بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



الثلاثاء، مارس 10، 2009

أصل بيقولك الأزمة جات عندنا...



تضحك أوى لما تسمع واحد بيقولك إحنا حظنا وحش السوق نايم ومفيش شغل عشان الأزمه العالمية... والتباع يقولك يأستاذ الفلوس القديمة دى مش هاتمشى إنته ماسمعتش عن الأزمة ولا إيه... تروح تشترى أى حاجه يقولك معلش هى غلت شويه عشان الأزمة... وسبحان الله الحاجات كلها بترخص وعندنا إحنا بتغلا... ويقولك عشان الأزمة وهما مش عارفين الأزمة دى بتاعت إيه أصلا...

والى يغيظك اكتر إنك تسمع عن الشركة الفلانيه بتاعت العربيات سرحت 20% من عمالها وبتدى عربيه هديه على كل عربيه متباعه... والشركة العلانيه بتاعت الأجهزة الإليكترونية قفلت 30 مصنع... وشركة مش عارف إيه فلسّت... وشركة إسمها ايه بتقول حاجة لله يامحسنين... أمال بأه عندنا عمرنا ماسمعنا عن شركة واحده فلسّت أو سرّحت حد من عمالها... عز الدخليه زى ماهو والأسمنت ميه ميه وفى العالى كمان... وفودافون وموبينيل شغالين عروض اشطه والدنيا تمام وميت فل وعشره... أمال بأه فين الأزمة اللى بيقولوا عليها... هى جات بس على الحاجات اللى بنشتريها يعنى...

طب الأمريكان عندهم أزمة عشان الناس دى بتتعامل بفيزا كارد... يعنى الواحد من دول بيفضل يشترى من هنا ومن هنا بالفيزا والبنك مفيش فيه فلوس اصلا يعنى مش هايعرف يحول قيمة الحاجات اللى صاحبنا اشتراها للمكان اللى اشترى منه وبكده يبقى البنك مديون والناس تفضل تصرف وهو ديونه تزيد أكتر ومايقدرش يسد يقوم يحصل عجز عنده وبكده حصلت الأزمة... أمال احنا بأه اسم النبى حارسنا وصاينّا... فين بأه الناس دول اللى بيتعاملوا بالفيزا دى يطلعوا كام واحد يعنى... طب لو قولنا فى ناس معاهم فين الاماكن اللى هايصرفوا فيها بالفيزا دى...

هو بينى وبينك حاجة عسل أوى وحركه شياكة... لما أروح لإبراهيم لولو وأقوله "بجنيه جبنه وجنيه لانشن ونص جنيه كيس شيبسى وكيسين كاتشب ياعم ابراهيم" يقولى "فيزا ولا كاش ياستاذ محمد" أقوله "فيزا طبعا ياعم ابراهيم هو فى حد لسه بيتعامل بالكاش اليومين دول خد الفيزا أهى بس وحياتك ياعم ابراهيم زود عشرين جنيه على حسابك واديهالى عشان بس محتاجها" يقولى "وماله خد ياستاذ محمد الفيزا بتاعتك والعشرين جنيه كمان"... ولا بأه يعم تشيل فكه ولا جنيهات فضيه وكده بأه لما حد يقولى أزمة أصدقه بجد...

من الأخر ياجماعه أنا واحد من الناس لاشفت أزمة ولا أعرفها ولا والنعمه حتى قابلتها... ولا سمعت إن اقتصادنا إتأثر بيها دا إذا كان فى إقتصاد أصلا... الحاجه الوحيده اللى سمعت إنها إتأثرت بيها قناة السويس عشان فيه شركات فلسّت... يبقى مفيش بضايع بتتنقل... يبقى مفيش سفن بتعدى... وبالتالى حركة المرور هاتقل... يبقى مفيش فلوس جايه... ومن يوم ما الأزمة دى حصلت قناة السويس قلت إيرادتها 13% وبما انه كان فى اصلا نسبة 80% بتتسرق... فالحرامى قالك أنا أعمل فيها ابن بلد ودور جدعنه وأرضى بقليلى واسرقلى 63% بس المرّادى ونبقى نعوضها لما الأزمة تعدى... وعشان كده فضلت الدنيا هىّ هىّ ومفيش أزمة عندنا ولا حاجه... مفيش غير النصابين والحراميه اللى بيضحكوا علينا وبيتاجروا بينا ويغلوا الحاجه... واحنا ما بنصدق هما كدبوا الكدبه واحنا ساعدناهم فيها... قال ازمة قال ياعم روح... دا لو الأزمة دى بجد كانت مصر بحالها أعلنت إفلاسها أكتر ماهى... والحاجات كلها رخصت وكان الواحد اشتراله موبايل اى فون ب 300جنيه ولا حاجه وخد عليه واحد هديه كمان هى دى الأزمات ولا بلاش...

7 ســــــــايق عليك النبـــى تجبر خاطرى بكلمتين...:

بجد بجد كلام زى الفل يا باش مهندس محمد ان بصراحة اعجبت بحكاية الازمة دى وياعم كترلنا شوية من كتاباتك الرنانة دى دا صداها وصل لحد اوروبا كلها ياعم الصحف يتتكلم عنك سمعنا كلامك الحلو دا كتير ماشى.......... احمد نور

إحنا أزمتنا الحقيقيه ف الناس اللى بتحكم مصر بيسرقوا كل فلوسها وبعدين يقولوا للمواطن الغلبان معلش استحمل أصل فيه أزمه فكرتنى بأزمه الغاز مع ان احنا من أغنى الدول بالغاز بس كنا وصلنا لإننا مش عارفين ناكل مش عشان مفيش اكل لا عشان مفيش غاز....حسبى الله ونعم الوكيل فى الناس الظلمه دول بس برده الحق علينا احنا لازم نعمل وقفه ونعترض . انا عارفه ان كلامنا مش هيتسمع طبعا بس برده لازم يعرفوا اننا فاهمين وزعلانين ومش مسامحين . فى إنتظار المزيد و يارب ديما بالتوفيق يا بشمهندس .

هههههه....روح ياشيخ فكرتنى بأزمة الغاز اللى المفروض احنا بنصدره بس انا معاك على فكره انا ماشوفتش الازمة دى ولو شوفتها هاقولك على طول...بالتوفيق ياريس

انت جيت ع الجرح

انا مهندس لاعرف في الاقتصاد ولا في السياسة ولاحتي في الهندسة(اليومين دول بس بسبب الازمة الاقتصادية)

بس ممكن اقول ان كلامك مظبوط بدليل ان احنا عمرنا ماسمعنا ان فيه حد عندنا باع خصلة شعره زي ماحصل في امريكا.

ولاعمرنا سمعنا ان شخص عنده 45 سنة مشي في الشارع عريان زي ماحصل في تركيا.

حتي كمان لو مصر اتاثرت بالازمة الاقتصادية مش يبقي بالصورة الشرسة اللي احنا بنشوفها دي

وعموما الواحد اتعود علي ان فين ناس كده عايشة علي استغلال الظروف دي

وحلو اوي موضوع (ابراهيم لولو والفيزا) دا ممكن يبقي مطلع اغنية اواسم فيلم.........ههههههههه

احلي واجمد بلوج نزل... والي الامام دايما ياحجاز بس ابقي افتكرنا.... ربنا يوفقك. اخوك منصور من دول الخليج

احمد باشا نور
متشكر ياباشا وان شاء الله فى جاى احسن

مرمر
ايوه كده احنا فاهمين وزعلانين ومش مسامحين حتى اهو بالاماره كشفت راسى ودعيت عليهم...متشكر على التعليق الجميل ده

فرحات فرحات
لما تيجى بلدنا هابقى اوديك لابراهيم لولو ونصور الفيلم هناك

احمد باشا منصور
مين يفتكر مين بس يعم احمد وبعدين شكرا ياريس وانا تحت امرك احنا اخوات...

الله عليك و علي مواضيعك الجامدة بجد.....بس عارف المشكلة ممكن يكون جزء منها فينا احنا عشان حتي لو الحاجة غليت بردو بنشتريهاو مايهمناش سعرها اللي غلي يعني لو مرة خدنا موقف كلنا( و من غير مظاهرات )بس نقول للبايع لا عشان اغلي من الفلوس اللي في ايدي يمكن يحسو علي دمهم و يبتلو يغلو و يعرفو اننا شعب ليه ارادة