوينات مميـزة *

أغنية على ممر التحرير...

أما من هم؟؟ فهم مفجرى الثورة... شباب 25 يناير... العيال السيس... السيكى ميكى... بتوع كنتاكى... العيال الأجندات... العملاء... اللى عطلوا مصالحنا... اللى خربو بيوتنا... أما أنا فأسميتهم بناة المجد... رموز التحضر... فرسان التحرير... سفراء حرية الرأى... فدائى الجيل الحالى... قناصى الكرامة المهدرة... كوماندوز الحرية... نعم بالضبط هم كوماندوز ويعلقون رتبهم على أجسادهم...

Read More
* تدوينات مميـزة *

ما بين الهاءات والأقواس...

إنه لغريب حقا ذلك المدعو بالشاتنج... فهو يفعل ما لايستطيع الكلام أن يفعله أبدا ،، يجعلك تتواصل مع أشخاص لم تعرفه أبدا وربما لن تقابلهم يوما ما... يجعلك تٌكن لتلك الغرباء محبة ومودة ومشاعر خاصة... فالقارىء لأى سطور بينك وبين هؤلاء الناس يشعر وكأنكم -أصحاب جدا ومتربين مع بعض-... يستطيع بسحره أن يجعلك تضحك بصوت عالى لمجرد رؤيتك لحرف الهاء مكتوبا بتكرار على هذا النحو [هههههههههههههههه]...

Read More

بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



الجمعة، يوليو 24، 2009

أنا مش عارفنى...


انا مش عارفنى... انا تايه منى... ولا قادر حتى اركز ولا عارف اعمل ايه فى همى... لا دى أحلامى ولا دى حياتى... ولا حتى دا اللى كنت ناوى على عمايله... هو ليه ده بيحصلى... هو ليه الدنيا كده بتلخبطنى... وما بتبطلش تناكفنى...وعلى طول بتيجى عليا... كتير اقول كفايه... ومش هاقبل تكون دى نهايه... بس برجع اخد على دماغى... واقول موافق وماله هو فى احلى من كده بدايه... وأقف مع نفسى وقفه... ولنفسى أحط خطه... واحد اتنين تلاته لحد سبعين خطوه... عملت اول خطوه... وكسلت شويه فى التانيه... وطنشت اعمل التالته... وشكيت فى نفسى فى الرابعه... وقولت اكيد انى غلط غلطه... انا هابدأ من الاول واحط لنفسى كمان خطه... وادينى مقضيها خطط ولا بتقدم حتى زأه...


متحير ومش عارف اخد قرار لنفسى... وقولت اسال الناس وياريتنى اعتمدت على نفسى... واحد يقولى اتوكل على الله وجرب... والتانى يقولى لا اوعى حرام عليك اوعى تجرب... والتالت لا هو مفيش احسن من الاتجاه اليمين... والرابع يقولى لا يعم سيبك من الناس دى واحود شمال وطوالى على طول... يعنى هو مفيش احسن من الكلام... وحياتكم هى مش ناقصه لخبطه... على اساس ايه بتقولى اطلع يمين واحود طوالى... والنبى هى مش طالبه فهلوه... ويقولك دا انا احلهالك بصباع رجلى الصغير... دا انا امشيهالك وانا قاعد بالشورت بتاعى القصير... على طول كده هانفضل نتفلسف... ونعمل فيها ورك نمله... وننصح الفين نصيحه... ونقدم سبعين مشورة... من غير خبره ولا حتى حكمه... ما يروح يعم فى الف غرقه...ماهو اكيد هايجرب وهايتعلم...


طب ما بدام كده انا بسألك من الاول ليه... وواجع دماغى معاك ليه... طب من الاول قولى انا مش عارف حاجه... اتوكل على الله وصلى استخاره... واسأل ربنا المشوره... وجرب مره والتانيه والتالته وان شاء الله ربك هايبعتلك الهدايه... للى فيه مصلحتك وكمان هايكتبلك البركه... واتوكل عليه ومن يتوكل على الله فهو حسبه... وسيبنى بأه اخد قرارى بنفسى... ماتلخبطنيش بأه وماتخوفنيش وماتنكدش عليا عيشتى...


عمرى ما عرفت اخد قرار لنفسى... ولا حتى اتعملت اخد القرار ازاى... وكل ما اخد قرار امسك ورقه وقلم... واقعد احسبلها من كل الاتجاهات... واقول لو الناحيه دى هاتمشى ازاى.... ولو الناحيه دى هاتمشى ازاى... واتأكد من كل حساباتى... واختار الاتجاه الاتى... اللى كل الحسابات ماشيه معاه... واقول يالله هى ورزقها...وان شاء الله مش هاندم... ومايعديش شهر والاقى نفسى ساقط حساب...وبدأت اقع فى بئر الندم... والاقى الناس اللى كانت بتقول شمال... بتقول انته ليه يعم ما روحتش يمين... انته مشكلتك انك اتنطت على اليمين... مع انها كانت حلوه وفرصه ما تتعوضش... الله اما انته يعم قولت روح شمال... اه ما انا والله لقيتك عايز تروح شمال... فقولت كلامى مش هيأثر معاك وعشان كده قولتلك روح شمال... وعشان كده اتعملت لو اتقالى روح يمين هاروح على طول شمال... وكبارنا قالوا زمان... شور الست واعمل العكس وانته ديما تبققى فى امان...


وهى دى المشكله لا انا عارف اخد قرار لنفسى... ولا حد عارف ينصحنى... وكل يوم ليلاتى... افكر فى اللى اتى... واقول يامين ينجدنى... يارب يامجيرنى اهدينى وساعدنى... وصبرنى على ايامى... وابعتلى حل لحيرتى... اوعلمنى ازاى اخد باسبابى... واقدر اواجه مشاكلى... ولااحتاج ابدا ابدا ابدا لحد يلخبطنى... يارب امين

الاثنين، يوليو 06، 2009

إنتحار فيروس (2)...


قعدت أفكر أحلها إزاى دى... لحد ما عينى وقعت على اتوبيس مترشأ ناس روحت جاى ناطط فيه... يعنى قولت اعوض الايام اللى فاتت اللى الواحد ضيعها مع الموزز... واطلعلى بلكشة اصابات مره وحده... ولقيتلك الناس دى حالها يصعب على الفيروس بتاع الطيور... وعرق ونتانه وريحه تقرف دا انا كنت هاتخنق من البخور اللى فى الجو والبهدله دى وما عرفتش اعمل ولا حاله... واتسدت نفسى عن الشغل وخدت ديلى فى اسنانى وشبط مع اول واحد نازل من البرميل ده قصدى الاتوبيس ده... وقولت بأه زى ماتيجى هى ونصيبها وطلع الواحد ده رايح يركب المترو...


ونزل السلم والدنيا بدأت تدى على نضيف كل ما تنزل تحت شويه... والى حد ما فيه نظام موجود رغم الزحمه قولت أيون كده الواحد يعرف يشتغل واعصابه مرتاحه... والناس كتيره اهى وربنا يسهل ونقدر نعمل سكور... واول ما ركبنا المترو نفشت ريشى كده وفردت سدرى أوى عشان شوفت اتنين خايفين منى وحاطين كمامات على بؤهم... حسيت ان دى بشرة خير... وفضلت بأه اتنقل من واحد لواحد ومن واحده لواحده ومن طفل لطفله... والدنيا هوس ومفيش اى تأثير ولا كأنى بعمل حاجه... ياجماعه ياللى هنا حد يعطس او يعمل أى منظر طيب..! اللى عامل العطسه بتاعته فايبريشن يفتحه... سايق عليكم النبى حد يجبر بخاطرى..؟ مفيش أى همسه ولا حد حاسس ان فى فيروس خنازير فى وسطهم... الناس مسطوله..! هو فى ايه..! ياناس ياهووو..؟ انا هاتجنن ايه الناس المتيسه دى..!


وفى وسط الحيره دى لقيتلك واحد بيقول لصاحبه سمعت عن البتاع بتاع الخنازير ده(خنزيره:أنا أنا على مناخيرك اهو يعم)... دا بيقولك جه مصر وهايلبسوا الناس كلها كمامات(خنزيره:يعنى هو فارقه معاكم)... صاحبه: خنازير مين يعم هى هاتفرق وبدام ملوش دعوه بالفول يبقى مالناش دعوه(خنزيره:صح الكلام)... يجى مصر ما يجيش مالناش فيه... الواحد:فول مين ياعمنا ببقولك انفلونزا يعنى شم يعنى استنشاق.... صاحبه:ماهو برده مش فارقه ياباشا احنا بعون الله الهوا بتاعنا موجود فيه عوادم ورصاص ودخان وثانى اكسيد الكربون وبلاوى سوده وكمان فيه اكسجين اه والنبى موجود بس بيحى خميس وجمعه... يعنى ياباشا من الاخر الفيروس اللى امه داعيه عليه وشايف نفسه يجى يطير عندنا ويورينا نفسه...احنا الفيروس اللى يجى عندنا يبقى واحد مننا(خنزيره:الله يسترك ياأصيل)... ياحبيبى احنا الرئه بتاعتنا مش بتدور الا بالبنزين... جاز وسخ ماشى... تقوم تقولى حتة فيروس هيأثر معانا(خنزيره:ليه كده ما انته كنت حلو)...


خنزيره:و الله يأستاذ وماليك عليا حلفان اول ما سمعت الكلام ده عرفت انا ليه لحد دلوقتى مش مأثر فى الناس دى وماعملتش ولا اصابه فى وسط الناس الغلابه دول... أولا عشان كفايه عليهم اللى مستحملينه دا انا هيست وما عرفتش اشوف شغلى وانا بقالى معاهم كام يوم بس... تانى حاجه احنا معظمنا بيجى مع المسافرين اللى جايين من بره والناس دى اخرها لو سافرت هاتسافر جمصه.... تالت حاجه الناس دى بتاكل فول اللى احسن من ميت تاميفلو... شوفت بأه يابيه حظى..؟ أهو انا دلوفتى حيران اروح لمين واجيب شغل فين..؟ الناس الاغنيا والموزز اللى كنت قاعد عندهم بعملهم الاصابه من هنا وياخدوا تاميفلو من هنا... ويقولك تماثل للشفاء يعنى ولا كأنى عملت حاجه... والناس الغلابه معاهم انتىفيرس ضد التاميفلو جاهز... زهقت من الدنيا يابيه وعشان كده بفكر انتحر ... او بأه لو تعرفلى حد مسافر ليبيا ياخدنى معاه أهو أجرب حظى هناك... يإما أعرض على الطاعون نشتغل مع بعض ونعمل كابل... يإما أعمل هجره غير شرعيه لإيطاليا واهو الواحد يعرف يسلك مع الإيطاليين احسن من اللى مش عارفلهم تركيبه دول...



السبت، يوليو 04، 2009

إنتحار فيروس (1)...


أعلنت وزارة الصحة عن وصول عدد حالات المصابين بأنفلونزا الخنازير الى 70 حاله... حيث ان الحاله رقم 70 لرجل صومالى كان قد قدم الى مصر مؤخرا... ويذكر ان عدد الحالات المصابه محليا لا يتعدى الخمس اصابات... مما يسير الكثير من التساؤل حول انتشار الفيروس بين الاجانب فقط المتواجدين داخل مصر... وفى خلال البحث عن السبب استطاعطت كاميرا مووون بكره من اجراء حوار اكسكلوسيف مع احد الفيروسات النشطه المتواجده داخل مصر... والذى وجد فى حاله ميؤوس منها وقد اقدم على الانتحار...


استاذ خنزيره ممكن نعرف ايه حكايتك و السبب فى اقدامك ع الانتحار... بسم الله الرحمن الرحيم أنا اسمى H1N1 من مواليد احد معامل المختبرات الامريكيه بتاعت شركة جيلاد للأدويه اللى المالك بتاعها رامسفيلد وزير الدفاع الامريكى اللى فات.... وكان السبب حضرتك فى تخليقنا ان الشركه قربت تفلس عشان الازمه الاقتصاديه... فقالوا نعمل فيروس يكون علاجه التاميفلو اللى احنا اصلا معانا حقوق ملكية تصنيعه وبكده الطلب يزيد ونبيع كتير ونطلع من الازمه دى... وخلقونا سعادتك ولمونا فى سرنجه ورمونا فى الصحرا المكسيكيه عشان عندهم خنازير كتير فيعرفوا يلبوسها للخنازير...


ربنا رزقنى حضرتك بطقله عسوله كده أبقى مضيف عندها فقولت اقلب رزقى واشوف نفسى... وسبحان الله ماتعرفش الخير مستنيك فين... أول مااستضافتنى الطفله عرفت انها جايه ايجيبت ام الدنيا يابيه... ماتتخيلش حضرتك انا اتبسط اد ايه..! اصل يااستاذ المصريين دول زى الرز دا 80 مليون اللهم لاحسد... وقلت ان شاء الله الواحد هايشتغل شغل زى القطر وربنا هايفرجها من وسعه... واحنا جايين فى الطياره الطفله بنت الحلال اللى مستضيفانى قعدت جنب واحده مصريه عرفت انها تلميذه فى الجامعه الامريكيه جايه من أمريكا... بس كلام فى سرك يابيه موزه طحن بصراحه عينى طلعت عليها... وقولت لنفسى بلا طفله عسوله بلا بتاع هو فيه احسن من الموزز قصدى التلميذات بتوع الكليات...


ونقلت الاقامه مع الموزه دى ونزلنا من الطياره... وعشان انا لسه فى فترة حضانه مع الموزه دى وكمان عشان هى موزه جدا عدينا من التست بتاع المطار... والمفاجأه بأه حضرتك ان الموزه طلعت ساكنه فى مدينه جامعيه فى الزمالك... قلبى والله كان هايقف من كتر الفرحه الواحد ماكانشى يحلم بموزه واحده دلوقتى وقعت فى مدينة موزز... وقعدت بأه سعاتك أتنطط من موزه لموزه والدنيا فل وماشيه عسل... بس فجأه فوقت وعرفت انى بضيع وقتى مع الموزز دول وكده مستقبلى مش هاعرف أأمنه... ماهى الموزز دى مش بينزلوا الشارع الا حاجه بسيطه ولو نزلت بتركب العربيه بتاعتها يعنى مفيش اختلاط... والواحد شويه شويه وهايبقى عاطل... فقولت لازم اشوفلى مضيف تانى الانتشار بتاعه اعلى شويه... وفجأه الباب خبط ولقيت دليفرى واقف ع الباب... ربك والحق ماكدبتش خبر وقولت هو ده اللى انا عاوزه... واحد بيفضل يلف طول النهار من بيت لبيت ومن شارع لشارع ونعم الانتشار وكمان ركوبه ببلاش دا معاه موتوسكل...


لزقت معاه وطلعنا اول مشوار وقلت يافتاح ياعليم يارزاق ياكريم يارب سهلها يارب... وخد عندك بأه المشوار اللى بياخد نص ساعه فيها تلات ساعات على ما بيوصل من كتر الاشارات والزحمه اللى الواحد بيتسمر فيها... وطلع الواد الدليفرى يعينى بيتعذب فى الحر ومش بيعمله فى الشفت الا يجى 3 زباين... فقولت تلات زباين مين يعم دا كانت المكسيك ارحم بأه... أنا لازم أشوفلى شغل تانى...

نكمل باه البوست الجاى على ما اخلصه...