هو أنا ليه ماخدتش.. بالى مره وكمان مافكرتش.. إن أنا ممكن اجرح ناس وكمان أخربش.. وديما بقول إن أنا مأبأذيش.. وأتارينى بأذى ناس.. وبعاملهم من غير احساس.. وأرجع أقول دا أنا اسف دا كان قصدى والله خير.. دا أنا بس كان عندى مشكله.. وكنت مشغول فى حلها.. والحمدلله وصلتلها وعرفت أيه اصلها.. وياريت ماتزعلش منى وأنا اسف مره تانيه.. واقول لنفسى ما أنا خلاص اعتذرت.. يعنى هاعمّله إيه أكتر من كده.. أنا خلاص عملت اللى عليّا.. وأتارينى سيبت قلب بيبكى وكمان بيقاسى.. وهايفضل يتألم سنين وسنين.. مع انى سألته وقالى دا أنا مسامحك.. وعادى ماهو ده طابعك.. طول عمرك مش متعود تيجى تقول أنا أسف باقتناع.. ولا عمرك حتى قولت متشكر بإيقاع.. طول عمرك بتقول أسف وبحس إنها غصب عنك.. وكمان متشكر وهى يعينى مخاصمه قلبك...
عارف انته لما تزعل حد منك كأنك دقيت مسمار وشيلته تانى فلازم يسيب أثر فى مكانه...
فيها ايه لو قلت من كل قلبك متشكر.. ومعاها إبتسامه بكل تحضر.. ولو جريت عليه وقولت بكل جوارحك أسف.. وصدقنى لو لفيت الدنيا مش هاتلاقى حد أكتر منى عليك خايف.. يابن الناس... ما تنساش كلام عليه الصلاة والسلام "تبسمك فى وجه اخيك صدقة"..."لا يحل لمسلم أن يهجر أخاه فوق ثلاث ليال "..." إن الله قد أعطى كل ذي حق حقه " فيها ايه لو جيت مره وانته بتشترى حاجه.. او بتقرا حاجه.. او بتنزل حاجه من على النت وقولت متشكر.. او لو انته ماشى وخبط حد من غير قصد.. او ظنيت ظن سيىء.. او حتى شتمت او عملت اى تصرف غلط ..وقولت انا اسف... صدقنى هى حاجه جميله جدا وهاتزعل أوى لو قولتلك الناس بره بيتعامله كده وبيقولوا عليها تحضر مع انها عندنا أصل فى إسلامنا..
4 ســــــــايق عليك النبـــى تجبر خاطرى بكلمتين...:
تعرف إن أنا كنت كده لما أغلط أو أحس إن فيه حد زعل بسببى كنت بفضل أعتذر وتأسف و أوقات كان الطرف التانى مش بيقدر أسفى ويقول أنا أصلا ما زعلتش وبصراحه كمان ما كنتش بلاقى نفس المعامله دى وفكرت كتير وقولت أنا اللى غلطانه بس إنته قولتلى إن العيب فى الناس مش في وأنا صدقتك وهفضل برده أتأسف لما أغلط وبشكرك جدااااااااااااا على كل كلامك ونصايحك و كل حاجه...أسفه عشان طولت عليك وصدعتك
كلامك جميل اوي يابو حجاز وكل موضوع اجمل من اللي قبليه وجمال مواضيعك في انها حاجة بنحس بيها وعايشينها.
وعلي فكرة الكلمتين أسف وشكرا لهم تأثير السحر واكتر,
عارف ليه ليهم التاثير ده لانهم عبارة عن رسالة تحمل نفس المعني والرسالة دي بتقول ( إنت تهمني ) .
وانا بقول لاي حد ممكن اكون زعلته انا اسف
وبقول لاي حد عمل حاجة علشاني شكرا
Thank you for everything .... you do
I am sorry for everything .... i do
انته ممكن تجرح أو تخربش ! طبعا مش معقول اللى يكتب كلام الحب بالأسلوب الحساس ده عمره ما يعرف يجرح . أنا مش لاقيه تعبير يعبر عن إعجابى بيك وبموضوعاتك بتدخل القلب على طول أنا بشكرك على البلوج وآسفه إذا كنت بضايقك . باى باى
ما شاء الله بجد علي الكلام الرائع ده.......علي فكرة دي اول مرة ادخل علي البلوج بتاعتك بس بجد مش هاتكون اخر مرة خااالص و اسفة من دلوقتي عشان هازعجك كتير بعد كده......
إرسال تعليق