فيه جزء مهم من شخصيتى انا مخنوق منه... ومضايقنى اوى ونفسى يجى اليوم واتخلص منه... الجزء المهم ده واللى عاملى ديما مشاكل هو نضارتى ايون نضارتى زى ما بقولكم كده... وهاحكيلكم على حكايتى معاها من اول خالص واحكموا انتوا بأه...
البدايه كانت فى سته ابتدائى لما سمعت عن النضارات اللى الحكومه بتعملها ببلاش تبع التأمين... روحت قولت فى البيت انا مش بشوف ع السبوره... امى خدتنى نروح نكشف... الدكتور حطلى قطره فى عنيا القطره اللى ما بتعرفش تفتح عنيك بعدها دى وبعدين قعدنى قدام اللوحه اللى فيها سيهات كتير دى... وقالى البتاعه دى مفتوحه منين يامحمد... ربك والحق انا كان نفسى اعمل نضاره فلما الاقى البتاعه يمين اقوله شمال ولو فوق اقوله تحت... وفى حاجه كمان لو الدكتور قال ان انا نظرى سليم مفيهوش حاجه ابويه هايضربنى فلازم اكدب(كدبه بيضا)... وعملولى نضاره سوده قعر كوبايه زى اللى محمود مرسى كان بيلبسها ايام زمان دى وكانت خنقانى جدا وكل ماجى ابص فى المرايا اتخنق واقول لنفسى وكمان جايب واحد تانى معاك... ودى النضاره الوحيده اللى كانت بتستحمل وما بتتكسرش... تانى نضاره عملتها النضاره العضم البنيه دى... ودى الحكومه كانت بتعاملنا ساعتها على انها اختراع وقالك اللى عايز ياخد النضاره دى يدفع 50 جنيه فرق... ودفعت الخمسين جنيه وجيبتها ويعنى الواحد كان شكله مقبول شويه وكانت بالنسبه ليا تغيير جذرى طبعا... وكنت مبسوط اوى...
بعد كده اكتر حاجه كانت تنغص عليا حياتى ان النضاره تتكسر... لان الدنيا بتبقى شيش بيش ساعتها... وده عادى ان النضاره تتكسر لكن فى مواقف نكته ما تتعداش كده ولازم احيلكم عليها... اول المواقف دى لما جيت انام زى اى بنى ادم حطيت النضاره على التربيزه اللى جنبيا... وصحيت الصبح ما لقتش النضاره فى مكانها قعدت ادور عليها وهاتجنن من التدوير... واذ فجأتا لقيت النضاره نحت رجلى مكسوره... ماهو الاخ شيش بيش...
تانى المواقف دى لما كنت بصلى فى الجامع وعادى بأه بكل براءه حطيت النضاره قدامى وانا بصلى... وانا فى لحظة خشوع عينى رأت ما يحزنها ويقهرها... عيل قطقوط صغيور جابها جرى من اليمين للشمال وطبعا داس ع النضاره وهو بيجرى... كان هاين عليا ساعتها اخده رهينه واهله يدقعولى ديه...ومن بعدها حرمت احط النضاره ع الارض وافتكست طريقه كدا وكنت بعلق النضاره فى عروة البنطلون ع الجنب اليمين...وأثبتت نجاحها فتره طويله...
تالت المواقف دى لما كنت رايح المنصوره وكان مشورا مش عادى وكنا فى رمضان ساعتها... بعد حبتين الشياكه والاناقه اللى الواحد متعود عليهم... اتوكلت على الله وخرجت من البيت وقولت لنفسى ياواد ما تعدى تصلى العشا وبعد كده تروح المشوار ده عشان ربنا يوفقك... دخلت اصلى وجه حاج كبير يصلى جنبى لابس جلابيه من اللى هيه واسعه اوى دى...والعبد لله بردك فى لحظة خشوع وطالع من السجود وفى نفس ذات الوقت كان الحاج نازل سجود... النضاره علقت فى جلابية الحاج واتفجرت تلاتين حته وأحدثت صوتا مدويا... خلصت صلاه وقعدت احسس وادور على الاشلاء المتراميه يمينا وشمالا وحسرة قلبى ما تتوصف (عشان المشوار طبعا كده ضاع)... والحاج كان لسه يعينى بيصلى وخاشع اوى ولما سلم راح سألنى سؤال وديع اوى هى النضاره جرالها حاجه يابنى؟ قولت لا ياحاج مفيش بس النضاره مش لاقى منها حاجه...
رابع المواقف دى بأه والسبب اللى خلانى اكتب البوست ده... ان انا ربنا كرمنى وغيرت النضاره من اسبوع كده... وكانت للاسف اغلى نضاره فى حياتى(بينى وبينك اتدبست فيها)... ويوم الاربع روحت اقابل جماعه صحابى كانوا بيلعبوا كوره... وانا طبعا مقاطع الكوره وحرمت العب كوره من زمان عشان انا حطمت الرقم القياسى فى كسر النضارات وانا بلعب كوره... المهم روحت وزى خلق الله هاتفرج وخلاص... بس بصراحه هى ما كانتش وخلاص انا قعدت اتريأ ع الناس... فواحد صحبى قالى انزل ورينا نفسك... فقولت انزل ياواد وريهم نفسك... ونزلت لعبت وانا حاطط ايدى على قلبى خايف لتتكسر... وماكملتش خمس دقايق وجيبت اخرى وهبط... وطلعت من الملعب والحمدلله النضاره تمام... لحد كده فل قام صحبى اياه قالى ماتنزل يعم ولا هى كده خلاص... قولت خلاص مبن يعم دا احنا جامدبن اوى انا جايللك اهو... ونزلت ويارتنى مانزلت فى ثانيه خدتلى كوره فى وشى كسرت العدستين... اتأهرت مش عشان النضاره اتكسرت لا عشان اغلى نضاره فى حياتى ما كملتش اسبوع...
طبعا انتوا شوفتوا المعاناه اللى احنا شايفنها وبنعانى منها لذلك انا بطالب باسم كل اللى لابسين نضارات بالاتى:
ماده واحد:نطلب من الصين الشقيقه تتصرف وتعملنا نضارات مش بتتكسر (وحياتك هايعملوه من الصبح)
ماده اتنين:يحذف لقب ابو نضاره من الكلام العام ويعاقب قائلها بلبس نضاره قعر كوبايه تلاتين سنه
ماده تلاته:يجب على نقابة الأطباء تسعير عمليات الليزر بحيث لا يزيد تمنها عن 50 جنيه فقط لاغير....
على فكره بلاش تريقه عشان ربنا مابيرضاش بالظلم ...سلام
8 ســــــــايق عليك النبـــى تجبر خاطرى بكلمتين...:
المحظوظ محظوظ حتى لو حتو على ............. راسه فانوس
ابو نظاره سابقا ليزر حالا
بالنسبة لموضوع الصين ده انت ممكن تلزق ورق على الحوائط هنا فى مصر "وهما ما شاء الله بقو زى الرز فى مصر" اكيد واحد منهم هيشوف الورقة ويعملك اللى انت عاوزه وبكده تكون وفرة تمن الجواب او المكالمة لللصين
اما بالنسبة للماتريال بتاع النظارة انا اقترح انها تكون اسمنت ايوه اسمنت انت ما قرأتش غلط واسمنت مسلح كمان وفرصة اسعار الحديد نزلت عن الاول كتير الحق واعمل واحدة
وبعدين ممكن بقى تدهينها زيت او مط انت وشوقك بقى
اما الموضوع المضحك بقى لما عملية الليزك تبقى ب30 جنيه الدكاترة تنصب على مين ؟ !!!!!!!!!!!!!!!!!
سؤال يحتاج لإجابة .........
انا عن نفسى مش لافى له اجابة لو لقيت اجابة ارجوك اكتبها هنا ولو تعليق
والف مبروك على اللوك الجديد للمدونة يا zero seeker
معلشي يا ابني أوعدك لما أشتغل هجيبلك نضاره حديد علي حسابي وان شاء الله ربنا هيكرمك لما تيجي البلد دي أنا عبد الجليل
روح يابني الهي يرزقك بالنضارة اللي بتحلم بيها
الجزء الحلو فى موضوع النظارات ان النظارة هى اللى بتتحسد مش البنى آدم اللى لابسها يعنى من الاخر نظارة تموت وحجازاوى يفوت
المهم إنك تكون عينيك سليمة
فداك ياعم ألف نظاره
المشكلة ان احنا خلاص نحسنا ومش عاوزين نتحرك وكل واحد يقولك خليني في حالي
بنتبهدل في مصر وبرة مصر بنتمرمط لية علشان مبنخدش حقنا في بلدنا ازاي تاخد حقك برة
طيب اية اللي عملتة مصر في الراجل الالماني اللي قتل المحجبة الصيدلانية المصرية فالمحكمة ولا حاجة للأسف ساكتة واحنا ساكتين ولازم نعرف ان الدور علينا بس امتي هيجي
يخربيت ام النظارات على اليوم الى شوفناة فية كل دة يطلع من وراء النضارات بس اما شوفة وشوف انا هعملك فيها اية النظارة بنت الحرام المصفى دى
إرسال تعليق