بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



السبت، فبراير 05، 2011

مفارقات من المظاهرات...(1)


فى جمعة الغضب وفى شارع طلعت حرب قبل بداية المظاهرة رأيت الجميع يرتدون كوفيات ويضعون أيديهم فى جيوبهم ويلتفتون هنا وهناك ويهمهمون لبعضهم البعض ويقفون على النواصى (زى بتوع المخدرات بالظبط) وظلوا يتفرجون على جموع الأمن المركزى الى أن تشجعت مجموعة وبدأت المظاهرة ومن ثم انضم الجميع...


الجميع يتهمون الجزيرة بأنها عميلة وفرحانه فينا وماتتفرجش عليها مع انها أعلى نسبة مشاهدة من المصريين أنفسهم واكثر حرفية من الباقيين ودائما صاحبة السبق الصحفى ومن المدهش حقا أننا عندما كنا فى جمعة الغضب كانت سببا فى لم شمل كل الشوارع المؤدية الى ميدان التحرير لأن الأمن كان يحاصر كل مظاهرة فى شارع وينفرد بها ويمنعها من الوصول للاخرى ولا نعرف بوجود مظاهرات اخرى فى الشوارع المجاورة بسبب انقطاع كل وسائل الاتصال وأخبرتنا الجزيرة بذلك وكانت سببا فى لم الشمل وهرب الشرطة...


من العبقريات للتغلب على القنابل المسيلة للدموع استخدام رمز المقاومة الأول البصل (وربنا يخليلنا ستات البيوت اللى كانوا بيحدفولنا بصل من البلكونات) وغسل الوجه بالبيبسى لان الميه بتحرق العين وبتقفلها والخل يساعد على الانتعاش وعدم الاغماء... واكتشفنا أن القنابل صنع امريكا بالرغم من أن البصل صنع ربنا...سبحان الله


من الله عليا بدخول فندق رمسيس هيلتون حينما حاصرتنا الشرطة بالقنابل المسيلة للدموع ولم نجد مخرج الا بالدخول الى الفندق... شوفتو قيمة المظاهرات بأه...


يوم خمسه وعشرين كان بيتقال علينا شباب سيس... ويوم الجمعه كان بيتقال علينا أرجل جيل فى مصر... وبعد خطاب الريس الأخير بيتقال علينا عملاء وأصحاب أجندات خارجية وجبة كنتاكى... وعجبى


من الملاحظ فى الأيام الفائتة أن بعد كل مظاهره الريس يطل علينا بمؤتمر الساعه 11 ليلا هو الريس ما بيصحاش الصبح ولا ايه...


التليفزيون المصرى كان يثبت كاميرا على النيل ناحية اليمين ليؤكد قرار حظر التجول المفروض بالرغم من وجود الألاف المفترشين لميدان التحرير ناحية الشمال مما يؤكد أن الكاميرا تحتاج الى ضبط زوايا...


التليفزيون المصرى والفضائيات المصرية ظلت تتجاهل الأحداث حتى يوم السبت الماضى وظل يكذب ويكذب الى أن اختلق قصة احموا بيوتكم والعملاء الخارجين والاجندات الخارجية وبدأ الهطل ينزل ع المصريين ويصدقوهم دا على اساس هو بيكدب اسبوع أه واسبوع لأ يعنى...


أعطى المتظاهرين فرصة ذهبية للناس لرؤية الدبابات والتقاط صور للذكرى (اى خدمة فى ناس ماتت ماشافتش الكلام ده) وسمعوا ماكان يسمى بحظر التجول فى التليفزيون المصرى ولم يعرفوا أين هو فنزلوا الى الشوارع ليبحثوا عنه ولم يجدوه بردك...


نجح الساسه بامتياز باقناع الجماهير بحل فزروة البيضة ولا الفرخة الأول وطرحوا عليهم عدة أسأله... يعنى انته عايز البرادعى بتاع امريكا هو اللى يمسك البلد؟؟ دا على اساس مبارك مش بتاع امريكا... ولا عايز الاخوان اللى تمسك البلد دا هيقيموا علينا الحد؟؟ والنبى ياخويا الاخوان دول مالهم حظ المظاهره اللى يقولوا مش هاننزلها تنجح واللى ينزلوها تفشل... ولاتفتكر مين اللى هايمسك مكانه ماهو مفيش غير دول والبلد هاتقلب فوضى؟؟ دا على اساس ان 80 مليون مفيش فيهم واحد بيفهم ليه هى البلد كلها لا مؤاخذه بهايم...


قال لى صديق شوفت الأفلام الهندى اللى عاملاها قناة المحور فقلت له من فضلك لا تقلل من قدر الأفلام الهندية فهى أكثر حرفية من ذلك فهذه أفلام مصرية مية المية دا ماحصلتش أفلام صينى ياراجل...


والله حاجه تجنن قبل يوم خمسة وعشرين كانوا بيقولوا علينا صيع وبيسهروا طول الليل يشربوا بانجو ودلوقتى بيقولولنا اسهروا براحتكوا واشربوا براحتكوا واعملوا كل اللى عايزينة بس احموا بيوتنا... شاب صايع يتسائل...


معظم المسئولين يرددون كلمات مثل (بقى بلد مالهاش ميتين سنة هاتعلمنا نشتغل ازاى وتقولك التغيير ناو) يعنى هى أمريكا بقت كخه دلوقتى مش دى اللى كان جمال مبارك واخدها رايح جاى كأنه راكب ميكروباص وبعدين دا المفروض تخلى عندك دم ازاى دولة بقالها ميتين سنة وتقود العالم وانته بقالك سبع تلاف سنة وحالك كده يصعب ع الكافر...


فجأه انطلقت التكبيرات وصرخ الجميع فرحا وانهمرت دموع الفرح والجميع يهلل ويهلل لحظة رؤية هروب الشرطة بعد الحصار الشديد لوقت طويل ونزول الجيش قائلين الجيش المصرى أهو الجيش المصرى أهو... من أجمل اللحظات فى حياتى يوم جمعة الغضب بعد المغرب...


فجأه انطلقت التكبيرات وسجد الجميع ودمعت العيون وهلل الكل واتنططوا على الأرض وصرخوا قائلين مبارك هرب مبارك هرب... خبر كاذب سمعناه يوم السبت 29 فى ميدان التحرير وخليك فاكر اللى كدبته الجزيره وهذه من أجمل اللحظات الكاذبة فى حياتى أيضا...


فى النهاية اذا أردت أن تتابع الأحداث فشاهد الجزيرة والعربية والبى بى سى واذا أردت أن يرتفع ضغط دمك فشاهد التليفزيون المصرى وفضائياته... واذا أردت أن تضحك من قلبك وخمسة لصحتك فشاهد المحور والفراعين...




14 ســــــــايق عليك النبـــى تجبر خاطرى بكلمتين...:

ههههههههههههههه موتنى من الضحك بجد عندك حق يامحمد فى كل كلمه ربنا يستر ويلطف الايام دى ويعديها على خير يارب
انا من اول النت ما رجع مصر وانا بدخل المدونة اشوف الجديد وسيادتك لسه عامل الموضوع النهاردة
ربنا يوفقك دايما
انا لغيت حسابى على بلوجر وجوجل عشان المحاكمه بعدين

منى القلب ليلى

هههههههههههههه
ملكش حل بجد وهميييييية
-----
أعطى المتظاهرين فرصة ذهبية للناس لرؤية الدبابات والتقاط صور للذكرى (اى خدمة فى ناس ماتت ماشافتش الكلام ده) وسمعوا ماكان يسمى بحظر التجول فى التليفزيون المصرى ولم يعرفوا أين هو فنزلوا الى الشوارع ليبحثوا عنه ولم يجدوه بردك
--------
فزيع يا محمد
تسلم ايدك
استمررررررررررررررررر
:]:]
:D

"فى النهاية اذا أردت أن تتابع الأحداث فشاهد الجزيرة والعربية والبى بى سى واذا أردت أن يرتفع ضغط دمك فشاهد التليفزيون المصرى وفضائياته... واذا أردت أن تضحك من قلبك وخمسة لصحتك فشاهد المحور والفراعين
"
هم يضحك وهم يبكي ..
صدقت أخي الكريم في كل حرف سطر هنا .. الوضع أصبح لا يطاق بالفعل ..

قلمك مميز .. لا عدمناه ..

احترامـــــي

هههههههههههههههه بجد اصلا من الاول برنامج 48 ساعة ولا مش عارفة اسمة دة برنامج كوميدي ومن اول يوم اتذاع فية وانا كنت بحسبة الكاميرا الخفية علي كمية التخريف اللي كان بيتقال فية وعلي دماغ المذيعة والمذيع مع احترامي لانسانيتهم الادمية ههههه

ولا لو شوفت شريف امبارح ف المحور اقترح علشان العربيات تمشي براحتها ف الميدان ان الناس تقعد فالجنينة بتاعتة ههههههه لا و بيقول انا مخضوض جدا من اللي بيحصل اللي هو ف ناس ماتت علي فكرة وانت مخضوض طب ياعم اسفين علي خضتك ياختي

اما بالنسبة للتفلزيون المصري فاياريت متزعلش منة لية بقي لانة عبد سيده
كلب الحكومة يمين يمين شمال شمال
واحد اتصل بيقول انا كنت قاعد مع بتوع ميدان التحرير فكرني باحنا بتوع الاتوبيس
اول كام يوم بس بعد الخطاب حاولت اروح تاني واقولهم يرجعو قالولي انت جاسوس وفي ناس منهم تعرفني وكانت بتشوفني معاهم
طلعت علي قناة اقول فكرتي قطعو عليا الارسال ولا داعي لذكر اسمها قامو المذيعين الاتنين بقمة الجرائة ومطلق الحرية قالولو لااااااا قول اسمها مهو لازم الناس تعرف هو في حاجة بتستخبي قال يعني جامدين قوي

ربنا معاكم ف الميدان وف كل مكان بس انا عندي تعليق بسيط ويمكن بعبر بية عن لغبطة حاصلة ف دماغي ويمكن الموضوع دة ف دماغ ناس كتير مع اختلاف رد فعلهم
انا بردة حاسة بالدايرة المفرغة اللي احنا بندور فيها وقصة البيضة والفرخة طب اية النهاية واية الحل واخرتها هل لو كان الموضوع بيأثر فية كان ساب كل دول يموتو هل المرحلة دي الاعتصام فيها بردة هو الحل الوحيد وبعدين كمية اختلاف ف الاراء اللي بيقولو عليها ف لجنة الحكماء وبعدين

كمان فكرة الاغاني و تلحقين الشعارات
بصراحة حاسة ان الموضوع قلب كوميدي وشوية من الناس عاملين بيدجات تقول خليهم قاعدين لسبتمبر واحنا هنصلح مصر يعني هل هندخل ف مرحلة تجاهل
انا شايفة ان الثورة اللي حصلت احسن حاجة حصلت ف مصر وكنت سعيدة جدا ف الاول اول ما شوفوت ردود افعال الحكومة غصب عني تعبت وحسيت ان الامل بيبعد
ولما الموضوع طول خوفت انها تبوظ وينجحو في خططهم

بس لسة عندي ثقة فيكم وف ربنا لابعد الحدود واتمني افهم لان فعلا الموضوع مخادع وحيلة كتيرة

ربنا معاكم

جامده جدااا بجد

تسلم :)

منى

دا العادى يابنتى بس انتى كنتى مختفية وعرفنا ليه الحمدلله وربنا يتمملك بخير
وموضوع الكتابة ما انتى عارفه انا كنت عامل اجازة شهر ولما الشهر خلص المظاهرات قامت فما كناش فاضيين بأه

دا اللى متعود عليه منك يا منى
:)

ولاء

لتانى مره بقولك متشكر ياولاء ونورتينى ونورتى المدونة ويارب دايما اكون عند حسن الظن

مهرة عربية

أشكرك بشدة وده اللى أنا شوفته بعنيا لا كلمة زيادة ولا كلمة ناقصة وفعلا زى ما قولتى هم يضحك وهم يبكى
نورتنيى فى عز الضلمة اللى احنا فيها اليومين دول

:)

My Hopes

انتى فكرتينى بالبنت اللى طلعت فى التليفزيون وبتعترف انها تلقت تدريبات على يد الموساد ولقيت واحده زميلتى بتقولى والله مصر لسه بخير فيها الجواسيس ضميرهم بيأنبهم وبيعترفوا على التليفزيون قدام كل الناس

عارفة احنا فى دايرة مفرغه ليه لاننا تفرقنا ولو كنا فضلنا على ايد واحده زى جمعة الغضب كلنا كنا واحد حتى اللى مانزلش كان بيدعيلنا من قلبه
لكن دلوقتى اللى ماعدتش بيدعى واللى بيلومنا واللى بيتهمنا واللى بيحملنا مسألة الفوضى واللى واللى واللى
لذلك هو بيعاند باصرار لانه استطاع أن يفرق الحزمة اللى اطاحت به فى البداية
وانا شخصيا لا أثق فى حكومة تدعى أنها ستقوم بالاصلاح رغم أن خطوة فعلتها فى الاصلاح هو الكذب الحصرى ع التليفزيون المصرى

متشكر يا ماى هوبز ونورتنى المدونة ويارب رجلك تاخدها عليها اصل انا بعمل عمل اللى يدخلها
:)

رائعه
قريتها على االفيس
تسلم ايديك

محمود(باحث عن حب)

تسلم ياريس واهلا بيك هنا او ع الفيس
نورتنى

ههههههه

جميل جدا اسلوبك يامحمد ودمك خفيف

شكرا على البوست الجميل

ALLELIO-عليــــلـــيـــــــــــــــــو

متشكر ياعلى ربنا يكرمك ونورتى مدونتى
بس على فكرة الناس اللى ماتت دى شهداء
:)