من سنة فاتت بس مش سنة بالظبط يعنى هى أكتر شوية نزلت الكتاب الأول والنهاردة جه ميعاد الكتاب التانى... الحقيقة الموضوع ده حسيت إنه بأه إدمان ليا... ومسألة إن الواحد يجمع مقالات وينسّق ويظبّط ويكتب مقدمة ونهاية وفهرس وتتابع مقالات والقصص دى كلها رغم إنها بهدلة بس بصراحة متعة ما بعدها متعة... تحس كده انك بتعمل حاجة بتحلم بيها... رغم انه حلم لسه صغير بس مسيره يكبر... ماهو طول ما إحنا بنحلم أكيد هايكون حلم بكرة أحسن من حلم إمبارح...
أما حلم النهاردة فإسمه ضحكة مستخبية واشمعنى ضحكة مستخبية فأنا زى ما وضحتها على غلاف الكتاب بسطرين صغيرين كده وقلت "إنها ضحكة كانت مستخبية من تلاتين سنة.. وصدقاً نحن لم نكن نعرفها ولا كنا نتصور ان احنا هانشوفها فى يوم م الأيام أو هى موجودة جوانا من أصله... فعندما تنحى مبارك اكتشفنا ضحكة على وشوشنا لم نكن ندرك أبداً أنها كانت تكمن بداخلنا... وحاسينا يومها وكأننا ماشوفناش فرحة قبل كده... لذلك أرى أنها كانت ضحكة الحرية التى استخبت تلاتين سنة... انها كانت ضحكة الأمل التى تبددت منذ زمن... انها كانت ضحكة الحلم التى أصبحت كابوسا... انها كانت ضحكة العزة التى تشوقنا اليها...لذلك ستجد بين جدران هذا الكتاب... كلمات بتفطسك من الضحك ،، ومرة بتخليك تدمع ،، ومرة أخرى بتوريك خيبتنا ونيبتنا ،، ومرة رابعة ستجدها جد حبتين... ودى طبيعة الدنيا وشكلها اللى كنا عايشينه"...
والكتاب زى ما أنتو عارفين بيعتمد على النت اللى هو المفروض (دار النشر) ،، والأوفيس (المنسق العام) ،، والأدوب ريدر (المصمم والمجلد) ،، والفورشيرد (أماكن التوزيع) ،، وعدد مرات التحميل (هى دى أرقام التوزيع) ،، والفيس بوك (الشركة المعلنة)... فالمهم بأه تنزلوه وتقرأوه وإن شاء الله يعجبكم وياريت تبعتولى وتقولولى رأيكم...
أما الجديد بأه المره دى.. زى ما أنا قولتلكم قبل كده هاحاول أطبع الكتاب... انا بدور على مطبعة كويسة حاليا وهاتّبع حاجة كده اسمها الطبع تحت الطلب... فاللى محتاج نسخة يبعتلى انبوكس أو ميل ويقولى وأنا إن شاء الله أعمل حسابه معايا وبالنسبة للتوصيل فاحنا قرود هانتصرف فى الموضوع ده سهله يعنى... وماتقلقوش الكتاب مش هايبقى غالى يعنى ممكن يعمله عشرناية ولا حاجة وكمان أربعيناية عليهم (دى النقطة بتاعتى أمال هاتعبلكم كده لوجه الله يعنى ههههههه)... لا ما تتخضوش كده هى عشرناية بالكتير أوى ان شاء الله... بس أهم حاجة بأه المرادى الشير واجب وطنى كل مرة بتبقى أوبشن المرة دى فرض... أنا عليا عملت الكتاب وإنتو عليكم الشير والتنزيل والقراية والفيد باك وتدفعوا الفلوس وكده...
وده لينك الكتاب يالله عيشوا
وبالمناسبة أحب أشكر ايمان الليثى على الغلاف الجميل وتعبها معايا وبشكركم انتوا كمان عشان هاتنزلوا الكتاب دلوقتى وهاتبعتولى تقولولى رأيكم...
حجـاز
5 ســــــــايق عليك النبـــى تجبر خاطرى بكلمتين...:
ألف ألف ألف ألف مبروك يا محمد
عقبال الكتاب الألف بس أنجز كدة مش لازم كل سنة علشان نكمل الألف
و بأذن الله هحمله و أقراه
ربنا يوفقك دايماً
رامى
الله يبارك فيكى ياصاحبى
والله هاحاول اصلى صدقنى مسألة الكتاب مسألة صعبة
التدوينة اهى حاجة بتكتب فى ساعتين لكن الكتاب اسميه ايه وهارتبه ازاى وكده يعنى
وانن شاء الأيام اللى جاى احسن
تسلم يابرنس هاستنى رأيك
:)
الف مبروك على الكتاب
هو اسمه حلو اوى بس عندى استفسار ليه بدأت ب بعد الثوره يعنى بيتهيألى تبدأ الاول بالمواضيع اللى كتبتها قبل الثوره وبعدين تبدأ توضح الاختلاف وتبين الضحكه المستخبيه بعد ما ظهرت وطلعت للنور بعد الثوره
وكمان فى حاجه تانيه
بما انك قررت تطبع الكتاب ده فإيه رأيك تاخد بعض البوستات اللى فى الكتاب الاول اللى بتتكلم فيها عن حال مصر وكده زى مثلا "احنا ايه ذنبنا" ، "على ما يجى غيره" ،" راحت عليكى" ، " المصرى ماركه مسجله"
يعنى هى دى مجرد فكره ومعلش بأه استحمل انا طولت عليك
عقبال الكتب الكتيييييييييييير اللى هتيجى بعده ان شاء الله
سلام
الله يبارك فيكى
اما بالنسة لاقتراحك فانا بداية بشكرك عليه لكن انا كان ليا وجهة نظر مختلفة بعض الشىء
وهى ان بما ان اليومين اللى احنا عايشنهم دول يومين تفاؤول وبهجة وحب وحنين لمصر فبقى من غير المعقول واحد يطلع للناس ويقهرهم ويفكرهم بمصر التعبانة اللى كنا بنشتمها ليل نهار
لذلك بدأت بالحاجات اللى احنا عايشينها اليومين دول واللى حاسينها واللى معظم الناس بتدور على اىا حجاة تخص الثورة
لكن اللى قبل الثورة ماعدناش عايزين نسمع عنه حاجه
لذلك حبيت اسب القارىء بدون شعور من جو الثورة الى جو قبل الثورة وبالتالى هو هايحس بالقهر والمرمطة اللى كنا عايشنها
الموضوع ده مش عند انا بس فى كتاب كتير لغوا كت ليهم وفى افلام اتلغت عشان كان كلها بتتكلم عن الوضع المأساوى اللى كان قبل الثورة وكان اعتمادنا كله عليه
زى لو تفتكرى احنا كان كل معظم كتابتنا ضحك على حالنا
اما دلوقتى فغير فهمتى
اما الاقتراح التانى فبرضه ما حبتش اكتر جرعة ما قبل الثورة دى عشان ما أزهأش الناس منى وخصوصا المقالات دى بتوجع أوى واحنا ما عدنا ناقصين وجع عايزين نضحك بقى
تسلمى على اقتراحاتك وعجبتنى جدا وياريت الناس كلها كده
وعلى فكرة حاسسنى عارفك وبستغرب انتى ليه ما كتبتيش اسمك
نورتينى :)
انا كده فهمت وجهة نظرك وكويس ان افكارى نالت اعجابك
وفعلا عندك حق خلينا نعيش فى تفاؤل وكفايه الايام اللى مرت علينا وان شاء الله حال مصر هيبقى احسن ومفيش حد هيقدر يتريق علينا تانى
اما بالنسبه لاسمى فأنا حبيت اشوف انته هتعرف انا مين ولا لا
ياترى بأه انا مين؟؟؟
إرسال تعليق