بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



الأربعاء، أبريل 27، 2011

إمْسِك مُنافق...


رأيتُ مؤخراً على قناة فضائية تُدعى الفراعين إعلاناً لحزب جديد يُسمى حزب مصر القومى والخاص برجل الأعمال طلعت السادات وتوفيق عكاشة... لكن دعنى أحكى لك قليلاً عن المدعو توفيق عكاشة..

 فتوفيق عكاشة والشهير بالفلاح الفصيح هو نائب الحزب الوطنى فى مجلس الشعب المنحل عن دائرة نبروة والتى تتبعها قريتنا... وتوفيق هذا والذى يطلق على نفسه دكتوراً فى الإعلام ظل يترشح لخوض إنتخابات مجلس الشعب طيلة خمسة عشر عاماً كمرشح مستقل ولكنه كان دائما ما يحظى بالفشل والسقوط رغم أنه ينتمى إلى عائلة ذات نفوذ ومال.. إلا أنه فى المرة الأخيرة انضم الى الحزب الوطنى (الله يرحمة) وبالتالى نجح بالتزوير لكنه يبدو إنه فقرى ابن فقرية وقدمه نحس على المجلس حيث لم يستمر المجلس سوى شهر واحد...

وذاع صيت توفيق على الفيس بوك بعد الثورة حينما إنتشرت الفيديوهات الخاصة به وهو يقبل يد موافى والشهير بصفوت الشريف والذى بدوره علل سبب تقبيله ليد الرجل فى الرايحة والجاية بأنه الأب الروحى له (مته -حشتفة- ونعم الأبهات والله).. عموما اذا أخذك الفضول للتعرف أكثر على هذا التوفيق فابحث عنه فى اليوتيوب.. وأيضا حاول أن تفتح نِفسَك وتشاهده ولو مرة على قناته الخاصة والتى أعدك بأنك ستحظى بلحظات من السعادة والضحك الهستيرى والسخسخة على أسلوب الرجل حيث ستشعر أنك قاعد قدام الحاج محمد أبو سويلم وهو يحكى لك عن البهايم والزريبة بتاعته وأد إيه اتأثرت بالثورة التى قامت فى مصر.. وستعلم أيضا أد إيه احنا كنا فى هم ما يتلم وخيبة تقيلة وستدرك حجم عصور الظلمات التى كنا نعيش فيها.. عندما تجد مثل هذا التوفيق عضواً فى البرلمان ويشرع قوانين لمستقبل أمه ذات حضارة... وعشان كده احنا كنا حاسين إن المجلس كان جزء من الزريبة بتاعته والبلد اتملت بهايم... ولكن الحمدلله ان ربنا رحمنا...

ونرجعنا مرجوعنا تانى لحزب مصر القومى إياه... والذى أهم مايجذبك فيه هو أنه يترأسه طلعت السادات والذى قد ترأس الحزب الوطنى كبديل لمبارك لمدة 24 ساعة قبل قرار حله (ما إتهناش ياعينى وإظاهر الاتنين كده والله أعلم فى صلة قرابة بينهم وبين القدم النحس).. مما يعطيك فكرة مبدئية عن توجهات الحزب أو بمعنى أدق تسميها فنانة تسميها راقصة إستعراضية هى أهم حاجة إنها رقاصة وبترقص... 

ومايجذك أيضا فى هذا الحزب هو البيان التأسيسى الخاص به والذى ركز فيه على كل حاجة فى الدنيا ماشية مع بعضها أو مش ماشية منها على سبيل المثال أنه تبنى فكرة أن الثورة تحتاج الى من يدافع عنها وبالطبع مفيش أحسن منه (والله الجماعه دول بيفكرونى بفيلم عربى زمان بتاع شمس البارودى لما جوزها مات وبقت وحدانيه ياعينى فواحد من الحته عمل فيها جدع وابن حلال ولم رجالة الحته وراحولها البيت وقالها انتى دلوقتى ست واحدانية وماينفعش تقعدى لواحدك كده انتى لازملك راجل.. ومفيس أحسن منى فى الحتة يصون عرضك.. هههههه أهى نفس الفكرة بالظبط).. وأيضا تبنى الديموقراطية والبطالة والقومية العربية وبرده سبحان الله بيرفض التدخلات الأجنبية (الكلام ده مش غريب عليا) وبينادى بالنظر فى الاتفاقيات المبرمة مع إسرائيل وقضية فلسطين  والخصخصة والمواطنة والذى منه (والنبى ما بتفكركش بحاجة الحاجات دى).. ولم يفوته إقحام اسم الرئيسين جمال عبد الناصر والسادات ضمن توجهات الحزب رغم اختلاف الاثنين فى توجهاتهم بس كله عشان يعنى الناس اللى بتحبهم تنضم للحزب والطبخة تبقى محبوكة... أه يادماغى

 المهم المهم بعد الكلام اللى يجيب الضغط ده أنا عايز أقول إيه... فى الحقيقة أنا تساءلت كثيراً عن من الذى صنع مبارك ديكتاتورا ؟؟.. وكانت إجابتى هى نحن (أيوه أنا وإنته واللى جنيك واللى جنبك والناس اللى سكتت عليه السنين دى كلها).. أما من جعله إلها؟؟ فلم يكن غير هؤلاء المتلونين ،، المنافقين ،، الأفاقين ،، ولست أقصد هنا بالشوية اللى معاه فى السجن بل هؤلاء يطلق المساعدين ولكن كان يوجد منافقين أفاقين نشاهدهم على القنوات ليل نهار... نراهم فى الشارع... فى الأحزاب.. فى الجوامع.. فى الجامعات.. فى الجرايد.. فى كل حتة كانوا موجودين.. تفتكر أين اختفوا..؟؟

فى الحقيقة هم لم يختفوا ولكنهم ذابو بين الناس وتباهو بالثورة ،، وتحدثوا باسمها ،، وتغنوا بأثارها وقوتها ،، بل وقالو أنهم كانوا جزءا منها (ماهو العيب اننا ما كاتبناش أسماء ساعتها) بل وسارعوا الى إنشاء أحزاب جديدة تعمل باسم الثورة والمثال السابق خير شاهد... إذا تعتقد ماهو الحل لكى نتجنب أولئك المتلونين المُتمَحلسين ونعمل على أن نحمى ثورتنا وندافع عنها ونتجوز احنا شمس البارودى...

أخر ملاحظة من البيان هو ما أحاول أن أحذر منه الناس وهو تفتكر المرشح الرئاسى اللى جاى عشان يكسب تعاطفك ويضحك عليك يعمل إيه.؟؟.. أكيد أكيد هايضحك عليك ويجيبلك اسم فلسطين واسرئيل والغاز ويضحك عليك فى موضوع البطالة والحاجات دى بالرغم من أن الحاجات دى ممكن تتحل فعلاً لكن بجدول زمنى وخطة محكمة تعمل عليها مؤسسات كثيرة فى الدولة لأشهر عدة.. يعنى المسألة مش كلمتين فى ميكروفون فى فراشة لشوية ناس قاعدين بتقول الله يفتح عليك وخلاص... عموما موضوع الرئاسة ده نعمله مقال تانى... حفظ الله مصر شعبا ووطناً ومتابعى المدونة وأنا معاهم... واللى يشوف منافق يمسك فى زميرة رقبته ويفضحه...

------------------------
بره الكادر: بشكر الناس اللى بعتت وسألت عن النوت الجديدة اتأخرت ليه النهارده.. وبرده الناس اللى كانو كل شوية يفتحو المدونة ويشوفوا النوت نزلت ولا لسه.. ومعلش سامحونى إتأخرت الشغل بأه نعلمه إيه... وماتعرفوش أد إيه الواحد كان حاسس إنه وراه واجب إتأخر فيه ولسه ماعملوش وحاسس بالذنب تجاهككم.. تسلمو ع المتابعة.. 

                                      حجـاز

4 ســــــــايق عليك النبـــى تجبر خاطرى بكلمتين...:

انا هبدأ بقبول اعتذارك لانى كنت من الناس اللى بتدخل تشوف المقال الجديد اتحط ولا لأ
وربنا يعينك على شغلك اهم حاجة ان المقال نزل كما وعدت

ثانيا كلامك كله صح وتسلم ايدك على مقالك الجميل
وفى انتظار الاربعاء القادم

تحياتى/دينا عماد

ايمان اللى مش ايمان
هههههههههههههه

ربنا يخليكى يا ايمان ومبسوط ان عجبك المقال وان شاء الله ربنا يسهل والشغل يخف شوية
وعموما اهو الواحد بيحاول والله يكون فى ميعاده اصل الموضوع دع صعب اوى
بس حاجة جميلة والله

المهم شكرا لمتابعتك الجميلة
:)

بالنسبة للاخ توفيق ففي منة كتير. وفي مصر انا شايف ان الوضع مطول ودة مخلي اللي عاوز يتكلم يتكلم ومخلي الاسلاميين يخبطوا في بعض والازهر بيتجة الي الهاوية بعيد عنك. لية دة معرفشي فين الاسس والظوابط معرفشي

وائل
انا شايف اللى بيحصل ده عادى جدا بعد الثورة لان حصل حدث كبير كان غير متوقع وغير مرتب
واللى بيحصل دلوقتى ان الناس بتحاول تنافق عشان تلحق حاجة من الكعكة

:)