حبيبتى أم الدنيا...
أنا بعتب عليكى وعايز أشتكيلك.. أصل أنا خلاص فاضت بيه وصعبت نفسى عليّا..والحزن مالى عنيّا والفراغ هايقتلنى... ما أنا لما كنت بسمع عن البطالة اللى زادت كنت بقول دول مش عايزين يشتغلوا.. دول الناس اللى اتعلموا وهما مش عايزين يتعلموا.. دول اللى كان بياخدوا الشهاده وهما مش عارفين هما اصلا ليسانس ولا بكالوريوس.. دول الناس اللى معاهم ما كانتش فارقة النهارده زى بكره.. لكن إحنا إيه ذنبنا إتعلمنا وعمرنا ما قصرنا.. وليل نهار مذاكره وما قولناش مش عاجبنا.. وأعلى الدرجات والتقديرات تعبنا وآدينا جبنا.. ولما قولتى ولادى قولنا فدائى فدائى أفديكى بدمائى ومكتوب ونصيبنا.. وبعد كده لفينا فى شوارعك وحواريكى وطلعنا ونزلنا.. وأخرتها إترمينا على أهاويكى ومفيش عندك شغل وزهقنا...
ياأم الدنيا هو إحنا قصرنا فى إيه..؟ عمرنا ماقولنالك إنتى ساكته على ظلمك ده ليه.. ولا سايبه حكومتك تعمل فينا كده ليه.. ولا عمرنا مشينا فى مظاهره.. ولا لعنا الارض الطاهره.. ولما بنتثبت فى كمين بنطلع البطاقة ونقول آمين.. ولا قولنالك ليه القطر بيتحرق والطياره بتقع.. ولا ليه الزيت بيغلا والغاز بيتسرق.. ولما الحديد ولّع قولت هاسكن ومش بانى.. ولما عمل زيه الدهب قولت كفايه دبله وتغور الأمانى...
ياأم الدنيا دا إنتى بأت أرخص حاجة فيكى المرض والعلاج بأه غالى.. والأكل الملوث إتفرض وقال الجسم آه وآه آه يانى.. والخير والقلب الطيب إنقرض والشر والقلب الجاحد علينا بأه جانى...
ياأم الدنيا لمى عيالك فى حضنك ووصى الكبار علينا.. الكبار اللى زمان رضعوا من سدرك ودلوقتى بيسرقوا فينا.. ياأم الدنيا دا احنا كل اللى عايزينه منك مش غير إنك تقدرينا...
ياأم الدنيا إلحقينا دا إحنا محركاتنا لسه ما عملتش ولا كيلوا.. ولو السفر فتح بابه صدقينى مش هانرجع تانى.. ولو بعد ما سافرت صرختى وقولتى إلحقنى ياولد..؟ هاقولك نعم..! بقى أنا أرجع وأتزل تانى.. أنا مالى خلى حاميكى يسرقك.. والمطافى تحرقك.. ومستشفياتك تمرضك.. وجيشك يقتلك.. والأمريكى يجى يقول دى أمى.. والأنجليزى يقولى دى حضارتى.. والصهيونى يقول دى بلادى وأرض ميعادى.. بس خليكى فاكره إنتى اللى قسيتى علينا.. وإحنا اللى ولادك جوعتينا.. ونصرتى الحرامى علينا.. ومشيتى فى سكه غلط.. والظلم علينا إنخرط...
ياأم الدنيا دا احنا بقالنا كتير بنضحك والدمع جوه عنينا.. ولما بنتسأل بنخبى ونقول هاتفرج وطلع العيب مش فينا.. مع كل إحترامى انتى خدتى مننا كتير فيها إيه لوجيتى على نفسك يوم و ادتينا.. أصل هاخد أهلى وصحابى وجيرانى وناسى و نمشى وماتبقيش بأه تلومينا...
الباحث عن الصفر
10 ســــــــايق عليك النبـــى تجبر خاطرى بكلمتين...:
عارف يامحمد من وانا صغير ومصر دي بجد حاجة كبيرة اوي في نظري ( امي يعني زي مابيقولوا ) بس مش عارف ليه والسبب ايه ان كل مانا اكبر هي في نظري بتصغر ربنا يسامح اللي كان السبب ........
بس عارف ياحجاز في وسط السواد ده انا شايف نور جي من بعيد
وعموما ياسيدي الليل لوصار طويل اكيد من بعده صباح وشادية وورده وحماقي .........هههههههههه
المقال جميل أوي و معبر و انا عم نفسي كان عندي نفس الرأي في الناس اللي قاعده من غير شغل انه ده كسل منها بس مع الخبره أكتشف انه فيه ناس ربنا بيكرمها بشغل بعد مده قليله و تعب بسيط و فيه ناس ربنا بيأخر رزقها علشان يشوف سعيها و صبرها بس في الآخر كل واحد من الأتنين ربنا بيرزقه
فهنيئا للمتوكلين
ملاحظه : بس يا ريت بلاش كلمه "سايق عليك النبي"
أحمد بيه فرحات
وانا بقول ليه الكهربا قاطعه عندنا طول النهار اتارى النور جاى وانا مش عارف...هههه....مالناش غير اننا نقول يارب
شيماء
علم وتم التنفيذ وانا متشكر على الكومنت الجميل ده وأكيد طبعا ربنا هو الرزاق واكيد ف الاخر"ان الله لا يضيع اجر من أحسن عملا"
ايه يابنى التوبيك الجميل ده شاعر ياولاد...وماتقلقش يابنى والله هاتحلو والدنيا هاتبقى تمام وربنا هايكرمك ان شاء الله وهاتفتكر الايام دى وهاتقعد تضحك عليها ..وقول يارب
الموضوع يا محمد و المشوار طويل فين عل ما الكلام ده الناس تقرؤه و امتي هيحسو بيه وامتي هيعملوا علي انهم يحسنو من وضع البلد .انا متشكر جدا انك فكرتني بالحاجات اللي كنت ناسيها لكن للاسف اتمني لو انساها تاني .
"لا تقاس العقول باالاعمارفكم من كبير عقله هاوى فارغ وكم من صغير عقله بارع مثلك"...الموضوع ده جميل جدا وفعلا فكرتنا بحاجات كنا نسينها او بنحاول نتناساها عشان مانتعبش من التفكير فيها...جميل اوى ان احنا نفضفض بس ياريت حد يسمعنا ويريحنا...ف انتظار المزيد وياريت ما تغبش علينا با المواضيع الجميله دى.
كويس يا باحث عن الصفر على الله تكتب موضوع عن الصفر ويا ريت تاخد بالك من اصفار كتير فى حياتنا وطبعا اخرهم صفر المونديال بس عللى فكره الموضوع بتاع مصر لممى ولادك ده ما يمشيش معانا خالص وانا بكلمتا معانا يعنى احنا المصريين لااننا للاسف اجدع ناس تاخد ولا تديش الا الغريب يعنى تجيب واحد اجنبى يعمل الحاجة تديله عينيك ليه على متعلم بره " صله خواجة" لكن لو واحد مصرى مهما كان علمه هتديله على قفاه اصله مصرى وتبدأ بقى الاعزار هوا عمل حاجة دا يا عم انا اعملها بصبعى الصغير وكلام من ده معلشى والله انا مش عارف انا كتبت ليه الكلام ده بس مكسل امسحه على العموم بلوج هايل وابقى متعنى بكلامك بقى فى موضوعات بعد كده سلام
هذه هى عظمة المستقبل، وروعة قراءة ومعرفة التاريخ... عظمة المستقبل فى أنه يخبئ دوماً مالا تتوقعه... وروعة معرفة التاريخ، أنه يعلمك أنه ما من دوام، وان ظلام اليوم كان يكون مقدمة لبهاء الغد، فأشد اللحظات ظلمة فى الطبيعة هي التي تسبق ظهور الشمس، وما ترونه حولكم هو تلك الظلمة... الظلمة التى تسبق الشروق..
ومن يخاف الظلمة ، ويفر منها، ويصيبه الذعر من مواجهتها، لن يرى النور أبداً، أما من يواجهها بأمل، وينظر الشروق، فسيفوز بالضوء كله فى النهاية، وسيدرك أن بكرة أحلى حتما من النهاردة...
الموضوع جامد جدا يا بشمهندس وواقعى ومعبر بس احب اقوللك ان شاء الله الامورهتتحسن وهتبقى تمام ان الله مع الصابرين بس امانة عليك لو سافرت متنساش اخوك العبد لله وانا معاك فى اى حتة
ماعنديش كلام اقوله غير الموضوع الاخير اللى انا كاتباه"عاجبك حالنا"
إرسال تعليق