سيدى/الجنيه الفضية الجديد ...
تحية طيبة وبعد....
يؤسفنا انا نبلغك بأنه غير مرغوب فى تواجدك بيننا... حيث أنك ياسيدى حظيت بشعبية جارفة من المواطنين الذين يرفضون التعامل مع سيادتك (رجالة ونسوان)... معللين ذلك بأنك ما بتعمرش فى جيوبهم لا إما بتقع لاإما العيال الصغيرة ولاد أختى بيستالئطوك من جيب البنطول بدل ماكانوا بياخدوا ربع جنيه...وكده أو كده يعتبر إهدارا للمال العام حيث كل مواطن بيقع منه نص مرتبه والنص الباقى العيال ولاد اخواتهم بياخدوه ...هذا وقد رصدت مصادرنا أكثر من حادثة فى جميع أنحاء المحروسة تؤكد ذلك الرفض...حيث تؤكد المصادر الأولية أن شعب المنصورة الباسل يحقق أعلى نسبة إعتصام عن التعامل مع سيادتك والامتثال لأوامرك وبالذات فى السيرفيس... فلو أخطأ مواطن وطلعك من جيـبه عشان يحاسب فإنه بذلك قد أعلن الحرب على نفسه تلك الحرب متمثلة ف مشادات كلامية وممكن توصل لحد الضرب والذى يهدف إلى زعزعة الإستقرار ف المنطقة... وقد استطاعت مصادرنا من رصد الواقعة التالية مما يؤكد صحة الخبر...
الزمان .../1/2009
المكان سيرفيس الجامعة -الترعة-جديلة جديلة جديلة
أبطال القصة تلاتة من الزباين منهم اتنين مكومين فى الكرسى الرابع ورا مع ان فيهم واحد طخين والتباع والسواق والجمهور بقيت الناس اللى راكبة يعنى يطلعوا حوالى 19 شخص وشخصايه والعربية اللى راكبين فيها ميكروباظ موديل 41 متهيألى هتلر جه بيها مصر وإتقلبت منه عندنا ...
التباع/الأجرة ياستاذ...
الزبون/ خد تلاتة من الجنيه...
التباع/إيه ده ياستاذ بقولك الأجرة...
الزبون/إيه يعم هو ده مش جنية ولا إيه..ولا إنته مستصغره يعنى...
التباع/لا ياستاذ ده مابيمشيش ...
اللى كان مع الاستاذ/مين قال كده..؟ هو صحيح مالوش رجلين بس بيمشى...
التباع/خلص ياستاذ هات الاجرة والنعمة دى (قصده الفلوس الورق مش الفضية اللى ف إيده) أنا معايا عشرين جنيه فضية مرميين على التبلوه (ملحوظة التبلوه ده على حسب ما شوفت الشلن بجلالة قدره ما يقدرش يصلب طوله عليه)...
السواق/ولا ياحمــــــو فى إيه عندك..؟
التباع/لا ياسطى سيبلى الموضوع ده مالكشى دعوه بيه أنا قادر عليه..لو سمحت ياستاذ الاجرة ولو ما معاكشى مش مشكلة...
الزبون/لا يعم معايا كتير خد اجرتك أهى ومعاك الشيماء...
التباع/خلاص ياأستاذ شكلك ما معاكشى مش مشكلة عادى...
الزبون/مامعاكشى ..! طب معاك الشيماء بأه...
(فى هذة اللحظة.. السيرفيس يتوقف ف محطة الشيماء والاستاذ بدأ ينزل هو وصحبه والتباع راح يجرى عليه قائلا/ايه ياستاذ الاجرة يعم...
الاستاذ/مش انته بتقول ما معاكشى..انا بأه ياسيدى مش معايا غير الجنيه ده...
التباع/ماتخلص ياستاذ هات الاجرة خلينا نشوف شغلنا هو كل يوم الأرف ده يلعن ام الجنيه ده ياجدع...
اللى كان معا الاستاذ/هات يعم الجنية ده اللى عاملك أزمة (وحط إيدة ف جيبة وطلع جنية فضية بردك بس جديدة شوية وعطهوله)...
التباع/إيه ده ياستاذ هات يعم دا زباين بنت تييييييييييييييييييييييت وجنيه ابن تيييييييييييييييييييييييييييت جايبلنا وجع دماغ كل يوم نتخانق ونسب لأم الزبون إطلع يعم إنته كمان...جديلة جديلة جديلة..
من الواضح سعادتك انك تنال الشتائم وعدم الرضا من المواطنين لذا فنرجواك ياسيدى ان تتنحى عن منصبك رحمة ورأفة بنا فلقد طفح الكيل بنا قبل ما تعمل زيك الخمسة والعشرة جنية وبقيت العيلة ودول بأه أرصتهم هاتوجع أوىمش هايبقى فيه مرتب أساسا ...فلقد أحببناك وأنت ورقيا ....بليـيـــــــــــــــز إرحل عنا....وإرحمنا بأه كفاية السنين اللى فاتت...
الباحث عن الصفر
9 ســــــــايق عليك النبـــى تجبر خاطرى بكلمتين...:
بجد موضوع العملة دا موضوع فاشل زي حاجات كتير فاشلة في البلد بنت التييييييييييييييييييييييييييت دي
لان اي عملة بتيجي في ايدي هي في حكم المفقودة
مش أيدك لوحدك يعم احمد والله دا كلنا اللى بيجى فى ايدينا مفقود او متقلب
السلام عليكم يا بشمهندس محمد حجاز. انصح نفسي واياك بالصبر وعدم الجزع فإن بعد العسر يسر وبعد الضيق فرج.بس ايه الحلاوة ديه يا عم.ربنا ييسر لك امرك ويحصن فرجك بالزواج ويرزقك بالذرية الصالحة..اللهم اّمين.
الموضوع دة جامد اوى يا بشمهندس خصوصا انا الظاهرة دى بقت موجودة كتير فى المنصورة بس اية الجمال دة عموما دة مش حاجة من اللى عندك انتة لسة عندك اكتر م كدة وننتظر المزيد
بص يمان انت شايف ان المشكلة فى الجنية الفضة سهلة اللى ييجى يديك جنية فضية اتعامل بنفس طريقة التباع بس المشكلة مش فى الورق او الفضة المشكلة فى الجنية نفسة انا شايف ان الحل فى الدينار الكويتى او الريال السعودى اللى انا اعرفة انهم لسة معملوش منة فضة وبيتهيألى مفيش هناك تباعين ولو مشى الحال وربنا سهلها يبقى الحل فى اليورو او الدولاااااااااااااااااااااار
من رأيى ان مشكلة الجنيه دى ملهاش حل وانا شايف ان انسب حل للمشكله دى هو الرجوع لنظام المقايضه لو كل راكب خد معاه فى كيس بلاستيك اسمر بطاطسايه او بيضه او طماطمايه واداها للسواق اعتقد الحال هيمشى وممكن كمان نستغنى عن التباع و نجيب قفص نحط فيه الحاجه اللى هنلمها من الزباين ......
خد عندك انا بقي حصل الموقف دا معايا لسه حالا طازه
راجع من شغلي في امان الله و نزلت من عربية زميلي في الدراسات وركبت العربيةالمكروباص رقم21139 اجرةدقهلية
وانابكتب الرقم هنا عشان منساهوش لان باذن ربنا مش هرتاح غير لما اخد حقي من التباع ال قالها وبعلو صوته وبكل قلة ادب انا الحكومه وطز ف الحكومه ولو عايز تتكلم انزلي ... لما ادته نص جنيه فضه
قولتله متقلقش هاخد حقي منك بس من غير ما اهزق نفسي
مع واحد زيك..و فعلا قولت ساعتها ال زي دا يستاهل يتعمل فيه ال بنشوفه ف الاقسام ..لان ال زي دا في دامغه انه كدا صح وانه كدا كسب قولي بقي اعديها ومنامش ولا اعمل ال عليا واخد حقي؟
بص ياباشا اسهل طريق للموضوع ده ادخل على موقع وزارة الداخليه وابعت شكوه وهما هايتصلوا بيك وهايجبولك السواق من قفاه وهاتاخد حقك اما بأه انا لوكنت مكانك كنت هاعدى اصل مش هو لوحده اللى قليل الادب والشرطة الى انته هاتروحلها والظابط اللى هاتكلم معاه وانا لسه مجرب من اسبوعين فأحسن حاجه قلبظ دماغك وعدى يابيه احنا كلنا بناكل عيش ف البلد دى....
اولا السلام عليكم
ثانيا الموضوع حلو والفكره في الاسلوب جامده بس رأيي ان الجنيه ده على قد ما هو اختراع فاشل بس انا شايفه ان ميزته الوحيده انه مش بينقل امراض زي الورق يعني هو مشكلته في انه يتشال فين وازاي بس ارحم من اني اشوف واحد حاطت الجنيه في بقه وعمال ينظف بيه سنانه تفتكر يتمسك ازاي ده بعد كدهS:
إرسال تعليق