أحب أن أوضح لك حدودنا المصرية مثل ما درسناه فى كتاب الجغرافيا بالضبط -أصل كده والله أعلم ما عندناش المستندات اللى تثبت حدودنا بس عامة ده اللى استلمناه بالبوء كده من اجدادنا و أى زيادة تبقى ضمن مستعمراتنا- فيحدنا شرقا البحر الأحمر حيث الغردقة وشرم الشيخ والسياحة وادب السايحة... وغربا ليبيا حيث على بوابتها يستقبلونك بالمثل الشهير (رايح فين ياتييييييييت ياما هنا ياما هناك)... وشمالا البحر الأبيض المتوسط حيث عروسة البحر الابيض المتوسط ومطار برج العرب لو مسافر الكويت ولا حاجه... وجنوبا السودان ولكن خلى بالك أن حلايب وشلاتين مصريه ميه الميه حيث أن السودان بتستهبل اليومين دول وبتقول أنها بتاعتهم وإحتمال يخدوها عشان هما بيطلبوها بعين جامده شوية فالظاهر معاهم حاجه تثبت أنها تبعهم وإحنا مش معانا اللى يثبت كلامنا فانا بقولك كده عشان تبقى ترجعوها انتوا بقى لو خدوها مننا...
ويحدنا من الشمال الشرقى شبة جزيرة سيناء والتى إستطعنا إستعادتها من العدو الصهيونى فى حرب 73 فى معركة من أعظم معارك التاريخ وتم تنميتها وبناء المنتجعات السياحيه بها وتأمنيها بأعلى معدلات الأمان العالميه لذلك يتوافد عليها السياح من جميع أنحاء العالم -وخاصة الروسيات- وذلك لشعورهم بالمتعه والترفيه والأمان -أمال إيه مش بلد الأمن والأمان وعايشين فيها ياخويا وكأن البلد بلدهم واحنا اللى غرابه ومفيش مصرى بيعرف يعدى من كمين الا ولازم يتفتش ويطلع بطاقته- وللعلم أخى العزيز الى الأن ما زال يتاح لنا دخول شرم الشيخ أو طابا بالبطاقه زينا زى أى واحد إسرائيلى ولكن الفرق هم يدخلونها للترفيه ونحن ندخلها للبحث عن فرصة عمل مثل دول الخليج بالضبط فاذا حاول الصهاينه الإثبات لك أنها تبعهم وإحنا كنا مأجرينها منهم لفه... واللفه خلصت خلاص ياكباتن فلا تصدقهم...
و يحدنا من الشمال الغربى مارينا والساحل الشمالى حيث الترفيه والبلبطه فى انضف مصيف فيكى يامصر... حيث المدينة التى يلهث على ذكر اسمها 90% من المصريين المنتفعين بهذه البلد... حيث الناس المستريحين والذى يُعرفون فى قواميسنا بالحراميه -لفظ يطلق على اى حد معاه فلوس سارق مش سارق دى مش قصتنا- حيث التتنيح والاذبهلال وارتفاع الضغط وسب هؤلاء الحرامية وربما سب البلد بحالها عند رؤية تلك المدينة بهؤلاء البشر الذين يسكنونها... حيث لا يصدق واحد فقط من ال 90% ان هذه الاماكن موجوده اصلا... حيث يقفز الى الذهن مباشرة مصيف جمصة والحسرة على الزمن...
ولكن فى الحقيقه ياصديقى فنحن حدودنا الفعليه تمتد شرقا لتغزو دول الخليج بالكامل سعوديه وكويت وامارات وعمان وقطر واى بلد فيها فلوس او مافيهاش بردك زى لبنان كده وتمتد غربا الى ليبيا وذلك من اجل التزويغ شمالا عن طريق البحر الى ايطاليا والتى تعرف انها بوابة النعيم الى بلاد الاتحاد الاوربى بالكامل حيث الحياه الكريمه وبلاد حقوق الانسان...
14 ســــــــايق عليك النبـــى تجبر خاطرى بكلمتين...:
يا جامد يا محمد
بأمانة مكنت مبتسم طول البوست
معرفتش ان انت كمان متقدرش تمشى فى شرم و انت شغال فيها إلا بكارنيه من أمن الدولة
و سلملى على المواطن المصرى فى كل مكان
فى الخليج او فى لبنان
(:
احكيلك على قصة حصلتلى فى شرم
كنت راكب فى ميكروباص وورايا اتنين اجانب وقفنا فى الكمين والظابط طلب من كل اللى موجودين البطايق ماعدا الاجانب
وجه عندى وقالى فين تصريح الامن اللى معاك
قولتله نعم حضرتك عايز ايه
قالى فين التصريح اللى معاك قولتله حضرتك انا مش فاهم بس انا مش معايا الا البطاقة اللى مع حضرتك والكارنيه بتاع الشغل
فبص فى الكارنيه والبطاقه لقى مهندس هنا وهناك سألنى كام سؤال وسابنى امشى
وبعد ما مشينا كنت زعلان اوى صاحبى قال انته زعلان ليه كده
قولتله ياخى شوفت الغلاسه اللى كان بيعاملنى بيها مع ان الاجانب ولا طلب منهم اى حاجه هى البلد بتاعت مين بالظبط مين اللى المفروض غريب فيها
شوفت يعم
شوف انايمكن الحمد لله خلال سنين شُغلى فى شرم محصليش موقف مُشابه
بس مع زمايلى و بكون معاهم بجد بيتحرق دمى
علشان كدة الأجنبى اللى بيحس نفسه ولا بيشوف نفسه عليا بظبطه صح
ولا يهمك
اهو ربنا تاب عليك من هنا (:
عقبالنا يا رب
آخر نكته قريتها لصديق على الفيس بوك
إن الرئيس استلم الحكم وعددنا كان 40 مليون
دلوقتي احنا 80 مليون
يعني بيحكم دولتين!!!
:)))
معذور بقى احنا مواطنين فوق الحاجة
وملناش لازمة عندهم م الاخر
فالسعودية السعود رقم واحد فالمعملة يعني احسن معاملة ولو الرادار لقطة واول كمين اتمسك فية بتاع الشرطة يشوفة يعدية ولا كان حصل اي شيئ ... الاجنبي بقي لو ماشي بسرعة 121 يتمسك ويتعملة مخالفة وفي اي مصلحة حكومية السعودي الاول انما الاجنبي درجة تانية سبنسة..انت عارف ان انت لو سعودي مات تدفعلة فدية 120 الف والمصري والسوري والبناني 100 الف والهندي والبنغالي 80 الف .. شوف ازاي
ربنا يبعدك عنهم ويتوب عليك وتترحم من البلد بنت التييييييييييت دى ياريس
ماهو كان ماسكها ماكانش معاه فلوس دلوقتى بقى احنا اللى مش معانا فلوس
:)
نورتينى ياهدى
وائل
اليمن اليمن اليمن
:)
ماتحاول تتجوزلك واحد تديك الجنسية السعودية واهو تمنك يزيد شوية من 100 ل 120 الف
:)
ربنا يحمي مصر وشعب مصر ..
هو كله بيبص على كله
حاجه تخنق والله
:(
..............
وفكرتني بالجغرافيا وأيامها والله
:)))
اولا اسفه جداجداجدا........جدا
على عدم المتابعه بس انتا عارف بأه الدنيا بتبعدنا تبعدنا بس المهم ان احنا بنرجع تانى وادينى اهو رجعت نورت المدونه تانى هههههه
بص ياسيدى انا بقالى حوالى ساعه او اكتر قاعده اقرا الحاجات اللى فاتتنى وعاوزه بجد احييك على المجهود الرائع فى الكلام عن حرب اكتوبر لانك فعلا عرفتنى معلومات لم اكن اعلمها
وعجبنى اوى البوست بتاع بلدكم الحبيبه العظيمه "كفر العرب"بس ياعم مش كنت تقول كلمتين كده عن ميت نابت الغلبانه دى ولا انتا كمان شايفها تل ابيب
الكتاب بأه شكله كده ظريف وكنت بضحك جدا وانا بقرأ
فى انتظار البقية
ودومتم فى رعاية الله وامنه ههههه
سلام
غادة
نورتينى جدا جدا ياغادة وبالنوسبة
وهو طبعا انا فاهم كويس ان كله بيبص على كله بس المصريين اكتر ناس بيبصوا على فلوس الخليج
ربنا يفتحها على كله
وانا اسف انى قلت اليمن دا بس من باب الضحك مش اكتر انتوا ناس لذيذة والله كنت قابلت واحد من عندكم فى المترو اتعرفت عليه وطول ما احنا فى المترو ما بطلناش ضحك
ربنا يكرمك يارب ونورتينى
مرمر
حمدلله ع السلامه ياست هانم
احنا هانفضل كل شوية نقدم اعذار كده ولا ايه
وبالنوسبة لموضوع ميت نابت مش انا قلت كانت القرى المجاورة تحسدنا على دفئنا اللى هو انتوا يعنى واحنا مش عايزين نسيح ونقول ان احنا بالنسبالكم ميونخ
بس واضح انك اتغيرتى كتير
بقى فيه لم اكن اعلمها
ومدمتم فى رعاية الله وامنه
لا كلام كبير
وزى ما انتى قولت نورتى المدونة طبعا
على فكرة بقى الموضوع ده بالذات عجبنى بس كنت خايفه تغلط فى راس البر ساعتها كنت هريحك من كومنتاتى كلها
يسلم قلمك يابشمهندس
منى
لا طبعا ما اقدرش اغلط فى راس البر ولا حتى دمياط الجديدة
دا كفاية الليلة اللى قضيتها فيها وعملت حادثة اخر الليلة دى
:D
إرسال تعليق