بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



الثلاثاء، مارس 03، 2009

مفيش فايده...


عندى كلام عايز أقوله....هو إنتو ليه مستكترينه....يعنى هو إنتو اللى كنتو مدونينه.. اللى يقول دا سارقه.. واللى يقول دا مش كلامه.. واللى قالت دا أكيد مجمعه.. واللى قال يعم أنا عارفه.. وبالأماره دا مش شعره.. والأخير قال يعم دا انت آرفنا.. هو دا يعنى اللى انت شايفه.. طب كتر خيرك يعم عارفه.. هو اللى حصل إيه يجماعه.. هو أنا يعنى جبت من بره.. ولا يعنى اخترعت الذره.. ياناس دا أنا بس حلمت بفكره.. أقدر بيها أرسم ضحكه.. ولاّ يمكن بيها أمسح دمعه.. أو حتى ممكن أوصل فكره.. وكان كل أملى أسمع دعوه.. يارب زيده وكمان باركله...

ماهو إحنا لازم نحلم ببكره.. ونرسم أمل للّى بعده.. ونقول يارب حققه.. بس لازم نمد خطوه.. ومش كفايه بس الكلمه.. هو يعنى باراك لما حلم بمجده.. قالو عليه ياهناه ياسعده.. أكيد قالوا ساعتها دا ابن هبله.. بس هو فضل ورا حلمه.. وأمه قالت يارب ساعده.. وأصحابه قالوا لو وقفنا جنبه.. دا أكيد فى يوم هيبقى حاجه.. وأهو بقى رئيس لأكبر دوله.. وهايعملهم كل حاجه...

ياناس ياهووو خلاص كفايه.. وفكروا بقى فى أصل الحكايه.. ونبطل بقى نحل الفزوره.. وكفايه خلاص نبص ع الصوره.. ونحاول مره نبص ع اللى ورا الصوره.. ونفهم بقى مين اللى قاصد يرميلنا دى فزوره.. ماهو زمان أمي قالتلى يابنى ياضنايه.. بيوتنا عشان يسرقوها الحراميه.. لازم ولابد يعملو تمثيليه.. وعشان كده عملوا حريقه.. وسابونا احنا نجرى ندور ع الحقيقه.. الحقيقه اللى هما أصلا مزيفينها .. وفضلنا نألف كم قصه بريئه.. وقعدنا نضيّع دقيقه ورا دقيقه.. ودخلوا هما سرقوا الجميله.. أحلامنا وأمالنا العظيمه.. وقدروا يحققوا منها الغريبه.. وأدينا أهو عشنا وشوفنا الحديده.. بتغنى سعيده ياحلوه سعيده.. وخلينا بأه قاعدين ونقول لا يعم دى بعيده...

فيها ايه لو عملنا وقفه.. بس المره دى مش من اللى هيه.. المجتهد نساعده بفكره.. والشاطر نشد ساعده.. والكسلان نقوله همه.. والناجح نسأفله سأفه.. وتبقى كل أمالنا نبنى أمه.. ونبطل بأه نكسر مأدفه.. ونقول ربنا يعينه.. ويديله كمان ويزيده...

وفيه واحد مش هيبقى عاجبه.. ويقول حجاز ده عامله دوشه.. أنا قلت ياجماعه سيبكوا من الواد ده .. داعاملّى فيها سبع البرمبه.. ماتلم نفسك ياد أصل والله بالقديمه.. خلاص يعم من غير شتيمه.. وبلاش تقول ألفاظ رذيله.. وأنا عارف إن قصدك تقول مفيش فايده.. وعلى فكره مش انت لوحدك اللى بتقول مفيش فايده.. أقولك أحسن تعالى نشربلنا كاسين ونحاول ننسى...

الباحث عن الصفر


6 ســــــــايق عليك النبـــى تجبر خاطرى بكلمتين...:

ايه الجمال ده ياعمنا والله تمام بس على فكره فى كتير لسه عندهم امل فى بكره بيعملو الى عليهم ويقول يارررررب

اخوك
mido ragab

كلام جميل وكلام معقول ماقدرش اقول انا حاجة عنه

ربنا يزيدك ياباشا ويابركلك كمان . ويارب اشوفك كده حاجة كبيرة اوي (قد البحر) علي رأي سارة بنت أخويا.

انت عارف الواقع دايما مابيبدأ بحلم أوفكرة وماعتقدشي ان فيه حد ممكن يمنعنا ان احنا نحلم اوحتي نفكر.

ومين قال مفيش فايدة لا ياسيدي فيه فايدة بس الفايدة دي تيجي لما نحلم ونفكر مع بعض وبرضك نحقق الحلم والفكرة دي مع بعض .

وسلامووووووووووووووز باللبن

ياسيدى ربنا يزيدك ويباركلك وأصلا ما فيش حد يقدر يقول عليك كلمه وحشه أو شتيمه لأنك كل ما تكتب توبيك بيكون أحلى من اللى قبله. بس ما ينفعش نقول مفيش فايده علشان طول ما إحنا عايشين لازم نفكر ونحلم ببكره ويكون عندنا أمل اننا ممكن نحقق حلمنا ده ونعيش على الأمل ده ....ربنا يوفقك وتمتعنا أكتر و أكتر بموضوعاتك الهايله دى.

أزال أحد مشرفي المدونة هذا التعليق.

محمد عبده
دا جمالك ياعم الحج وشكر ياريس

احمد فرحات
الفايده حرام يعم احمد ولا ايه اصل بيقولك دا ربا

مرمر
والله انتى اللى مش عارق اقولك ايه بس ..هاقولك وانتى كمان ربنا يزيدك وكمان يباركلك

محمد نجدى
انا اسف

لن ينكسر قارب الحياه على صخره اليأس ما دام هناك مجداف اسمه "نهر الأمل " يعنى اهو لسه فيه فايده ولا إيه ياباش مهندس....