تعريف الصفر...
يعتبر الصفر أشهر الاعداد وأكثرها أهمية وأشدها روعة.. إذ بواسطته يستطيع أى عدد صغيورعنده طموح من الاعداد التسعة أن يبدأ حياتة ويكون نفسه.. فمثلا العدد 9 بمساعدة اول صفر تبقى 90 ولو شدت حيلها شوية وقلبت رزقها من هنا شوية ومن هنا شوية من ده حتة ومن ده منحة تبقى90000 ياقطة وربما 9000000.. شوف بأه لو استثمرتهم ف البوسطة يعملوا كام؟ ...ربنا يخليك لينا ياصفر ...
وعشان كده انا قولت ما بدهاش بأه وأنا لازم أعمل واقفة من اللى هى وأدور ع الصفر ده فين ..مش كفاية ضيعت 24 سنة من عمرى منهم 18 سنة تعليم من غير ما أستغل ولا صفر فيهم.. يعنى تصور احنا عندنا فى كل سنة متوسط 6 مواد لو جيبت فى كل مادة فيهم صفر.. يبقى أعملى فى السنة 6 اصفار (1000000) أضرب بأه فى 18 يطلعلك (18000000).. أه ممكن نقول نصهم (9000000) دروس خصوصية وكورسات ( مع انى انا ماكنتش باخد دروس كتير يعنى المفروض فيه توفير ).. وممكن تقول كمان (3000000) كتب وكشاكيل وجلاد وتكت وأستيكة ومسطره ولوح وقلم رصاص روترنج وتصوير ورق والاشتغالات دى ..وكده يتبقى (6000000) أشوف نفسى بأه لبس وأكل وكده ..أيه ده أيه ده دا كده الواحد مش هايتبقى معاه حاجة وكده هايضطر يشتغل.. لأ يبقى المفروض يزودوا المواد شوية.. ويعملوا لكل مادة صفرين صفر عشان الامتحان وصفر عشان جيبت صفر فى الامتحان اللى اتعمل.. ماهو مش معقول كده يعنى ياجماعة تركيا تدخل موسوعة جينس عشان فى الامتحانات المؤهله للثانوية العامة فيه خمسة وستين الف طالب جابوا صفر وف نفس السنة بردك فى نتيجة الثانوية العامة 33000 طالب جابوا صفر.. يسلام ياولاد هى دى الطلبة ولا بلاش.. شوف بأه الواحد منهم عامله كام فى السنة دى.. أتاريها ماشية معاهم ومتقدمين عننا وهاتلاقيهم خطبوا يابختهم.. ياااه لو الصفر يقف فى صفى شوية الدنيا هاتتملى اصفار وهاتلعب ياحمااااده ...
يعنى تصور لو الصفر استجدع معايا شويتين.. دا انا هاخطب وأعزم العيال اصحابى فى كوكدور وأجيب موبايل ان 81 وماعدتش هاركب سيرفيس.. وعشان كده ياجماعة انا قررت أعمل البلوج ده عشان اعمل إعلان عن الصفر وياريت تساعدونى ف البحث عنه.. ومجدعة منى وكلمة رجالة ومن غير ندالة من دلوقتى هافتكركم وهاظبتكم ...
خد عندك بأه
"ياولاد الحلال حريقة ع الجسر قصدى عيل تايه إسمه صفر وشكله كده مقلبظ ومدوركده وحليوه اللى يلاقيه يجيبه وما يصهينش عليه/أصل الواد ده مورزق ابن سعديه اللى يتعتر فيه ويدخله بيته بيتفتحله باب الرزق ع طول وتنغنغ معاه وهايخطب/كبدى عليها امه سعدية مته مته مته "حشتفه " من يوم ما الواد تاه وغلبانه يعينى ومكسوره وبتركب سيرفيس الجامعة وبتتخانق ع الشلن الباقى من ال30قرش كل يوم الصبحية وهنيالك يافاعل الخير والاجر والثواب على الله"
الباحث عن الصفر
7 ســــــــايق عليك النبـــى تجبر خاطرى بكلمتين...:
علي فكرة العيل اللي بتدور عليه ده انا قبلته في اعدادي هندسة في اول امتحان رسم هندسي بس من يومها مش قبلته تاني
عموما يامان الموضوع خطييييييييييير ومحتاج فعلا للوقفة اللي هي دي ........
احمد فرحات
احمد عبدالغني
تصدق انا قبلته مره بردك فى اعدادى وفى الرسم كمان شوفت بأه ياريتنى عملتها كتيير
انت بكلامك دة هتخلينى اغير رايى واحاول اقعد فى رابعة كمان سنتين واروح كلية تانية اقعد فيها ولو ست سنين واهو الواحد بردة يامن مستقبل العيال
هايل يا محمد كنت هنسى الواد اللى انتى بتقول علية انا شوفتة وراء المدرسة الابتدائية
تسدق فعلا ان كنت غافل عن الموضوع دة خالص دة علي كدة الدكتور بكري كان بيدور علي مصلحة الطلبة واحنا مش داريانيين. بس المشكلة مش انك تحصل علي الصفر المشكلة انك تحصل علي الرقم اللي جانبة ياباشا
جميلة جدا يمان بس هو بصرف النظر عن العزومة اللى اكيد كلنا مستنييها بفارغ الصبر والاقلام الرصاص اللى كانت بتضيع او بتقع تصدق انت فكرتنى فرحات كان معاة قلم واخدة من اخوة لما كان فى اعدادى وقعد معاة بتاع كذا سنة تفتكر القلم دة لسة موجود اكيد موجود .الدنيا يبنى هتضحك واللة بس احنا اللى مستعجلين شوية حبة صبر وهنلاقية الصفر اللى تاية دة واحتمال نلاقية ومعاة قرايبة اللى انت عمال تجيب فى سيرتهم بالباطل لتانى مرة حبة صبر
كلام جميل كلام معقول .......... مقدرش حاجة تانية
يا رب اللي جاي يكون احسن ونشوف ونسمع عنك اخبار كويسة وربنا يوفقك
ياحبيب قلبى هو انتة لسة بدور على الصفر طيب اعمل حسابى معاك فى صفرين والنبى واحد لية وواحد لعمار
اية الحلوة دى يابنى الهن ما تنساناش فى العزومة بتاعة كوكدور الا انتة ها تعملهاوربنا يو فقك
إرسال تعليق