لما جه عيد الحب لقيت نفسى حيران أعمل إيه لحبيبى أعمل ايه ..؟ ما انا كل عيد اقوله بحبك وبموت فيك ومفيش جديد ..ولقيت مفيش غير إنى أقوله ان ف ناس تانية غيرى بتحبك أكتر منى ودايبه فيك وعندى الدليل إسمع...
روحت جريت على قلبى وقولتله بقولك إنته بتحبه..؟ قالى دا أنا بموت فيه ..قولتله إزاى..قالى دا كفاية لما بشوفة بحس إنى ف سعاده وفرحه.. وكل ما تقرب منه بحس إن هايجيلى سكته..ولما تقوله "إزيك" بيحصلى رجفه..ولما يرد عليك ويقولك "إزيك انته" الله الله يسلام على دى رقه..بحس انى هايم ..طاير ..عايم فى ارق نسمه..وكل ما يتكلم اكتر أقول يارب ينسى ويكتر ومايمشيش.. وحتى لما بيمشى بفتكر انه لسه مامشيش لانه بكل بساطة أعز منه مفيش...
قولت اما اسأل عينى ..بتحبيه..؟ قالتلى بتمنى رؤياه ..كل ما أفتّح مابشوفشى غير إياه...وكل ما أغمّض أحلم وأحلم وأبنى قصر ليّا معاه.. عارف لما بشوفه بيبكى باكى وابكى بحرقة ولو بالدم عشانه أتمناه...
ولما سألت رجلى قالت ..دا أنا حفظت طريق بيتهم ..وكل نيجى رايحين مشوار أستهبل وأحاول أروح من هناك ..ولما بتشوفه من بعيد بجرى عشان اقرب منه كمان وكمان.. ولما تيجى تمشى بمكر فيها واقول آاه وآاه يانى مش قادره أنا عايزه اقعد شوية وكمان شوية وشويات ..بقولك مش عايز تروح مشوار...
قولت أسال إيدى.. قالت لا سيبك من الموضوع ده انا كنت عايزه أشتكيلك ..عارف البنت اللى زى القمر دى اللى هيه رقيقه أوى دى ..ياعم اللى عندها نوخزه على خدها زى العسل دى ..اللى عيونها سوده لا مش سوده مش عارفه لونهم إيه بالظبط بس عامله زى البحر تغرق فيه وتقول مش عايز اطلع..ياسيدى كل ما تيجى تسلم عليها وتحطنى فى حضن إيديها من كتر الحنيه ما أعرفش افرد نفسى تانى ..ولو مش مصدقنى تعالى نروحلها نشوفها وبالمره نجرب..طب هاقولك إيه رأيك نكتبلها رسالة ما إنته عارف إنى بقيت شاطره فى الموضوع ده...
قولت مفيش غير عقلى إيه رأيك..؟ قالى يعم أنا مش عارف إيه ده من يوم ما انته شوفتها وأنا متبرجل طول الوقت قاعد أفتكر فى كل كلمة قالها لك.. افتكر نظره افتكر همسه افتكر لمسه افتكر بسمه ..عمرى ما بنسى شوقه ليّا ولا هانسى خوفة عليّا ولا لهفته وهو بيجرى عليّا..وديما بفكر أقنعك إزاى تروحله أو تكلمه او حتى تكتبله ..والله يعم انا تعبت والله تعبت ما تجيبه يقعد معانا على طول وتريحنا ...
على عينى والله اجيبه معاكم بس اعمل ايه كفايه علينا الهمسه واللمسه والرقه وكمان البسمه.. وانا عارف ان انا نفسى وانتم وكلنا نتمنى ..بس خلاص كده هو عرف أهو وهايقوم يكلمنا...
الباحث عن الصفر...
7 ســــــــايق عليك النبـــى تجبر خاطرى بكلمتين...:
حلوه الحتة دى "ياسيدى كل ما تيجى تسلم عليها وتحطنى فى حضن إيديها من كتر الحنيه ما أعرفش افرد نفسى تانى" جميل اوى التوبيك ده يامحمد وعرضك فيه رائع وفكره جميلة ربنا يوفقك وديما كمان وكمان
واد ياحجاز انت بتجيب الكلام دا منين لا دا الواحد يخاف منك بقي
الله عليك يابوحجاز
روح ياشيخ...................... وتعالي بموضوع جديد
Happy Valentine's Day
lمتاخره بس ما يضرش علي ما اعضاءك فاقت من الحلم ياعم
D:
انا بقى يريس عملت اية يدوبك بعت 40 رسالة بس على الموبايل وجانى الرد برسالة يتيمة مش مهم.بيقولك واكيد هتقول هو مين اللى بيقوللى وهو يعرفنى منين علشان يقوللى متفكرشى كتير .بيقولك يسيدى عملو بحث جديد قاللك ان اللى بيحب بيبقى واقع تحت نفس التأثير زى اللى شارب مخدرات بالظبط فأكيد انت كنت شارب حاجة .....الجديد بقى ان انا اول مرة اعرف انك شاعر للامام يبرنس والاسقاطات دى جامدة جدا جدا
قمه الاعجاب ان يجبرك الصمت على الكلام فيعجز الكلام عن التعبير فتصمت....فلا تقيس مدى اعجابى بعدد حروفى فما احمله من اعجاب يعجز عن نثره قلمى وما يسكبه مداد حبرى قليل من كثير اود ان اقوله...حقيقى موضوع جميل جدا واحساسك عالى أوى . ربنا يوفقك و يرزقك بواحده تستاهل الكلام الجميل ده.
....كفايه علينا الهمسه واللمسه والرقه وكمان البسمه...على رأيك كفايه علينا دول اللى مدوخينا أمال لو الحبيب موجود كان هيكون حالنا إيه!! أنا محتاره مش عارفه أصدق حليم اللى بيقول "كان مالى ما كنت فى حالى متهنى بقلبى الخالى " ولا إليسا "أجمل إحساس فى الكون إنك تعشق بجنون" ولا نجاة العسل المحايده "لا العاشق مرتاح ولا الخالى مرتاح" بزمتك مش حاجه تحير؟؟ وياريت يا باحث عن الصفر تقوللى رأيك وتريحنى من الحيره دى إلهى ما يحيرلك بال ولا يدوقك قسوه الحب تصدق أنا بحسدك أهو إنته عرفت الحاجه اللى انته بتدور عليها اللى هى الصفر يعنى ، الدور والباقى على أنا لحد دلوقتى مش عارفه أنا عايزه إيه عشان أبدأ أبحث عنه . على فكره يا أيها الباحث عن الصفر هازعل أوى لو ما علقتش على كلامى اللى يارب يعجبك I'm very sorry عشان طولت عليك.... يلا باى باى.
الى غير معرف(اسف ما انا مش عارف اسمك)نصيحتى دورى ع الصفر برده اصل احتمال كبير تلاقى صاحبنا واقف هناك مستنى حد يشيل معاه وساعتها هاتحسى بكلام اليسا انه اجمل حاجه..وبعد كده تزعلوا من بعض شويه(دا عادى يعنى) تحسى بكلام عمنا حليم..ولما ترجعوا تتصالحوا تانى هاتقولى لا دا كلام نجاة اللى صح.. بصى صدقينى ما تحسبيهاش هى اجمل حاجه فيها الصدفه بس اهم حاجه لما تيجى حافظى عليها بكل قدرتك وما تضيعهاش ابدا...سلام ومتشكر على تعليقك
إرسال تعليق