بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



الخميس، مارس 19، 2009

يوم عيد ميلادى...




فى يوم عيد ميلادى (20/3).. قولت افتكر انجازاتى.. كام مره ركبت تاكسى.. ولاّ كام مره كلت عندى حاتى.. واكتشفت ان عمرى ما دوقت الجمبرى.. بس بقيت محترف جيلاتى.. ويوم ما فرجت اوى جربت البليله بتاعت الفخرانى.. ويوم ما كانت بتزنّأ كنا بنتمشى ع المشايه بشوية فول سودانى...

عارف انا عدى عليّا 24 عيد ميلاد ماجاليش غير هديتين والباقى تهانى.. وما احتفلتش غير مره بس بعيد ميلادى.. العيال ولاد الايه اصحابى.. جابولى سخان الشاى الكهربائى.. وولعوه وطفوا النور وغنوا هابى بيرث داى ياغالى.. وقعدنا نضحك ونهرّأ وبجد ما كانشى يوم عادى.. وكان اليوم ده فعلا من احلى ايامى...

طب عارف طول عمرى فيه حاجه محيرانى.. يوم ما جيت للدنيا كنت واد ابيضانى.. ولما دخلت المدرسه قالولى لأ دا انته قمحاوى.. وعشان كده رجّعونى وقعّدونى ف اخر تخته فى اولى ابتدائى.. ولقيتهم بينجحونى غصب وقالوا لازم كده عشان ده التعليم الاساسى.. وخضّونى بكتاب هالو وبت باى بت وجيم بتاع الانجليزى.. ولقيتهم بيدّرسولى خمس مناهج فى تلات سنين اعدادى.. ودرست سانغفوره والحياه فى القطب الشمالى.. وقولت لنفسى افريقيا ماشى امال بأه تاريخ امريكا الجنوبيه مالها ومالى.. ولقيت نفسى لا عرفت انجليزى ولا حتى عرفت تاريخ بلادى...

ولقيتهم برده تانى زأّونى وعدّونى اولى ثانوى.. وقالوا الدنيا هنا مختلفه واللى هاتدرسوه نظرى هاطّبقوه فى المعمل الكيميائى.. وانا وغلاوتك عندى لاشوفت معمل ولا شاركت حتى فى يوم رياضى.. بس فى تالته ثانوى انا بأه اتشطرت وكنت واد تانى.. اصل كلام فى سرك انا كنت واد معجبانى.. وقابلت ست البنات الأموره وقولتلها انا...! قالت لأ لازم الاول ياشاطر تثبتلى وتطلع الاولانى.. واتذليت اخر ذل وجيبت مجموع يجى منه بس ما طلعتش حتى التانى.. ودخلت هندسه ولما عملت فيها عبقرينوا شيلت رسم فى اعدادى.. واستعبدتنى الدكاتره وعشت ليالى كتير وجعانى.. واشتغلونى وحسسونى ان احنا صفوة الخلق والسوق بره علينا بينادى.. وفرشولى الدنيا الوردى ورسمت على كلامهم الامانى.. وقالولى لما هاتتخرج هاتبقى مهندس بالشىء الفولانى.. وادينى اهو اتخرجت ولا لقيت كبده ولا لقيت سجق ولا دوقت العكاوى وكل مااقولهم ياجماعه دا انا مهندس يقولولى يعم روح دا حكاوى...

وفضلت طول عمرى عايش فى الدور التحتانى.. ولما اتجرأت مره وبصيت على الدور الفوقانى.. اتسكعت قلم على وشى ورجعت تانى لمكانى.. ومن يومها اتحوالت ومش عارف ابص قدامى.. وبقيت ماشى فى الدنيا مغمض عنياّ بس ساعات كده بمشى بدماغى وافردها ع الدنيا واقولّها يانت يانى.. ومش عارف ايه اخرتها.. وامته هاخطب وياترى مين هى الحلوه اللى مكتوبالى..

اه نسيت اقولكم ان انا بقيت للكتابه غاوى ومره اشتريت كوتشى من محلات القناوى.....سلام

5 ســــــــايق عليك النبـــى تجبر خاطرى بكلمتين...:

كل سنة وانت صديقي قصدي اقول وانت بخير وسلامة ويارب اليوم دا يجي عليك السنة اللي جاية وانت محقق كل اللي بتتمناه .

عمري وعمرك سنين يدوم....ويبقى الحب زادي وزادك
واهنّي نفسي في هذا اليوم... مبروك لكْ عيد ميلادك

Happy birth day to u , sana helwa ya gameel, kol sana w enta tayeb w okbal billion sana. i hope u'll achieve all your dreams in areal manner. plz, don't remove from your ambition to find ur self....i'm so blessed to have afriend like u.

احمد فرحات
وانته كمان ياحمد يجى عليك اليوم ده وانته محقق كل امانيك وخاطب كمان يعم

مرمر
ربنا يخليكى ليهالبليون سنه دول واكتر منهم كمان وتحقق كل احلامك وعجبتنى على فكره حتة don remove from ambition 2 find ur self مع انى حاسس ان فيها حاجه مش طبيعيه بس نعمل ايه ادى العيش لخبازه

كل سنه وانته طيب يامحمد ومبروك على الكوتش الجديد وعلى فره ابقى جرب تبص تانى على الدور الفوقانى ولو اتسكعت تانى ولا يهمك الضرب للرجاله واللى يعيش ياما يبص فوق ويضرب

كل سنه وإنته طيب يا باحث عن الصفر على فكره كل كلامك جميل أوى بس إنته بتكتب فى الحب جميل جدا مش معقول انته باين عليك رومانسى أوى . ياترى عرفتنى أنا الحيرانه اللى علقت على عيد الحب وأنا بشكرك عشان رديت على. كل سنه وإنته طيب مره تانيه باى باى