تحذير لو كنت من الناس اللى معاهم السعاده مقطعه نفسها فما تقرأشى البوست ده اصله شايل كتير جواه وبيفضفض شويه وعشان ما تجيش فى الاخر وتقولى ده فيه شوية كئابه...
.........................................
يامصر كل اللى فيكى افا... مستحمله ومتمرطه وعمرك ماصرخت ف يوم وقولتى كفا... ساكته ليه وخايفه على ايه وليه لسه فيكى طبع الوفا... هاتفضلى كده وهاتموتى على كده وعمرك ما هاتشوفى شوية الدفا... هو انتى عامله مش واخده بالك ليه... ومغمضه عينك على ايه... وفاكره ان انتى احسن من كل الناس... لا اصحى... فوقى... دا انتى خلاص مات فيكى الاحساس... والطبع الطيب فيكى ياعينى اتقلب... والخيبه والحقد عليكى غلب... والواطى فيكى بقى عالى... والرخيص بقى شايف نفسه غالى... والربع بقى اكبر من الجنيه... والحرامى بنقوله يابيه... والتباع بقينا بنقوله يابشمهندس... والمهندس يعينى ماشى مفلس... والصدق بقى بيتكسف من الكدب... وقدام الفلوس يتولد الحب... وعادى خالص ينكسر القلب... ياااااااه... يااااه ياقلب...
طب فاكره... فاكره لما كنت موزه... وكان عندك شوية عزه... وكانت كل البلاد عينيهم عليكى طالعه... وكان يابنت الايه عليكى راسمه... النيل بطولك ماشى متمختر... والنسمه فى سماكى الصافيه بتتغندر... وبحر م النحيادى وبحر من النحيادى... وعلى شمالك الواحه والوادى... وكان الخير على ضفافك عادى... والحق نافش ريشه وفى شوارعك ماشى... والطيبه فى كل البيوت مفروشه...والابواب كلها مفتوحه... والابتسامه على كل عتبة باب... والسؤال عن الاحباب... وكان كل الناس قرايبى... والبيت ده بيت عمى... والشارع ده فيه خالتى... وهناك كده ساكن صحبى... وفى الحته اللى هناك دى ساكن حبيبى... واعدى على كل الناس اسلم... ويوم ما اجى اتألم... الاقى مليون واحد جنبى بيتكلم... بيساندى ويخدمنى وينصحنى لوجه الله... يااااه... يااااااه يالله...
اما دلوقتى فانتى خلاص عجزتى... وكبرتى كمان وخرفتى... وراحت عليكى ياحلوه... والكل بقى بيعاملك مصلحه... ورموكى فى اوضه مفيهاش حتى مروحه... وسابوكى كده ياعينى مكسوره... وطلعوكى بره الصوره... ورخصوا تمن ولادك... ونسيوا خلاص ايامك... والسودان بقت اغلى منك... وليبيا بقت تساوى عنك... والامارات اجمل منك... والكويت فيها كرامه عنك... والسعوديه فيها خير عنك... دا حتى الاردن بقوا بيسيبوكى ويروحولها... ما انتى كل حاجه فيكى بقت كوسه... والشباب يعينى موكوسه... ومحسوره كمان ومقهوره... من اللى بتعمليه فيهم يامصر...
تعرفى انا نفسى اعيش غريب عنك... وأنا عارف انى مش فارق معاكى ولا همك... وهاتنسى كمان ان انا من دمك... ما انا اصلا ولا اعرفك ولا حتى اقربلك... دا هما كانوا بيقولوى عليكى امى... ومش ده اللى موجود فى بطاقتى... وقالولى نيلك هو دمى... ودمى لونه احمر بمبى...وقالوا شمسك فى سمارى... وانا اصلا قمحاوى... واللى طولته منها لسوعت افايه... وقالوا شكلك فى ملامحى... وانا ملامحى مديه على هندى... وده من فضل مصر... وايه يفيد اللمون بعد العصر... ماتلاقيش مثالها... دا فيه احسن منها... دا ست كل عصر... الا هذا العصر... عشت جنب نيلها... واتهرا كبدنا من ميتها... تسوى الف قصر... ولا تساوى شوية كسر... وراحت عليكى يامصر...
9 ســــــــايق عليك النبـــى تجبر خاطرى بكلمتين...:
اهم حاجة الأوده إلى من غير مروحة
ههههههه
واللة القفا دة استحمل كتيييييييييييييييير ياحجاز بس المشكلة ان احنا مش قادرين نغير الحال بتعنا
راحت عليكى يادنيا .. وراح زمن الشهادات وبقيتى يادنيا ماشية ع السقفة وع الصاجات . هزيها بشويش بشويش .. خلى الشعب يعيش
علي الرغم ان انت غيرت النضارة ومش بس كده لا غيرتها بواحدة غالية حبتين الا ان نظرتك للدنيا حواليك لسه زي ماهي
خلاص حاول كده تركب عدسات ههههههههههههههههه
موضوعى "عاجبك حالنا" هو التعليق على موضوعك
المشكلة ان احنا خلاص نحسنا ومش عاوزين نتحرك وكل واحد يقولك خليني في حالي
بنتبهدل في مصر وبرة مصر بنتمرمط لية علشان مبنخدش حقنا في بلدنا ازاي تاخد حقك برة
طيب اية اللي عملتة مصر في الراجل الالماني اللي قتل المحجبة الصيدلانية المصرية فالمحكمة ولا حاجة للأسف ساكتة واحنا ساكتين ولازم نعرف ان الدور علينا بس امتي هيجي
لدينا وطن وزرع ولبن ولدينا أمل زرعناه في نفوسنا من زمن
مهما تعمل ياباشمهندس مصر مش هتسمعك عارف ليه لان مصر دى لا بتسمع ولا بتشوف ولا بتتكلم دى عامله زى الاصنام التى كانت تعبد لاتضر ولا تنفع ولا تبصر ولا تسمع لازم الواحد ياخد حقه فيها غصب عن الكبير فيها من غير ما حد يحس لان الكلام فيها مش مسموع, اديك عمال تهاتى وتنادى وكله زى ما هو عادى سلام يامصر
بس المهم يااسلام انى اتكلمت على الله فى ناس تانيه تخلى عندها دم وتنفذ
انا عملت اللى على مش مهم النتيجه
نروتنى ياريس
بس مصر زعقت اهية والحمد لله
الخوف بقي ل تقف ع كدا وبس .....
عامة الاحساس الجميل في كل دا انك كتبت دا لما كنت خاسة وبردو كتبت اغنية ع ممر التحرير لما حسيت انك شاركت في فرحة بلدك
إرسال تعليق