ملهم الثورة والشريك المنتدب لها الشعب التونسى... الأب الروحى ورئيس مجلس إدارة الثورة خالد سعيد... المدير التنفيذى للثورة وائل غنيم... كوماندوز ومديرين إدارات الثورة شباب 25... موظفى الثورة الشعب المصرى الثورجى... القسم الإعلامى للثورة الجزيرة واليوتيوب... موظفى بوفيه الثورة الجماعه اللى ملهمش فيها ووجعو دماغنا ع الفاضى... سواقين الثورة الإعلام المصرى خاص وحكومى... عملاء الثورة المصرىين اللى فرحانين فى الشوارع دلوقتى... شركات صديقة للثورة الشعب العربى... شعار الثورة ربنا كبييييييير...
عرف التاريخ مسميات مثل الرئيس السابق والرئيس الراحل والرئيس المغتال والرئيس المتنحى والرئيس المخلوع والرئيس الهارب لكننا أصررنا أن نضيف بصمة فى التاريخ الحديث فظهر عندنا الرئيس المُتخلى... فذلكة مصرية...
فى الشهر الماضى استطاعت تونس ان تخلع رئيسها من السلطة فى 24 يوما ونحن استطعنا أن نخلع رئيسنا فى 18 يوما يعنى هذا أن الفرق بيننا وبينهم ستة نقاط... حتى ماتشات السياسة مش عارفين تكسبونا جتكو خيبة...
على الإخوة الجزائرين أن يستعيدو روح ماتش السودان وأن يكونو على ثقة أن الفوز سيكون حليفهم لكن بشرط اذا اقتنعو أن الأمن الجزائرى مش زى شوية الفنانين السيس اللى عملتو عليهم رجالة ساعتها... يالله ،، حظكوا اننا ماكناش هناك كنا خلعناكم وخلعنالكم بوتفليقة بالمرة...
عرضت شاشات التليفزيون صور الشعوب العربية فى لحظات صادقة وهى ترقص مهللة فى الشوارع فرحا برحيل نظام مبارك مما يؤكد لك انه كانت ايده طايله وكابس على نفسهم هما كمان... لذلك كانو بيطلعو غيظهم منه فى المصريين اللى عندهم...
قبل الثورة كانت هناك علاقة زواج بين النفاق والكذب... أثناء الثورة حدثت بينهم مشاكل ربما تؤدى الى الطلاق... بعد الثورة حدث الطلاق بالفعل وبيشرشحو لبعض دلوقتى على الفضائيات...
عندما جلست على الرصيف فى اخر مسيرة جلست بجوارى حاجه فى الخمسينيات فسألتها "هو انتى ياحاجه جايباها مشى معانا من التحرير" فقالت لى "أيوه يابنى منه لله بأه اللى مشحططنا ،، ياخويا ماكانشى عارف يعمل القصر بتاعه جنب التحرير ويريحنا"... لقطة من فيلم الطريق الى القصر الجمهورى
امتلأت الشوارع بالامس بالملايين من المصريين بعد اعلان تنحى الريس ودقت أبواق الفرح والطبول مما يطرح عدة أسئلة:
1- هو مين اللى كانو مع الريس وبيحبوه؟؟
2- امال مانزلتوش ليه يوم 25 كنا خلصناها فى ساعتين وخلصنا؟؟
3- هو دلوقتى حظر التجول كان معمول لمين؟؟
4- هو مين بأه اللى بيحمو بيوتكم دلوقتى من البلطجية إياها؟؟
5- هو انتو نزلتو الشارع فرحانين ولا عشان متعودين تنزلو الشارع لما تسمعو أغنية حماده هلال؟؟
من فاته تسجيل اسمه فى يوم الغضب 25 وجمعة الغضب 28 والمليونية الاولى والمليونية التانية واحد الشهداء ومليونية الثلاثاء وخميس الاشتغالة بتاعة الريس وجمعة الرحيل فعليه أن يلحق الأن بيوم الاستعباط بقوله انا أصلا من جوايا كنت بكره الريس وكنت عايزه يمشى...
فى الأمس بعد رحيل الريس فرح الجميع فى ميدان التحرير وظهرت شعارات جديدة واغانى جديده لكن أكثر شعار ردده الشباب وغنوه رقصا وفرحا وانسجاما عندما قالو "وهانتجوز هيه هيه ،، وهانتجوز هيه هيه"... حتى البنات كانت بتغنى معاهم خلاص؟؟ مفيش خِشا...
بعد الثورة أعتقد أننا لن نجد من يسب مصر ويلعنها ثانيةً وان شاء الله مصر هاتتشال فوق الرؤوس تانى وهانفضل راسنا مرفوعه وهانعيش ايام كلها لووووووز لووووووز على رأى واحد صاحبنا...
وأخيرا بنبارك لكل الشعب المصرى والشعب العربى وخاصة كوماندوز الحرية وجميع من كان يدعو الله أن يكون بجوارهم ولو عن طريق التمنى ونرجو من الساده اللى كانو واجعين دماغنا ان يسمعونا اغنية يارتنى كنت معاهم ويرحمو نفسهم بأه...
16 ســــــــايق عليك النبـــى تجبر خاطرى بكلمتين...:
هههههههههههههههههه مبروك ياسيدى الف مليون مبروك بس بجد بجد جامد الموضوع ده ربنا يوفقك وعجبتنى المقطوعه دى
وهانتجوز هيه هيه"... حتى البنات كانت بتغنى معاهم خلاص؟؟ مفيش خِشا...
ربنا يهدينا جميعا هههههههههههه
اتمنى المزيد
واعذرنى بقى لو مدخلتش كتير عشان انا كمان هتجوز عقبالك يااااااااارب
وانت اكيد عارف انا مين مش كل مره هقولك منى القلب ليلى
ربنا هنيكى يا منى ويجبر بخاطرك قادر ياكريم
هههههههههههه
وهاتتجوز هيه وهاتتجوز هيه
مبروك مقدما
ههههههههه تسلم ايدك يامحمد جامده بجد
إنت فظيع من يومك
( ده مدح والله )
هههههههههههههه
ألف مبروك ياثورجي ياأصيل
أنا مبسوطه أوي
وأقدر أرجع اليمن وأنا مطمنه عليكوا
:))))))
دمت دائما محب ومخلص لتراب وطنك
^_^
الموضوع جامد يا هندسة ويارب من نجاح الي نجاح وحلو موضوع الجواز دة ياريت تحط اسمي معاهم
كده يا حجاز تخليني ازعل منك,ماقلتلك خلي بوتفليقة في حالو اقولك حاجة ماهو دول الي انت عايزهم يتشطروعندنا بوتفليقة نفسو بعتهم للسودان يبقى يخلعوه ليه؟؟؟؟؟؟؟ماممكن في ام درمان تانية حيضمنو منين الي يجي بعدو يوديهم تاني ههههههههههه وماتنساش اني من بتوع النظام............
بس عموما كالعادة مبدع ربنا يوفقك
على فكرة ألى ماشركش فى الثورة ندمان
وربنا يخلى ارجاله أما ؟؟؟؟؟؟؟؟ ألى كانو أعدين فى البيت ..........ويارب أنتا عارف
@ غادة
والله انتى الى اصيلة وربنا يحررلكم اليمن وتبقى عالية وحره زينا كده
وتفضلى منوره مصر كده وانا عندى طلب لما تروحى هناك احكيلهم عن مصر واهلها
وياريت تكتبلنا تدوينة عن اهل اليمن الطيبين
نورتينى
@ غير معرف
معلش نسيتك اصلك مش كاتب اسمك
تسلم ايدك انته ونورتنى والمره الجايه اكتب اسمك خلاص مبارك مشى وماعدوش بيقفشو فى حد
@ وائل
يارب ياخويا يارب وماتقلقش هاتنادل معاك وانته طبعا عارفنى ابو الندالة
ههههههههههه
تسلم يابرنس
@ سمية
يابنتى انتى مش قادرة تفهمى ليه ده الخلعان فى مصلحتك مش قلتلك هانخلعه ونجوزهولك مادام بتحبيه اوى كده
ههههههههه
شكرا ياسمية ونورتى المدونة حداتنا
@ محمود
صديق الكفاح كلامك صحيح وهما دلوقتى اى واحد فيهم كان راكب مترو بيعدى ع التحرير هايقولك انا كنت معاهم
هههههه
تسلم ياريس
مبروووك لينا كلنا وان شاء الله اللى جاى احلى
gh
هههههههههههههههههههههههه
الحركة اللى فاتت دى حركة تموين يعنى بس للاسف المدونة طلعت ندلة ومارضتش تمسح كل حاجه
معلش معلش عندى المرادى
وانا على كلا مسحتها ماتقلقش سرك فى بير
نورتنى ومبروك عليك
ههههههههههههههههههه
ههههههههههههه
مش عارف يعمل القصر جنب التحرير
هههههههههههههههههههه
الخطة اللي جاية باه ننقل القصر
D:
مبروووووك يا محمد
يا رب مصر تنهض و تتقدم بينا يا رب
بجد انا متفائلة جداااااااااااا
دمت مبدعا يا فندم
:):):)
ولاء
دا والله ياولاء انا اول ما شوفتها ذهلت وفضلت اشتم فى البعيد اللى اسمه مبارك ده
وماتقلقيش مصر كلها متفائلة وان شاء الله كلنا رايحين للأحسن
خطوة عزيزة ياولاء شرفتينا
:)
إرسال تعليق