* تدوينات مميـزة *

الأميرة والدغف...

منذ فترة ليست بالقليلة وأنا أتابع كتابات الجنس الناعم المنتشرة على صفحات الإنترنت أو على صفحات البلوجر (الله يستره)... ومن أكثر الأشياء المعروفة هو أن معظم كتابتهن تتمحور حول الحب والحبيب والمشاعر والأحاسيس ،، وذلك يبدو أمراً طبيعيا جدا ،، اذ أنهن منذ طفولتهن وهن يحلمن ويتمنين ذلك الفارس ذو الحصان الأبيض الذى يأتى من بعيد ليخطفها ويذهب بها بعيدا الى الجنة التى رسمتها دائما فى أحلامها...

Read More
* تدوينات مميـزة *

صدفة قابلتك...

قررت هذه المره أن أفعل مثل ما تفعل الناس المتهنيه وأحجز فى أحد القطارات المكيفه للرجوع الى المنصورة وذلك كبداية للتمرد على حبيبى وعشرة عمرى الميكروباص... وفى الطريق الى القطار غصت الى ذهنى أفكر فى ذلك البرستيج الذى يتعامل به أهل ذلك القطار المكيف عادة... إذ أنهم لا يأخذون المحطة جرى من أولها لأخرها عشان يلحق القطار كما كنا نفعل...

Read More
* تدوينات مميـزة *

مِتـقَـدّمْـلى عروسة...

بينما أنا أدخل من باب بيتنا فعلمتُ بوجود غرباء عندنا فى غرفة الضيوف.. فدخلتُ إلى غرفتى متجاهلاً إياهم فلحقتنى أمى عند باب غرفتى قائلة »عارف مين جوه«... فهززت رأسى نافياً... فقالت لى »مدام أميرة وبنتها سارة«... فانتهبت إلى ذكر كلمة بنتها سارة وقلتُ لها »ما سألوش عليا..؟؟«... فقالت »لأ ،، سألو عليك.. انته تعرف أصلاً هما جايين ليه..؟؟«... فقولت »ليه..؟؟«...

Read More
* تدوينات مميـزة *

فى إنتظار اللـى ما يتسمى...

اكتر كلمه تلاقيها على لسان الشعب المصرى كلمة "يالله على ما تفرج" وهى كلمة تعنى انتظار الفرج وربما ياتى وربما لن ياتى ابدا ولكن اهو احنا مستنيين... ويعرف فى التاريخ ان المراه هى من تحترف الانتظار وخاصة المراه الصحراويه... اذ انها اعتادت ان تنتظر الاب او الاخ او الحبيب الذى يرحل عنها لغرض ما كتجاره اوحرب او صيد او غير ذلك واحترفته لانها كانت تستطيع النظر الى السحب فى السماء وتدرك قدوم الحبيب او عدم قدومه...

Read More
* تدوينات مميـزة *

حاجه تجنن...

دقة عقارب.. عدت دقايق.. واتسرقت ساعات... أنا كنت حابب.. اقولك حقايق.. وشوية حاجات... لما جيت اضحك.. عينيا دمعت.. وخطفنى السكات... ولما جربت ابكى.. عينيا رفضت.. تهدينى الدمعات.. حاجه تجنن!!! لا عارف ابتسم.. ولا راضيه ترتسم.. على شكلى الابتسامات... وكل ما افتكر.. احاول اتسطل.. وتضرب معايا اتجاهات...

Read More
* تدوينات مميـزة *

أغنية على ممر التحرير...

أما من هم؟؟ فهم مفجرى الثورة... شباب 25 يناير... العيال السيس... السيكى ميكى... بتوع كنتاكى... العيال الأجندات... العملاء... اللى عطلوا مصالحنا... اللى خربو بيوتنا... أما أنا فأسميتهم بناة المجد... رموز التحضر... فرسان التحرير... سفراء حرية الرأى... فدائى الجيل الحالى... قناصى الكرامة المهدرة... كوماندوز الحرية... نعم بالضبط هم كوماندوز ويعلقون رتبهم على أجسادهم...

Read More
* تدوينات مميـزة *

ما بين الهاءات والأقواس...

إنه لغريب حقا ذلك المدعو بالشاتنج... فهو يفعل ما لايستطيع الكلام أن يفعله أبدا ،، يجعلك تتواصل مع أشخاص لم تعرفه أبدا وربما لن تقابلهم يوما ما... يجعلك تٌكن لتلك الغرباء محبة ومودة ومشاعر خاصة... فالقارىء لأى سطور بينك وبين هؤلاء الناس يشعر وكأنكم -أصحاب جدا ومتربين مع بعض-... يستطيع بسحره أن يجعلك تضحك بصوت عالى لمجرد رؤيتك لحرف الهاء مكتوبا بتكرار على هذا النحو [هههههههههههههههه]...

Read More

بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



الاثنين، ديسمبر 21، 2009

كالوو كالوو د تضحأ...



كان أحمد بيلعب وبيتنطط من هنا لهنا... ويجرى عليا ويقولى "كالوو كالوو.. بوون " قصده "خالو خالو التليفون "... وياخد منى التليفون ويقول "ألو ألو"... ويجيلى أشَغلة النغمات ويقعد يرقص ويتنطط... وفجأة اكعبل ووقع على دماغة طاخ فى الزهرية اللى فى طريقة... وانطلقت صرخاته وبكاءاته وخدتة وطبطبت عليه لكنى فشلت ف انى اسكته... فما كان منى الا ان اجد شىء الفت انتباهه بها... فقولت " روحى يامنورة هاتى الترنج الجديد بتاع احمد عشان اخده ليا عشان هو مش شطورة وقاعد يعيط ومش راضى يسكت "... وراحت منار جرى تجيب الترنج لكن كلماتى كانت كا الصدمة فى رأس احمد وكأنك هاتاخد منه اغلى شىء يملكه فى حياته...


ونزل جرى ورا منار ونسى بأه الخبطة والألم والصراخ والتليفون... كل ده فى داهية مش مهم المهم الترنج الجديد... ووصلت منار قبله وجابت الترنج وجات عليا... جه احمد وراها جرى وهو بيصرخ وبيعيط بس المره دى مش عشان الخبطة لأ عشان الترنج ممكن يروح منه... وعندما لحق بمنار قرر ان يقاتل بكل مايملك من أجل الترنج... وكانت الطريقه الانسب انه يمسك ايدها ويعضها ويستمر فى العض ويدوس اوى فى العضه الى ان تنازلت له منار عن الترنج... ورأيت الابتسامه على وجه... والفرحة فى عينيه لعودته منتصرا والحق رجع لاصحابة... ولكن سمعت صراخ تانى ولكن المره دى من منار اللى وجعتها العضه اوى... قولتله "أحمد مش هاتصالح اختك"... قال لى ويبدوا على وجهه الزعل "نق" قصده "لأ"... قولتله "ليه هى مش اختك وانته بتحبها"... "أشار برأسه بالإيجاب" فقولت له "خلاص يالله صالحها وبوس دماغها وطبب على ضهرها كده وقولها معلش"... وراح احمد يصالحها


"وعايزك تتصور ان أحمد قصير جدا وف اولى حضانه ومنار فى أولى ابتدائى ولكن طويلة وتدى على رابعه ابتدائى"... يعنى احمد عنده مشكلة دلوقتى هو مش طايل راس اخته... فحاول يطلع ع الكرسى بس برده مش هاسيب الترنج وهايفضل شايله ياعينى... وطلع ع الكرسى وباس دماغها لكن ماطالش ضهرها عشان يطبط عليها... فقرر ان ينزل من ع الكرسى ويحركه شوية عشان يطول ضهرها وطلع ع الكرسى وطبطب عليها... ونزل تانى وحرك الكرسى عشان يطلع يبوس دماغها... وفضل يكرر الموقف ده اللى فطسنى من الضحك طبعا وبالتالى ضحكت منار ولكن خبت وشها عشان احمد ما يشوفهاش... ولكن القرد احمد لاحظها وقال لى "كالوو كالوو د تضحأ" قصده "خالوا خالوا دى بتضحك"... فقولتله لأ متهيألك دا لسه بتعيط أهى... فما كانشى قدامه الا انه يرجع يعمل النكته اللى كان بيعملها من شويةويطلع وينزل تانى... وطبعا ضحكت منار اكتر... جالى جرى يخبط عليا ويشاورلى على منار بلئامه كده ويقولى "كالووا كالووا أئىء ائىء د تضحأ" قصده " خالوا خالوا أيىء ايىء دى بتضحك"... وبرده قولتله "انته اللى بتضحك عليا هى لسه تعيط وانته مش صالحتها"... فقرر أحمد انه يعمل حاجه جديده خالص... قرر انه يضحى بالترنج وتنازل عنه لاخته وحطة على رجليها وفرد كفة ايديها ونام بخده جوه حضن ايديها عشان يفكرها بحنيتها عليه وطبطب على رجليها "يااالله ع الحنيه"... وظل هكذا الى أن رأى وجه منار مبتسما... فعرف انه وصل الى مبتغاه... وابتسم ابتسامة الرضا وجالى وقالى "كالوو كالوو صاحتها" قصده "خالوا خالوا خلاص صالحتها"...


توته توته خلصت أجمل حدوته وأجمل تعليق ممكن يتقال "فطرة الله التى فطر الناس عليها" صدق الله العظيم...

الأربعاء، ديسمبر 16، 2009

فاكـــــــره ولا نسيتـــــــــى....


لحـــــــــــــــد امتى يانفسى هاتفضلى كــــــــــــــــده مستنــية...

بتصــحى وتـنامى وتضـــــحكى وتبــــــــــكى وبرده مستنــيه...

وتعدى عليكى الايــــــام وتجرى ولا انتى عارفه لإيه مستنـية...

لا تكونى مستنية حد ينجحك... ولا حــد يدلك على اول سكتك...

ولا حــــــــ،ــــد يزوؤك زأه... ولا اللى يديــــــــــــــلك مكافأة...

ولا عايزه حـــــــــــد يعظمك... ولا اللى ينافق ويكبـــــــــرك...

ايه..؟؟؟ راحـــــت فين الامـــانى... والتطلع للأعــــــــالى...

انتـــــــــى نسيتى ذكريــــــــــاتك... راح فين اللى فـــــــاتك...

لالالالا فوقى واصــــــــــــــحى وافهمى بــــــــــــــأه الحقيقه...

لحــــــــــد دلــــــــــــوقتى فات منك كــــــــــــــــــــام دقيقة...

دا انتى يامــــــــــا يانفسى حلمتى... بس يـاترى لايه وصلتى…


طـــــــب فـــــاكرة ست البنــات الحسنية... ام العيون الوردية...

يوم ما حنت عليكى وبصتــــلك... لأ وإيه كمــــــان ضحكتلك...

وقالتــلك ياحلــــوه انا حبيتك... وفى نن عينى أنــــــا حطيتك...

وجــــوه قلبى أنـــــا خبيتك... وبين حضنى انـــــــا ضميتك...

ولـــــــو جه الزمـــــــان وفرقنا... لا يمــــــكن ابدا انســــاكى...

ورسمتى ورود ف أحلامـــــــــك... وبقى فيه طعم لآيامـــــك...

وقلت ياحـــــــلوه عشان خــــاطرك... لو حتى ايه انا هاوصلك...

ولمـــــا دق بابهـــــــا الزمـــــــان... وكان بــــــــأه اللى كـــان...

وقفتى حتــــــــــة وقفة... وقلتى انــــــــا لازم اعمــــل خطــوه...

وقلتى انــــــا لازم اعمـــل واعمـــل... ولازم ماانهزمش واكمل…

وركبت حصــــانك وجمحتى... وقولتى أنــــــا هاعيش براحتى...

ولازم أتعـــــلم م اللى فــــــات... ولازم أنسى الذكريــــــــــات...

ولازم أبدأ م البدايــــــــــــــــــــــــــة...


ولفــــــــت عليكى الأيـــــام ودارت... ونسيتى الايام اللى كانت...

وقابـــــــلتى اصحـــــــاب جميلة... بجد عيـــــــــــــــال اصيلة...

فى وش الزمــــــــن واقفيـــــــن... وف وقت الوجـــع مساندين...

وع الايام مصبـــــــــرينك... وع الضحكة مشجعينــــــــــــــــك...

وديمـــــــا احنـــــــا جنبك... عافــــــرى مع الدنيا ولا يهمـــــك...

واطلعــــــــــــــــــــــى لأودام... ولا تخافــــــــــــــــــى م الايام...

النجاح قــــــــــــــــــــدام عنيكى... والتفوق هايبقى ليكـــــــــى...

ومهمــــــــــــــــــا مر وراح... تفاءلى فى الصبــــــــــــــــــاح...

واتوكـــــــــــــــــــلى على الله... وابتـــــــــــــــــــدى بسم الله...

ياتـــــــــــــــرى بأه افتكترتى... وعرفتى خـــــــلاص وركزتى...

وهاتبطلى بأه تعيشيها تأضية... ولا هاتفضلى يانفسى برده مستنيه...




الأحد، نوفمبر 29، 2009

حكاية مسجد...


    أنا : "تفتكروا إنهم هايعرفوا يلموا ال 2 مليون دول"... صحبى : "أيوه يابنى من بدرى الناس هنا ماشاء الله بتتبرع باستمرار انته سامع الميكرفون طول النهار بينادى فاعل خير اتبرع بكذا وفاعل خير تانى اتبرع بكذا"... أنا : "فاعل خير ايه يابنى دا انا من ساعة ماجيت البلد وأكتر مبلغ سمعته 400 جنيه وبسمع جنيه ونص جنيه"... صاحبى : "طب ماهو نص جنيه على نص جنيه ان شاء الله هايبنوا الجامع" أنا : "يابنى صدقنى ال2مليون دول كتير على البلد بلدنا صغيره وصعب تجمع المبلغ ده كله"... صاحبى : "يابنى أصلا هما قالوا إنهم هايبدأوا يشتغلوا فى الهدم والبناء بعد العيد على طول معنى كده انهم لموا فلوس حلوه"... أنا : "والله ولو إنى مش مقتنع بس ربنا معاهم وربنا أكيد قادر يعمر بيته"...

    دا كان جزء من كلامى مع ناس اصحابى فى ليله من ليالى رمضان... والجامع ده مسجد الجمعيه الشرعيه فى بلدنا كفر العرب... والتى تتلخص قصته فى الاتى...


    إدارة المسجد شافت إن مساحته بقت صغيره على عدد المصلين... فاقترحت على الناس انهم يعملوا اعادة بناء من تانى وكان تفكير سليم خصوصا ان المسجد حصل فيه تعديلات كتير عشان يتسع للمصلين بس للاسف التأثير كان عكسى والمساحه المهدره كانت اكتر... وكان التقدير المبدأى لبناء المسجد 2 مليون جنيه... ورغم ضخامة المبلغ لكن الناس دى حطوا ثقتهم فى ربنا وبدأوا يلموا تبرعات... وفى أقل من شهرين قدروا يلموا اقل من ربع المبلغ بحاجه بسيطة... وكانت دى بشرة خير وحافز انهم يبدأوا التنفيذ... على أمل ان التبرعات تستمر على المنوال ده... وهدموا فعلا المسجد ورموا الارضيه ولكن... ظهرت لهم فكرة انهم يتوسعوا فى مساحة المسجد شوية... ويحاولوا انهم يتفاوضوا مع جيران المسجد ويشتروا مساحة زيادة منهم... وكانت بالفعل فكرة رائعة وربنا كرمهم وقدروا يضموا مساحة اكتر من المساحة الاصلية للمسجد... حيث ان المساحة الاصليه للمسجد 340 متر والمقدر بناؤها بمبلغ 2 مليون جنيه... والمساحة المستجده للمسجد 740 متر والمقدر بناؤها ب 3مليون جنيه... ورغم ان فرحتهم كانت كبيرة جدا بالانجاز ده لكن ظهر اللى مش عاملين حسابه... وواجهتم المشكلة...


    المشكله ان مبلغ البناء زاد الى 3 مليون... المشكلة ان الفلوس الباقيه من أعمال الهدم والبناء اشتروا بيها المساحة الجديدة... المشكلة ان التبرعات كمان قلت الى أسوأ حالتها... ودلوقتى يبقى الوضع كما هو عليه المسجد أرضيه فقط... وفلوس يوك وتبرعات يوك والحاجه الوحيدة اللى مش يوك الامل فى ربنا... وحاليا كل مايلموا فلوس تذكر يجيبوا عمال يعملوا حاجه بهم ويرجعوا يوقفوا تانى... يعنى خطوات السلحفاه... خطوة قدام وعشره ورا... ودى الصورة الحالية للمسجد...لا فيه شعل ولا فيه عمال ولا فيه حاجه غير المسجد اللى كان فى الذاكرة... والصورة اللى متعلقه على الجنب اللى بيحلموا يوم انهم يشوفوه حقيقة...



    أنا ليه بحكيلم الموضوع ده... اولا عشان طبعا اللى نفسه واللى يقدر يعمل حاجه الباب قدامه مفتوح... وخاصة ان امام المسجد قالى انهم عندهم استعداد يقبلوا اى حاجه فلوس... أسمنت... حديد... اى حاجات عينيه... مفيش مشاكل اهم حاجه تساعد وخلاص... ولزقت فى دماغى اوى كلمته "احنا مش كل يوم بنبى مسجد... ودى فرصه يمكن سيدك الله يرحمه ما طالهاش"... وأنا زى ما معظم الناس تعرف عنى لا ليا علاقة باللى بيبنوا المسجد... ولا ليا علاقه باللى مش عايزين المسجد يتبنى... ولا ليا علاقه باللى بيلموا تبرعات... ولا حد طلب منى أتكلم عن الموضوع ده أصلا... أنا كل الحكاية لاحظت ان المسجد مفيش فيه شغل من فترة... فروحت سألت المسئول الاول عن بناء المسجد فحكالى القصة من البداية للنهاية... فربنا بعتلى فكرة انى أقولكم جايز ربنا يبعتلنا اللى يشوف البوست ده ويقدر يساعدهم ويعملهم حاجه ونكون احنا السبب ان شاء الله... يعنى أنا قولت مش قادرين ندفعهلم فلوس كمان ما نساعدهمش ان نوصل حكايتهم للناس... فانته لو تقدر توصل الكلام ده لاى حد ولو على سبيل الكلام بس... ياريت ما تكسلش واتكلم عنهم ابعت للناس اللى تعرفهم... ابعت وخلاص... ممكن الرساله دى تكون قادره انها توقفلهم ولاد الحلال... وممكن ما تعملش حاجه أصلا بس احنا وهما املنا فى ربنا خير...


    وأى حد عايز يساعدهم او يسأل عن أى حاجه وأى طريقة عايز يتأكد بيها انه ماشى فى الطريق الصحيح وفلوسه هاتوصل لمكانها الطبيعى فالناس دى تحت امره ... ودى المعلومات والأرقام اللى ممكن تتصل بيهم....


    حساب رقم 200470 بنك التنمية والائتمان الزراعى بالمنصورة... رقم حساب الجمعية الشرعية بقرية كفر العرب-مركز طلخا- محافظة الدقهلية

    (مصر)


    المسئول الاول عن بناء المسجد امام المسجد أ/ على محمود سلطان

    002-0166285063 - 002-0105059217


    وهاتلاقى فى اللينك ده معلومات زيادة عن المسجد وصور المسجد القديم والهدم ورمى الأرضية

    http://www.bsant1.com/vb/forumdisplay.php?f=19


    وده رقمى أنا صاحب المدونة محمد حجاز 002-0103625626

وده ايميلى eng_m.7egaz@hotmail.com
وده لينك المدونة

http://7egaz.blogspot.com/


الأحد، نوفمبر 22، 2009

م الدنيا ممكن نتعلم...


    إتعلمت من الدنيا إن أنا ماأندمش على قرار خدته... ومهما كانت النتيجه فأنا واثق إن أنا إتعلمت حاجه جديدة... وديما هاتلاقى حد يهمه إنى أندم على قرارى...


    إتعلمت من الدنيا أنه رغم إن عصفور فى اليد أحسن من عشره على الشجره... فمش هايحصل حاجه يعنى لو جربت أمسك عصفور من اللى على الشجره... ولا أنا هافضل طول عمرى أبص عليهم ونفسى فيهم وعمرى ما هاطولهم لأنى أصلا ما جربتش...


    إتعلمت من الدنيا إنه لما يجى الصيف والجو يبقى هادى وبديع بتلاقى الناس كلها حواليك... ولكن لما يجى الشتا ويبدأ يمطر ويديها عواصف بتلاقى نفسك بتشيل المطره كلها على دماغك لوحدك...


    إتعلمت من الدنيا إن لو كان الصدق تلميذ... والكذب أستاذ... فالتثبيت فأيوه كده ياودييييييييع أخيراً فهمتنى استاااااذ ورئيس قسم...


    إتعلمت من الدنيا إن كلمة حبيبى يبقى عايز منى حاجه...وكلمة دا انته أخويا يبقى استحمل اللى جاى ياريس...


    إتعلمت من الدنيا إن الشغل بقلة ضمير فده الطبيعى... أما الشغل بضمير وتراعى ربنا فيه فده يبقى يوم طوارىء...


    إتعلمت من الدنيا إن بداية طريق المشاكل لما تعامل الناس زى ما بيعاملوك... وبداية طريق راحة البال لما تعامل الناس بما تحب أن تعامل...


    إتعلمت من الدنيا إن لما الكبار يتكلموا الصغار ينفذوا... ولما الكبار يغلطوا فالصغار يستحملوا...


    إتعلمت من الدنيا إن أجمل حاجه فيها إنك تخلى واحد يبتسم وإنته أصلا ما تعرفوش... أو تعرف إن واحد إفتكرك بالخير وإنته من زمان ما شوفتهوش...


    إتعلمت من الدنيا إن الإبتسامه أجمل صباح الخير... والضحكه أحلى كلمة إزيك... وسلام ياقمر أرق كلمة وداع...


    إتعلمت من الدنيا إن الزعل بين اتنين شىء عابر... والحب بينهم شىء صعب استمراره...


    إتعلمت من الدنيا إن الحب أجمل ما الوجود... والحزن النتيجه الطبيعيه لوجود الحب...


    إتعلمت من الدنيا إنى لو رسمتلها بتبوظ اللوحه... ولو سيبتها كده بتمشى زى الفل وبتبقى أجمل لوحه...


    إتعلمت من الدنيا إن الهمه تقيله جدا... والقرار صعب أوى... والنجاح مفيش أقرب منه...


    إتعلمت من الدنيا إنى ما أسألش ربنا إلا الستر والرضا وراحة البال...



الثلاثاء، نوفمبر 17، 2009

وفهمت عنيه...


    ساعات كتير بتبقى عايز تقول لحد كلام كتير لكن مش قادر تقوله لكنك بتحس انه فاهم الكلام ده كله وتلاقيه بيقولك انا قريت الكلام ده فى عنيك... ومن كتر قربك من الشخص ده بتقدر تفهم من عنيه انه مبسوط جدا... وبيوصلك برده انه حزين من مجرد النظره لعنيه... مع ان العيون دى عمرها ما اتكلمت ولا عمرها هاتتكلم... لكنها هاتفضل ليها سحرها الخاص واسلوبها المميز فى التعبير عن احساسك ومشاعرك... وهاتفضل طول عمرها تخطفك اول ما تبصلها... والغريب انها نفس اللون ونفس الشكل لكن كل واحد وله بصمته... عيون تلاقيها بتضحك... وعيون تلاقيها حزينه...وعيون تلاقيها محتارة... وعيون تلاقيها مشتاقة... وعيون تلاقيها شقيه... وعيون تلاقيها مكسوفه... وعيون تلاقيها جريئه...وعيون تلاقيها بتسألك... وعيون تلاقيها بتخوفك... وكتير وكتير وكتير.... وعشان كده انا متعود من زمان الف وادور بين العيون... بحاول اقرأ عيون الناس... مجرد فضول مش أكتر... لكنى بحس انى بقتحم خصوصيات كتيره جدا...بفهم مين حزين... وبقدر أفهم مين فرحان... ومين بيكدب... ومين مستريح... ومين تعبان... ومين مش راضى... ومين بيتصنع... وكمان مين بيخدعنى ويشاغلنى... لكن المره دى حصلى موقف غريب ولذيذ كده... قولت احكيلكم عليه... ونشوف...


    كان يوم عادى زى اى يوم وانا واقف بعمل سكان بعنيا على الناس كلها... مجرد مسح سريع مش بركز مع حد معين... الا اذا لمحت اى حاجه تستحق الاعجاب والتقدير...مثلا عيون جريئه... ملامح جميله... ابتسامه رقيقه... قالب متناسق... اى حاجه تستاهل ان الواحد يركز فيها... وفجأتا عنيا وقعت على عيون بتبصلى... وقفت عندها وركزت معاها... لقيتها انكسفت وبصت فى الارض... وفضلت دقيقه ورجعت تانى تبصلى... وبدأت بأه الرحله المفقوسه... تخطف نظره وتبص فى السقف... تعمل نفسها كأنها بتبص للناس كلها من اليمين للشمال وتبصلى بالمره... وتبص بره الشباك وترجع تخطف بصه... وتقول لنفسها انا خلاص ماعدتش بصاله خالص... وترجع تانى تبصلى من تانى... وكل ده انا مركز معاها وفاقسها... وبعمل زى اللى هى بتعمله بالظبط...


    وقولت لنفسى انا هاشاغلها... وجربت أبتسملها... ابتسمتلى ودارت على ابتسامتها بإيديها الصغنطوطه ... وقالتله: بابا شايف الولد اللى واقف هناك ده تفتكر شبه مين؟... بابا: مش واخد بالى يابنتى... البنت: ركز شويه يابابا... بابا: شبه مين يعنى؟... البنت: يابابا دا احنا لسه متفرجين عليه امبارح شبه ميدو مشاكل... بابا: اه تصدقى فعلا شبهه اوى طب بس بأه أصله بدأ ياخد باله ويبصلنا وماعدتيش تبصيله واحترمى نفسك شويه... بصتله كده باستغراب وكأنها بتقول لنفسها: هو انا بقولك عشان تقولى احترمى نفسك وماعدتيش تبصيله يارتنى ماقولتلك... وقررت مع نفسها تشاغلنى... وبدأت تقلبلى فى عنيها وتضحك... أضحكلها... تعمل نفسها انها بتدور على حاجه فى شنطتها وتفضل تقلب فيها يمين شمال... وفجأه تروح بصالى وكأنها افتكرت حاجه كانت ضيعه منها او حاجه اتسرقت منها وشاككه فيا...


    ومره تبص ع الارض وبسرعه تروح بصالى وكأن فى مصيبه حصلت زى ما اكون لمستها وجيت يمها... وفضلت على كده لحد ماجت محطتها... قالت لباباها قوم يالله يابابا وبدأت تتزحزح ناحيته وكأنها بتضغط عليه عشان يقوم وكمان عشان المكان من ناحيتى يفضى... وتبصلى كده وتبرألى وكأنها بتقولى اقعد انا بفضيلك المكان ده... وما قامتش الا لما ضمنت ان انا قعدت مكانها... وبصيت لها عشان اشكرها لقيتها مبسوطه جدا... وكأنها حاسه انها قدمتلى أجمل هديه... وكل ما تتقدم خطوه فى طريقها للنزول... لازم تبصلى... لحد مانزلت فضلت تبصلى الى ان تراءت الرؤيا بينى وبينها... واختفت ملامحها الجميله عن عيني... ولكنها لم تغادر عقلى لفترة طويله... وفضل فى عقلى سؤال واحد هى ليه كانت بتبصلى بالطريقه دى...؟؟


    ملحوظه: البنت دى صغنطوطه وعندها تقريبا سبع تمن سنين عشان الناس اللى ديما بتفهمنى صح...

الاثنين، أكتوبر 26، 2009

المصرى ماركه مسجله...


    احنا كمصريين لينا ختم خاص على كل موقف او اسلوب او طريقه فى كل حاجه فى حياتنا... ولو روحت اى حته فى الدنيا ان شالله لو روحت المريخ وشوفت اى موقف من المواقف دى تقول على طول انا مصرى وابويه مصرى....خد عندك مثلا...


    الوحيد اللى ديما يتكلم عن المبادىء... وعنده الحياه دى مسألة مبدأ... بس ياترى بأه يعنى ايه كلمة مبدأ...


    الفشل والخساره عنده لها رد واحد بس مفيش غيره "اصل احنا طيبين زياده عن اللزوم"... مع انه يعرف الف معنى للطيبه الا معناها الحقيقى...


    الشغل بالنسبه له دلع ومزاج وقلة اعتناء... واول ما يتزنق يبدأ بتنرفز ويتعصب ويديها بأه تركيز... وتلاقيه ينجز شغل بطريقه مش معقوله... عجب


    مقتنع جدا ان الجرى مفيد للصحه... وعمره ما بيمارس الجرى الا عشان يلحق مكان فى اى مواصله....


    تعامله باحترام وكبنى ادم يقولك يابرنس... تهزأه وتعامله خشن يقولك يابشمهندس... يحتاج منك حاجه يتكسف ويخبط على بابك ويناديك بي والنبى يااستاذ...


    تبقى واقف قدامه فى المترو... واول ما يجى يقوم ينادى على واحد بعيد ويقعده... عايز يطمن ع الكرسى من بعده... أمال ايه بأه واخدين ع التوريث...


    لما يشوف واحده يبقى مهتم جدا انه يقعدها... بس ده لما يكون هو كمان واقف... ولما يكون قاعد بيجيله حول ويفضل باصص لفوق ومتوه...


    فى نظرها تبقى قليل الزوق اذا كنت قاعد وسيبتها واقفه... مع ان هى لو قاعده امبوسيبل تقوم لحد تانى حتى لو كانت واحده حامل...


    هدفه فى الحياه هى ورزقها وخليها على الله... مع انه عمره ما رضا برزقها ولا اقتنع انها فعلا على الله...


    الكلام عنده معناه الضد... لما يقولك احنا اخوات واى حاجه محتاجها انا تحت امرك... تفهم على طول انك لازم تستحمل اخوك ولو احتاجت حد يذلك ويطلع عين اهلك فااخوك موجود...


    كل حاجه ف حياته ماشيه بسيستم...بالاماره عمره ما بيستريح لاى مصلحه الا اذا كان فيها طابور...


    مثقف جدا لدرجة انه بيتكلم فى كل حاجه...ومطلع دائما على قضايا الساعه وكمان عنده حلها... مع انه عمره ما اشترى جرنان...


    مغرم بالاتجاهات المعاكسه... تديها حزاينى يقولك يعم بأه كفايه نكد هى ناقصه... تدييها فرايحى يقولك بس الدنيا مش وردى اوى كده... تقول احنا وحشين يقولك حرام عليك ما تجيش علينا كده... تقول بحبك يامصر يقولك يلعن ابو تييييييييت مصر


    باختصار الشخصيه المصريه... ممثل محترف فى سينما الحياه... ناقد متمرس لأى نوع من السيناريوهات اليوميه... مدير تصوير اى فضيحه او خناقه... مخرج لاى نوع من الشائعات المحبوكه...وعجبى


الجمعة، أكتوبر 09، 2009

من يعرف أكثر يتقدم...


فيروس إنفلونزا الخنازير من الفيروسات المركبه جينياً و السبب وراء إطلاقه هو تبرير برنامج التطعيم الإجبارى الذى أقرته منظمة الصحه العالميه، ويكشف هذا البرنامج عن مؤامرة قذرة و واضحة لتقسيم الإنسانية إلى مجموعتين , المجموعة الأولى تضم أولئك الذين تدنت قدراتهم العقلية و الفكرية و تدهورت صحتهم و انخفضت القدرات الجنسية لديهم عن طريق التطعيم الملوث (قصده اللى هو احنا يعنى)، و المجموعة الثانية هى التى لا زالت تمتلك تلك الميزات الإنسانية الطبيعية و بالتالي فهي متفوقة و تحكم المجموعة الدنيا إن لم تستعبدها فعلاً ".


ده جزء من تقرير "عنوانه كابوس مروع-اسرار منظمة الصحه العالميه" لقيته فى ميل عندى. محتوى التقرير ده بيشكك فى العقار اللى هما هايخترعوه عشان يحمونا من الانفلونزا المكسيكيه اللى احنا اصلا مش عارفين ايه هى ولا ايه سببها الا شوية كلام فاضى من الاعلام... وفضل يحكى بأه عن تركيب العقار ده وانه بيحتوى على مادة السكوالين والماده دى موجوده بنسب معينه فى الجسم وانخفاضها يسبب انخفاض معدل الخصوبة و تدني مستوى الفكر و الذكاء و الإصابة بالأمراض المناعية الذاتية... ونصح الناس انهم يمتنعوا عن التطعيم الاجبارى وقال خلى بالك لو جابوا فى اعلان ممثل مشهور مثلا او واحد مسئول بيطعم فمايضحكش عليك وتنكب ماجايز الماده اللى هو بيطَعم بيها غير الماده اللى انته هاتطعم بيها ايش درَاك...


وده كلام زى الفل واحلى حاجه فيه بأه ان احنا مش عارفين اى حاجه فى اى حاجه... يقولولنا انفلونزا جديده نصدق ونخاف وندبح فى الخنازير... ونفضل نعد كل يوم المصابين زادوا اد ايه... طب بص احنا نلغى الدراسه السنه دى(اصل هى ليها لازمه اصلا)... لالالا احنا نلغى العمره ... وبص احنا نلغى الحج كمان... وندعو الساده المواطنين الى عدم التواجد ف الاماكن المزدحمه ومايروحش دماغك للمترو دى زحمه عاديه وما تقلقش مفيش حد عارف ياخد نفس ولا يعطس من كتر الزحمه ولا الاتوبيسات ما الفيرس يطير احسن ما يتذل على مايروح مشوار ولا طوابير العيش اصل الفيرس مابياكلش العيش بتاعنا ولا الماتشات بتاعت منتخب الشباب أصل عايزنكم كده امال تشرفونا وتملوا المدرجات شكلنا قدام العالم ايه احنا اللى منظمين البطوله ومفيش جمهور لا احنا قصدنا المساجد مثلا وبالذات صلاة الجمعه ياريت كل مواطن يروح الصلاه ع الاقامه على طول وبلاش موضوع الخطبه ده... واحنا ان شاء الله بندرس مشروع قرار الغاء صلاة الجمعه واغلاق المساجد الكبيره اصلا للحد من انتشار الوباء...زى ما هو باين كلها حلول خايبه وهايفه وغبيه وواضح الهدف منها... وتحزن لما تسمع ان وزير الصحه رفع شكوى للصحه العالميه بيشتكى من الظلم فى توزيع حصص العقار المضاد للانفلونزا وان الحصص الكبيره هاتروح للدول المتقدمه (عندك مانع بفلوسنا يابا واللى مامعهوش مايلزموش) وبعد كده يقولك لا دا العقار ده ملوث... يعنى الفيرس بيمَوت والعقار بيعيَشك ميت...


يعنى بالعربى كده احنا عندنا مشكله اكبر من مشكلةالانفلونزا... مشكلة الجهل والتخلف... ماهو احنا مش عارفين مين فيهم اللى بيمَوت... واللى هما هايقولولنا عليه هانعمله... ما ده تمن جهلنا وتخلفنا... لا احنا عارفين نخترع عقار ولا احنا عارفين نقدم حلول وقايه... لما نكون عايشين مالناش لازمه... ولا لينا اى دور ولا بنمثلهم حتى النوايه اللى بتسند الزير... دا احنا يدوب مجرد مستهلكين عاله عليهم... يبقى طبيعى جدا اننا نتحط فى المجموعه الاولى اللى المفروض عليها تفضل طول عمرها ضعيفه... عشان لما تيجى يوم وتصدر مناخيرها ليهم تاخد بكل سهوله على دماغها... ولازم تبقى وظيفتنا طول عمرنا فى قصرالدنيا خدامين... اخرنا الدور الارضى بس... احنا اللى عملنا فى نفسنا كده... واللى هما فيه دلوقتى دى اللى المفروض يكون... هما كل اللى عملوه حطوا قدام عنيهم حديث النبى عليه الصلاة والسلام "من تعلم لغة قوم امن مكرهم وشرهم" ونفذوه بالحرف الواحد عرفوا عننا كل حاجه ازاى يضحكوا علينا وازاى يستهيفونا وازى يستغبونا وازاى يستعبدونا وازاى نفضل طول عمرنا تحت رحمتهم... وديما محتاجين ليهم... وعشان مانفضلش عبيد ليهم لازم نساوى والمثل بيقول الشباك اللى بيجيلك منه الريح سده واستريح فياترى احنا عندنا استعداد نسد الشباك ده ونبدأ نحل مشكلتنا بنفسنا وعندنا استعداد يموت نصنا بس الحل نكون واثقين فيه لانه من صنعنا وعندنا استعداد نمد بس الخطوه والباقى بأه على ربنا... ربنا اللى احنا فى الوقت الحالى مالناش غيره وبنطلب منه يقف جنبنا... ويسترها معانا عشان عارف ان احنا فى الدنيا دى لا حول ولا قوة لنا... يـــــــــــارب



الثلاثاء، سبتمبر 15، 2009

ده مش اعلان ياأساتذه...


من كام بوم كده لفت انتباهى اعلان جميل كده ولذيذ...وكالعاده اول ماتسمع صوت طارق نور تعرف توماتيكى ان الاعلان ده تبع الحكومه... المهم الاعلان ده بتاع سكك حديد مصر... اللى فيه المقوله المشهوره "المصرى اللى على حق هو اللى يقول للغلط لأ"... وطبيعى جدا ان الاعلان ده يستفزك وبالذات لوكنت من رواد السكه الحديد... بس أنا هنا مش زى الناس وهاقولك ان القطر اللى كان موجود فى الاعلان المستحمى النضيف ده مش مصرى...ده من المانيا القمح اه والنبى... ومش هاقولك ازاى ولاد الايه قدروا يعملوا ديكور زى محطة رمسيس بالظبط بس على نضيف شويتين... ولا هانتكلم عن التذكره المدعمه اللى بيقولوا عليها اللى فارقه عن الميكروباص جنيه واحد... بس القطر افضل لانك بتفضل طول الطريق واقف على قفاك... ولا برده هاحكيلك ع البلطجه بتاعة محطة رمسيس اللى عشان تعدى من الميدان وتروح احمد حلمى ومش هاتركب حاجه والنعمه ما هاتركب حاجه دا انته هاتعدى بس... يقولك ادفع جنيه ياستاذ رسم مرور اصله شايفنى عربيه لانسر... ولا بقى هاقولك عن المواعيد اللى زى الالف بتاعتهم القطر معاده يطلع 4:45 وهو اصلا بيدخل المحطه عشان يركب الناس 5:00... ولا هانقول ان الراجل اللى كان مسطح فى الاعلان كان مسطح عشان مش معاه حق التذكره لا وحياتك دا بس مش لاقى مكان تحت فقال اطلع الدور التانى اوسع....


لالالالا سيبك من الكلام ده كله واخدين عليه ومتعوده ديما على المرمطه فى القطره دى... انما ايه بقى حكاية المصرى اللى على حق دى تفتكر قصده يقول ان احنا مش مصريين... وعشان كده مش بنقول لأ على اى حاجه... ماهو احنا كل يوم بنشوف ونسمع الف غلط... وبنحط جوانا مليون لأ ومع ذلك ما بنقدرش نطلعها ونقول للغلط لأ... لما هو كده امال احنا مين يكونشى احنا هنود ومش واخدين بالنا ماهو بردك الشبه قريب من بعضه... ولا تفتكر انه فى القاموس بتاعه كلمة غلط معناها تزويغ وتسطيح ع القطر وبين قوسين كده ليس لها ا ى معانى اخرى عندنا... يعنى الميه اللى فيها مجارى دى... والفاكهه اللى بتتروى بالصرف الصحى... والعيش ابو فيران... والزحمه المؤرفه... والكوسه فى كل حاجه... والزباله فى الشوارع... والبلطجه من سواقين السيرفيس... ولا ياعينى التباعين وكمان مره التباعين... كل ده مش معناه غلط هو القاموس بيقول كده... ولا يكونش قصده بكلمة المصرى اللى حق دى زى سمرعلى حق ماهى على الطبله نزلت ترقص واحنا على الغلط بقينا نطنش والحكومه علينا نازله استهبال وتسقع...


انا عن نفسيتى شكيت فى نفسى واول حاجه عملتها روحت جريت على اذاعة صوت القاهره جايز بقى بيقول "هنا بومباى" ولا حاجه بدل "هنا القاهره"... ده مش اعلان يااساتذه... ده قصدهم ينكشونا ويقولونا انتوا مالكوش لازمه فى البلد... وبكل بساطه الحكومه بتطلب مننا نقول لأ... ياجماعه حد يقول لأ... زهقنا من كتر ماحدش بيقولنا لأ... ياناس عايزين حد يوقفنا بأه... سايق عليكوا النبى حد يتنحرش ويوقولنا لأ مره ... مفيــــــش فايده... بس انا عن نفسى هاقول لأ بس بشرط لما اعرف الايد اللى فى الاعلان اللى بتقول لأ وتأفش على افا الغلط ايد مخبر عادى ولاامن دوله...؟؟؟ يالله بأه احنا من زمان يابنى مضحوك علينا... الله يرحمك ياحسن ياعابدين...


السبت، سبتمبر 05، 2009

على مايجى غيره...


انا بحلم اصحى الصبح الاقى نفسى واحد تانى... الاقى نفسى حاجه تانيه خالص... الاقى سريرى فى حته من الجنه... الاقى بيتى على شط بحر هادى ومزيناه السما... الاقى ودنى بترقص على اجمل صباح الخير من الاموره الحلوه المسمسمه...الاقى عربيتى واقفه تحت البيت مستنيه تودينى اى حته فى الدنيا... الاقى البرستيج فى شغلى والسعاده اللى بشوفها فى الاعلانات... الاقى الناس نست شكل الزعل ووشوشها مليانه بالابتسامات... انا نفسى بجد حياتى تتغير...


ومش انا لوحدى كده... الناس كلها كده... الناس كلها نفسها تغير حياتها...الناس مخنوقه من كل حاجه فى حياتها... فى واحد نفسه يغير الشغل اللى هو فيه... وواحد نفسه يغير السكن والمنطقه اللى هو فيها... واللى نفسه يغير التى شيرت اللى عليه اللى اتحفظ من كتر اللبس... واللى نفسه يغير التليفون اللى اتهرا من كتر الخبط عشان يشتغل... واللى نفسه يغير الاكل اللى بيتعاد كل يوم...واللى نفسه يغير التليفزيون اللى بيجيب حاجات تخنق... واللى نفسه يغير إمام الجامع اللى حافظ خطبتبن وأيتين وبقاله سنين بيعيد فيهم... واللى نفسه يغير التباع والسواق اللى بيبلطج عليه كل يوم... واللى نفسه يغير مراته بس عشان خاطر العيال... واللى نفسه يغير خطيبته بس صرف عليها كتير ومش عارف ياخد كل حاجته... واللى نفسه يغير بنت الجيران اللى شبه الافلام القديمه... واللى نفسه يغير عياله ويبقوا شبه العيال النضاف اللى بيشحتوا بيهم فى 57357... واللى نفسه يغير الناس اللى الصدق بقى ضيف على لسانها... واللى نفسه يغير الحقد اللى بايجار قديم ساكن قلبهم... واللى نفسه يغير الناس اللى على طول كده عايزين منك مصلحه... واللى نفسه يغير البلد بحالها ويسافر... واللى نفسه يغير البلد اللى ليها سافر... واللى نفسه يغير الحكومه اللى عندها كل حاجه مدروسه وفى اطار خطة التنميه... واللى نفسه يغير رئيس الجمهوريه واللى جاى بعديه كمان...واللى واللى واللى...


وده عادى ان كل واحد نفسه يكون حاله احسن من اللى هو فيه... لكن مش عادى ان الناس كلها يكون مش عاجبها العجب ولا الصيام فى رجب... مش عادى ان الناس كلها نفسها تغير... ويلفت انتباهك ان معظم الناس بتقولك اهو احنا صابرين على مايجى غيره... يعنى مفيش حد مبسوط باللى هو فيه... ومش عارف ده بأه نسميه تمرد... ولا نسميه عدم رضا... بس ماينفعش نقول عدم رضا... اصل الناس دى اكتر حاجه بيقولوها رضا... وماينفعش نقول كمان متمردين... اصل المتمردين بيشيلوا سلاح ويقولوا لأ ويوصلوا للناس كلها انهم زعلانين... وبالغصب وبالقوه بياخدوا حقهم... لكن الناس دى لا عمرها هاتقول لأ ولا عمرها هاتاخد حقها... الناس دى اخرها تفضفض بينها وبين بعضها... ومفيش حد فيهم يجرؤ يقول للتباع هو احنا ليه بندفع الاجره تلات مرات لنفس المسافه... ولا تجرؤ تقول للجيران اللى تحت هو ليه الميه ما بتطلعش عندنا... ولا اللى رمى السيجاره ع الملايه بتاعت الست اللى قابلنا يجرؤ يقول انا اللى رميتها كان اتسبله واتقطع يومها... اقولك خليك حاطط فى نفسك كده وساكت اصل بيقولك السكوت علامة الرضا... تانى رضا يانى... خلاص بأه...

الأربعاء، أغسطس 26، 2009

انما اطعمه الله وسقاه...


لما كنا صغيرين شويه كان فى رمضان ممكن الواحد فينا يصحى الصبح ويدخل المطبخ ويشرب ميه او ممكن ياكل كمان... وبعد كده يقول اخ نسيت دا انا صايم... نرد عليه ونقوله ده فيه حديث كان بييقول "روى عن ابى هريرة رضى الله عنه ان النبى صلى الله عليه وسلم قال من نسى وهو صائم فاكل او شرب فليتم صومه فانما اطعمه الله وسقاه"...


السؤال بأه: هو ليه اليومين دول مفيش حد عاد بينسى وياكل او يشرب وبعد كده يفتكر انه صايم...؟؟؟ مع ان احنا فى زمن الواحد فيه بينسى اسمه...وبينسى حتى اذا كان اتغدا ولا ما اتغداش... اتعشى قبل ما ينام ولا بقاله كام يوم ما اتعشاش...


تفتكر هل ده عشان الصيام بقى تقيل على قلبنا فعشان كده فاكرين طول الوقت ان احنا صايمين... ولا عشان زادت اهمية الصيام عندنا لدرجة ان احنا مش قادرين ننسى ان احنا صايمين... ولا عشان احنا عدد الايام فى السنه اللى بنصومها قلت جدا فبقى بالنسبه للواحد فينا الصيام ده يوم طوارىء... ولا عشان الخير قل فى القلوب... ولا عشان الاكل فى بيوتنا يدوب... ولا عشان رمضان ماعدتشى زى زمان... ولا زمان كان عندهم رمضان حاجه تانيه... ولا عشان هما كان الصوم بالنسبه لهم عفه واحنا بالنسبه لنا عادى مش فارقه... ولا تفتكر عشان رمضان كان عندهم صاحب بيت واحنا عندنا مجرد ضيف...


بس انا افتكر ان ستى زمان لما كان يجى رمضان... بحس انها كانت مستنيه الضيف ده... وبحس انهم كانوا سايبينله مكان فى البيت... م الاخر عاملين حسابه ومكانه فاضى ع الطبليه... وتلاقيهم مبسوطين اوى انه جاى... وتحس كده انه جاى وشايلهم على دهره اطنان من الخير... وافتكر كمان لما كان يجى اخر يوم فى رمضان عند ادان المغرب كانوا بيطلعوا ع السطح ويشاوروله ويقولوله مع السلامه يارمضان هاتوحشنا اوى يارمضان... بيودعوه غريبه اوى الناس دى... واحنا بأه افتكر ان كل مالواحد فينا يحس انه جعان يقول يالله هانت لسه 29 يوم... بالطول بالعرض هانصومهم... يالله يومين والواحد يتعود... ولما يجى اخر يوم عندنا نقول يالله هانت النهارده اخر يوم ونخلص... والضيف ده بقى تقيل علينا ومرخم علينا يومنا العادى... وبقى الصيام بالنسبه لنا فى رمضان عاده... وعمرنا ما بننسى ان احنا صايمين... حتى واحنا بنبص ع البنات...بنخطف بصه كده ونقول يالله بقى ربنا يستر ويعدى رمضان ده على خير...


المهم انا مش عارف ايه الفرق بينا وبين ايام زمان... وليه فعلا كان الناس ممكن تنسى انها صايمه... مع ان ماشاء الله ربنا كان مبارك فى كل حاجه فيهم... بس ممكن دا يكون له علاقه بكلمة البركه ... البركه فى الاكل... البركه فى الصحه...البركه فى الخير... البركه فى القلوب... البركه فى الطيبه... البركه فى الايام... البركه فى البيوت... وعشان كده يمكن جات كلمة اطعمه الله وسقاه فى الحديث... يمكن... الله اعلم...


الاثنين، أغسطس 17، 2009

انته جيت يارمضان...!!!


فى دخلة رمضان... روحت قولت للشيطان...

بـص يعم ابليس... عايزين نبدأها بيـس...

عايزين بجد المره دى... نقسمها حادى بادى...

تسيبنا اول عشر تيام... ينفعلنا فيهم صيام...

ونركـعلنا ركعتين... ونلتـزم شويتين...

ونختم مره القرأن... ونحط فى الحسبان...

الاهتمام بالصـلاه... ونحاول نقضى الزكاه...

والاهم صلاة الفجر... والنوم طبعا مصيره الهجر...

ومش زى رمضان اللى فات... ضيعتـنا البنات...

وقعـدنا للمسلسلات... وشدتنا الاعـلانات...

وأنتخـنا نيام... وطنشا صلاة القـيام...

وخد انته بأه اللى باقى... ماكل حاجه بترجع عادى...

والجوامع بتفضى تانى... ونبدأها طناش من تانى...

ونرجع نسمع الاغانى... والبنات بتقلع تانى...

وكام صلاة تراويح بتضيع... والمسلسل ده بأه فظيع...

والجو بيبرد الفجر... وانا لما اقوم هاصليه فرد...

ويتحول رمضان من عباده... الى للأسف مجرد عاده...

قام قالى الشيطان... ياأيها الانسان...

انا باشكرك بامتنان... دا انا ياراجل كنت تعبان...

وقاعد زعلان وقرفان... اصل انا فى دخلة رمضان...

بيلمونى انـا والعيال... ويقيدونى بالاغـلال...

بس انا دلوقتى اطمنت... واتبسطت كمان وارتحت...

أصل أنا خلاص عرفت... انى هاتقيد وسايب ورايا رجاله...

كفاره يامعلم...



السبت، أغسطس 08، 2009

راحت عليكى يامصــــــــر...


تحذير لو كنت من الناس اللى معاهم السعاده مقطعه نفسها فما تقرأشى البوست ده اصله شايل كتير جواه وبيفضفض شويه وعشان ما تجيش فى الاخر وتقولى ده فيه شوية كئابه...

.........................................


يامصر كل اللى فيكى افا... مستحمله ومتمرطه وعمرك ماصرخت ف يوم وقولتى كفا... ساكته ليه وخايفه على ايه وليه لسه فيكى طبع الوفا... هاتفضلى كده وهاتموتى على كده وعمرك ما هاتشوفى شوية الدفا... هو انتى عامله مش واخده بالك ليه... ومغمضه عينك على ايه... وفاكره ان انتى احسن من كل الناس... لا اصحى... فوقى... دا انتى خلاص مات فيكى الاحساس... والطبع الطيب فيكى ياعينى اتقلب... والخيبه والحقد عليكى غلب... والواطى فيكى بقى عالى... والرخيص بقى شايف نفسه غالى... والربع بقى اكبر من الجنيه... والحرامى بنقوله يابيه... والتباع بقينا بنقوله يابشمهندس... والمهندس يعينى ماشى مفلس... والصدق بقى بيتكسف من الكدب... وقدام الفلوس يتولد الحب... وعادى خالص ينكسر القلب... ياااااااه... يااااه ياقلب...


طب فاكره... فاكره لما كنت موزه... وكان عندك شوية عزه... وكانت كل البلاد عينيهم عليكى طالعه... وكان يابنت الايه عليكى راسمه... النيل بطولك ماشى متمختر... والنسمه فى سماكى الصافيه بتتغندر... وبحر م النحيادى وبحر من النحيادى... وعلى شمالك الواحه والوادى... وكان الخير على ضفافك عادى... والحق نافش ريشه وفى شوارعك ماشى... والطيبه فى كل البيوت مفروشه...والابواب كلها مفتوحه... والابتسامه على كل عتبة باب... والسؤال عن الاحباب... وكان كل الناس قرايبى... والبيت ده بيت عمى... والشارع ده فيه خالتى... وهناك كده ساكن صحبى... وفى الحته اللى هناك دى ساكن حبيبى... واعدى على كل الناس اسلم... ويوم ما اجى اتألم... الاقى مليون واحد جنبى بيتكلم... بيساندى ويخدمنى وينصحنى لوجه الله... يااااه... يااااااه يالله...


اما دلوقتى فانتى خلاص عجزتى... وكبرتى كمان وخرفتى... وراحت عليكى ياحلوه... والكل بقى بيعاملك مصلحه... ورموكى فى اوضه مفيهاش حتى مروحه... وسابوكى كده ياعينى مكسوره... وطلعوكى بره الصوره... ورخصوا تمن ولادك... ونسيوا خلاص ايامك... والسودان بقت اغلى منك... وليبيا بقت تساوى عنك... والامارات اجمل منك... والكويت فيها كرامه عنك... والسعوديه فيها خير عنك... دا حتى الاردن بقوا بيسيبوكى ويروحولها... ما انتى كل حاجه فيكى بقت كوسه... والشباب يعينى موكوسه... ومحسوره كمان ومقهوره... من اللى بتعمليه فيهم يامصر...


تعرفى انا نفسى اعيش غريب عنك... وأنا عارف انى مش فارق معاكى ولا همك... وهاتنسى كمان ان انا من دمك... ما انا اصلا ولا اعرفك ولا حتى اقربلك... دا هما كانوا بيقولوى عليكى امى... ومش ده اللى موجود فى بطاقتى... وقالولى نيلك هو دمى... ودمى لونه احمر بمبى...وقالوا شمسك فى سمارى... وانا اصلا قمحاوى... واللى طولته منها لسوعت افايه... وقالوا شكلك فى ملامحى... وانا ملامحى مديه على هندى... وده من فضل مصر... وايه يفيد اللمون بعد العصر... ماتلاقيش مثالها... دا فيه احسن منها... دا ست كل عصر... الا هذا العصر... عشت جنب نيلها... واتهرا كبدنا من ميتها... تسوى الف قصر... ولا تساوى شوية كسر... وراحت عليكى يامصر...


السبت، أغسطس 01، 2009

بلاش تريقه...


فيه جزء مهم من شخصيتى انا مخنوق منه... ومضايقنى اوى ونفسى يجى اليوم واتخلص منه... الجزء المهم ده واللى عاملى ديما مشاكل هو نضارتى ايون نضارتى زى ما بقولكم كده... وهاحكيلكم على حكايتى معاها من اول خالص واحكموا انتوا بأه...


البدايه كانت فى سته ابتدائى لما سمعت عن النضارات اللى الحكومه بتعملها ببلاش تبع التأمين... روحت قولت فى البيت انا مش بشوف ع السبوره... امى خدتنى نروح نكشف... الدكتور حطلى قطره فى عنيا القطره اللى ما بتعرفش تفتح عنيك بعدها دى وبعدين قعدنى قدام اللوحه اللى فيها سيهات كتير دى... وقالى البتاعه دى مفتوحه منين يامحمد... ربك والحق انا كان نفسى اعمل نضاره فلما الاقى البتاعه يمين اقوله شمال ولو فوق اقوله تحت... وفى حاجه كمان لو الدكتور قال ان انا نظرى سليم مفيهوش حاجه ابويه هايضربنى فلازم اكدب(كدبه بيضا)... وعملولى نضاره سوده قعر كوبايه زى اللى محمود مرسى كان بيلبسها ايام زمان دى وكانت خنقانى جدا وكل ماجى ابص فى المرايا اتخنق واقول لنفسى وكمان جايب واحد تانى معاك... ودى النضاره الوحيده اللى كانت بتستحمل وما بتتكسرش... تانى نضاره عملتها النضاره العضم البنيه دى... ودى الحكومه كانت بتعاملنا ساعتها على انها اختراع وقالك اللى عايز ياخد النضاره دى يدفع 50 جنيه فرق... ودفعت الخمسين جنيه وجيبتها ويعنى الواحد كان شكله مقبول شويه وكانت بالنسبه ليا تغيير جذرى طبعا... وكنت مبسوط اوى...


بعد كده اكتر حاجه كانت تنغص عليا حياتى ان النضاره تتكسر... لان الدنيا بتبقى شيش بيش ساعتها... وده عادى ان النضاره تتكسر لكن فى مواقف نكته ما تتعداش كده ولازم احيلكم عليها... اول المواقف دى لما جيت انام زى اى بنى ادم حطيت النضاره على التربيزه اللى جنبيا... وصحيت الصبح ما لقتش النضاره فى مكانها قعدت ادور عليها وهاتجنن من التدوير... واذ فجأتا لقيت النضاره نحت رجلى مكسوره... ماهو الاخ شيش بيش...


تانى المواقف دى لما كنت بصلى فى الجامع وعادى بأه بكل براءه حطيت النضاره قدامى وانا بصلى... وانا فى لحظة خشوع عينى رأت ما يحزنها ويقهرها... عيل قطقوط صغيور جابها جرى من اليمين للشمال وطبعا داس ع النضاره وهو بيجرى... كان هاين عليا ساعتها اخده رهينه واهله يدقعولى ديه...ومن بعدها حرمت احط النضاره ع الارض وافتكست طريقه كدا وكنت بعلق النضاره فى عروة البنطلون ع الجنب اليمين...وأثبتت نجاحها فتره طويله...


تالت المواقف دى لما كنت رايح المنصوره وكان مشورا مش عادى وكنا فى رمضان ساعتها... بعد حبتين الشياكه والاناقه اللى الواحد متعود عليهم... اتوكلت على الله وخرجت من البيت وقولت لنفسى ياواد ما تعدى تصلى العشا وبعد كده تروح المشوار ده عشان ربنا يوفقك... دخلت اصلى وجه حاج كبير يصلى جنبى لابس جلابيه من اللى هيه واسعه اوى دى...والعبد لله بردك فى لحظة خشوع وطالع من السجود وفى نفس ذات الوقت كان الحاج نازل سجود... النضاره علقت فى جلابية الحاج واتفجرت تلاتين حته وأحدثت صوتا مدويا... خلصت صلاه وقعدت احسس وادور على الاشلاء المتراميه يمينا وشمالا وحسرة قلبى ما تتوصف (عشان المشوار طبعا كده ضاع)... والحاج كان لسه يعينى بيصلى وخاشع اوى ولما سلم راح سألنى سؤال وديع اوى هى النضاره جرالها حاجه يابنى؟ قولت لا ياحاج مفيش بس النضاره مش لاقى منها حاجه...


رابع المواقف دى بأه والسبب اللى خلانى اكتب البوست ده... ان انا ربنا كرمنى وغيرت النضاره من اسبوع كده... وكانت للاسف اغلى نضاره فى حياتى(بينى وبينك اتدبست فيها)... ويوم الاربع روحت اقابل جماعه صحابى كانوا بيلعبوا كوره... وانا طبعا مقاطع الكوره وحرمت العب كوره من زمان عشان انا حطمت الرقم القياسى فى كسر النضارات وانا بلعب كوره... المهم روحت وزى خلق الله هاتفرج وخلاص... بس بصراحه هى ما كانتش وخلاص انا قعدت اتريأ ع الناس... فواحد صحبى قالى انزل ورينا نفسك... فقولت انزل ياواد وريهم نفسك... ونزلت لعبت وانا حاطط ايدى على قلبى خايف لتتكسر... وماكملتش خمس دقايق وجيبت اخرى وهبط... وطلعت من الملعب والحمدلله النضاره تمام... لحد كده فل قام صحبى اياه قالى ماتنزل يعم ولا هى كده خلاص... قولت خلاص مبن يعم دا احنا جامدبن اوى انا جايللك اهو... ونزلت ويارتنى مانزلت فى ثانيه خدتلى كوره فى وشى كسرت العدستين... اتأهرت مش عشان النضاره اتكسرت لا عشان اغلى نضاره فى حياتى ما كملتش اسبوع...


طبعا انتوا شوفتوا المعاناه اللى احنا شايفنها وبنعانى منها لذلك انا بطالب باسم كل اللى لابسين نضارات بالاتى:

ماده واحد:نطلب من الصين الشقيقه تتصرف وتعملنا نضارات مش بتتكسر (وحياتك هايعملوه من الصبح)

ماده اتنين:يحذف لقب ابو نضاره من الكلام العام ويعاقب قائلها بلبس نضاره قعر كوبايه تلاتين سنه

ماده تلاته:يجب على نقابة الأطباء تسعير عمليات الليزر بحيث لا يزيد تمنها عن 50 جنيه فقط لاغير....


على فكره بلاش تريقه عشان ربنا مابيرضاش بالظلم ...سلام



الجمعة، يوليو 24، 2009

أنا مش عارفنى...


انا مش عارفنى... انا تايه منى... ولا قادر حتى اركز ولا عارف اعمل ايه فى همى... لا دى أحلامى ولا دى حياتى... ولا حتى دا اللى كنت ناوى على عمايله... هو ليه ده بيحصلى... هو ليه الدنيا كده بتلخبطنى... وما بتبطلش تناكفنى...وعلى طول بتيجى عليا... كتير اقول كفايه... ومش هاقبل تكون دى نهايه... بس برجع اخد على دماغى... واقول موافق وماله هو فى احلى من كده بدايه... وأقف مع نفسى وقفه... ولنفسى أحط خطه... واحد اتنين تلاته لحد سبعين خطوه... عملت اول خطوه... وكسلت شويه فى التانيه... وطنشت اعمل التالته... وشكيت فى نفسى فى الرابعه... وقولت اكيد انى غلط غلطه... انا هابدأ من الاول واحط لنفسى كمان خطه... وادينى مقضيها خطط ولا بتقدم حتى زأه...


متحير ومش عارف اخد قرار لنفسى... وقولت اسال الناس وياريتنى اعتمدت على نفسى... واحد يقولى اتوكل على الله وجرب... والتانى يقولى لا اوعى حرام عليك اوعى تجرب... والتالت لا هو مفيش احسن من الاتجاه اليمين... والرابع يقولى لا يعم سيبك من الناس دى واحود شمال وطوالى على طول... يعنى هو مفيش احسن من الكلام... وحياتكم هى مش ناقصه لخبطه... على اساس ايه بتقولى اطلع يمين واحود طوالى... والنبى هى مش طالبه فهلوه... ويقولك دا انا احلهالك بصباع رجلى الصغير... دا انا امشيهالك وانا قاعد بالشورت بتاعى القصير... على طول كده هانفضل نتفلسف... ونعمل فيها ورك نمله... وننصح الفين نصيحه... ونقدم سبعين مشورة... من غير خبره ولا حتى حكمه... ما يروح يعم فى الف غرقه...ماهو اكيد هايجرب وهايتعلم...


طب ما بدام كده انا بسألك من الاول ليه... وواجع دماغى معاك ليه... طب من الاول قولى انا مش عارف حاجه... اتوكل على الله وصلى استخاره... واسأل ربنا المشوره... وجرب مره والتانيه والتالته وان شاء الله ربك هايبعتلك الهدايه... للى فيه مصلحتك وكمان هايكتبلك البركه... واتوكل عليه ومن يتوكل على الله فهو حسبه... وسيبنى بأه اخد قرارى بنفسى... ماتلخبطنيش بأه وماتخوفنيش وماتنكدش عليا عيشتى...


عمرى ما عرفت اخد قرار لنفسى... ولا حتى اتعملت اخد القرار ازاى... وكل ما اخد قرار امسك ورقه وقلم... واقعد احسبلها من كل الاتجاهات... واقول لو الناحيه دى هاتمشى ازاى.... ولو الناحيه دى هاتمشى ازاى... واتأكد من كل حساباتى... واختار الاتجاه الاتى... اللى كل الحسابات ماشيه معاه... واقول يالله هى ورزقها...وان شاء الله مش هاندم... ومايعديش شهر والاقى نفسى ساقط حساب...وبدأت اقع فى بئر الندم... والاقى الناس اللى كانت بتقول شمال... بتقول انته ليه يعم ما روحتش يمين... انته مشكلتك انك اتنطت على اليمين... مع انها كانت حلوه وفرصه ما تتعوضش... الله اما انته يعم قولت روح شمال... اه ما انا والله لقيتك عايز تروح شمال... فقولت كلامى مش هيأثر معاك وعشان كده قولتلك روح شمال... وعشان كده اتعملت لو اتقالى روح يمين هاروح على طول شمال... وكبارنا قالوا زمان... شور الست واعمل العكس وانته ديما تبققى فى امان...


وهى دى المشكله لا انا عارف اخد قرار لنفسى... ولا حد عارف ينصحنى... وكل يوم ليلاتى... افكر فى اللى اتى... واقول يامين ينجدنى... يارب يامجيرنى اهدينى وساعدنى... وصبرنى على ايامى... وابعتلى حل لحيرتى... اوعلمنى ازاى اخد باسبابى... واقدر اواجه مشاكلى... ولااحتاج ابدا ابدا ابدا لحد يلخبطنى... يارب امين

الاثنين، يوليو 06، 2009

إنتحار فيروس (2)...


قعدت أفكر أحلها إزاى دى... لحد ما عينى وقعت على اتوبيس مترشأ ناس روحت جاى ناطط فيه... يعنى قولت اعوض الايام اللى فاتت اللى الواحد ضيعها مع الموزز... واطلعلى بلكشة اصابات مره وحده... ولقيتلك الناس دى حالها يصعب على الفيروس بتاع الطيور... وعرق ونتانه وريحه تقرف دا انا كنت هاتخنق من البخور اللى فى الجو والبهدله دى وما عرفتش اعمل ولا حاله... واتسدت نفسى عن الشغل وخدت ديلى فى اسنانى وشبط مع اول واحد نازل من البرميل ده قصدى الاتوبيس ده... وقولت بأه زى ماتيجى هى ونصيبها وطلع الواحد ده رايح يركب المترو...


ونزل السلم والدنيا بدأت تدى على نضيف كل ما تنزل تحت شويه... والى حد ما فيه نظام موجود رغم الزحمه قولت أيون كده الواحد يعرف يشتغل واعصابه مرتاحه... والناس كتيره اهى وربنا يسهل ونقدر نعمل سكور... واول ما ركبنا المترو نفشت ريشى كده وفردت سدرى أوى عشان شوفت اتنين خايفين منى وحاطين كمامات على بؤهم... حسيت ان دى بشرة خير... وفضلت بأه اتنقل من واحد لواحد ومن واحده لواحده ومن طفل لطفله... والدنيا هوس ومفيش اى تأثير ولا كأنى بعمل حاجه... ياجماعه ياللى هنا حد يعطس او يعمل أى منظر طيب..! اللى عامل العطسه بتاعته فايبريشن يفتحه... سايق عليكم النبى حد يجبر بخاطرى..؟ مفيش أى همسه ولا حد حاسس ان فى فيروس خنازير فى وسطهم... الناس مسطوله..! هو فى ايه..! ياناس ياهووو..؟ انا هاتجنن ايه الناس المتيسه دى..!


وفى وسط الحيره دى لقيتلك واحد بيقول لصاحبه سمعت عن البتاع بتاع الخنازير ده(خنزيره:أنا أنا على مناخيرك اهو يعم)... دا بيقولك جه مصر وهايلبسوا الناس كلها كمامات(خنزيره:يعنى هو فارقه معاكم)... صاحبه: خنازير مين يعم هى هاتفرق وبدام ملوش دعوه بالفول يبقى مالناش دعوه(خنزيره:صح الكلام)... يجى مصر ما يجيش مالناش فيه... الواحد:فول مين ياعمنا ببقولك انفلونزا يعنى شم يعنى استنشاق.... صاحبه:ماهو برده مش فارقه ياباشا احنا بعون الله الهوا بتاعنا موجود فيه عوادم ورصاص ودخان وثانى اكسيد الكربون وبلاوى سوده وكمان فيه اكسجين اه والنبى موجود بس بيحى خميس وجمعه... يعنى ياباشا من الاخر الفيروس اللى امه داعيه عليه وشايف نفسه يجى يطير عندنا ويورينا نفسه...احنا الفيروس اللى يجى عندنا يبقى واحد مننا(خنزيره:الله يسترك ياأصيل)... ياحبيبى احنا الرئه بتاعتنا مش بتدور الا بالبنزين... جاز وسخ ماشى... تقوم تقولى حتة فيروس هيأثر معانا(خنزيره:ليه كده ما انته كنت حلو)...


خنزيره:و الله يأستاذ وماليك عليا حلفان اول ما سمعت الكلام ده عرفت انا ليه لحد دلوقتى مش مأثر فى الناس دى وماعملتش ولا اصابه فى وسط الناس الغلابه دول... أولا عشان كفايه عليهم اللى مستحملينه دا انا هيست وما عرفتش اشوف شغلى وانا بقالى معاهم كام يوم بس... تانى حاجه احنا معظمنا بيجى مع المسافرين اللى جايين من بره والناس دى اخرها لو سافرت هاتسافر جمصه.... تالت حاجه الناس دى بتاكل فول اللى احسن من ميت تاميفلو... شوفت بأه يابيه حظى..؟ أهو انا دلوفتى حيران اروح لمين واجيب شغل فين..؟ الناس الاغنيا والموزز اللى كنت قاعد عندهم بعملهم الاصابه من هنا وياخدوا تاميفلو من هنا... ويقولك تماثل للشفاء يعنى ولا كأنى عملت حاجه... والناس الغلابه معاهم انتىفيرس ضد التاميفلو جاهز... زهقت من الدنيا يابيه وعشان كده بفكر انتحر ... او بأه لو تعرفلى حد مسافر ليبيا ياخدنى معاه أهو أجرب حظى هناك... يإما أعرض على الطاعون نشتغل مع بعض ونعمل كابل... يإما أعمل هجره غير شرعيه لإيطاليا واهو الواحد يعرف يسلك مع الإيطاليين احسن من اللى مش عارفلهم تركيبه دول...