بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



السبت، فبراير 05، 2011

مفارقات من المظاهرات...(2)


بعد مظاهرة الجمعة أقيلت الحكومة وبعد المليونية الأولى أعلن عدم ترشحه وتعديل الدستور وبعد المليونية التانية استقالت هيئة الحزب الوطنى بالكامل لذلك أقترح ان يتم تقسيم أيام الأسبوع السبعة على ال80 مليون بحيث يتظاهر كل يوم 11 مليون والباقيين يشغلوا البلد وبهذا الشكل نحصل على تنازلات بشكل اسرع وبالمره البلد تشتغل ويمشى حالها عشان الحجج الفارغة اللى بنسمعها...


بعض الوزراء السابقيين كانوا يؤكدون أنهم لن يحدث أبدا بأن يطلق عليهم لقب وزير سابق مادام هو على قيد الحياة... والأن ربنا ماحرمهمش من حاجه فقد حصلوا على لقب وزير سابق ووزير ممنوع من السفر ووزير مجمد أمواله ووزير مقدم بلاغات ضده ووزير مهدد بالسجن... شوفت كرم ربنا


التليفزيون المصرى ظل يوميا يعرض لنا صور المسجلين خطر الهاربين من السجون ويذيع باهتمام بالغ أخبارهم واليوم قرر الذهاب الى السجون وعمل لقاءات معهم ولاحظت أن الكاميرا تتعمد الزووم على وجوههم لكى نرى البشلات المنتشره فى خِلقتهم فهل نفهم من ذلك أنهم يريدون أن يقولوا لنا "عووووو"؟؟ طب الشعب بيقولكم "يامّـه!!! اتخضينا"...


لاحظت أن بعض الشخصيات العامة تتصل بالتليفزيون المصرى ويشتم فى المتظاهرين ثم يتصل بالجزيره او العربية ويشيد بما فعله المتظاهرين... ايه يعم هو موسم


بعد هروب الشرطة لاحظت أن المواطنين مازالوا يصرون على شراء التذاكر فى المترو والامتناع من القفز على ماكينات المرور... والله شعب طيب أمال مين المخربين دول


من فوائد الثورة... أنه قبل الثورة كان مستحيلا اقناع شخص بأنه قد يستطيع العيش من غير موبايله... والأن أثبتت الثورة أنك تستطيع العيش من غير موبايل ومن غير نت ومن غير ميه كمان لو عايز...


من فوائد الثورة... الكمين اللى قدام بلدنا ماعدتش بيبلطج على حد وواقفين زى قلتهم وبالتالى السواقين ماعدوش بيبلطجو على الناس... إذا أخى المواطن تمتع بمواصلات من غير بلطجة فى الفترة القادمة


من فوائد الثورة المشى مسافات طويلة بدون المعاناه من وجع الرجلين... والصبر على الجوع يوما كاملا بدون الشعور بالألم... والجرى أمام الأمن لحد ما الواحد نفسه اتقطع...


من فوائد حظر التجول الناس تقعد فى بيوتها وتخْلى الشوارع عشان الحرامية والبلطجية يشوف شغلهم براحتهم...


كنا نعرف نوعين من الدموع دموع الفرح كالتى نراها عند فوز المنتخب ودموع الحزن كقهرة قلب أهالى مفقودى العبارة وأخيرا بعد خطاب الريس الأخير عرفنا نوعا ثالثا وهى دموع الحشتفه كالتى شاهدناها من قبل مذيعات الفضائيات المصرية...


كنت أعانى من عدم وجود أصدقاء لى فى المظاهرات فقررت أن أصنع صداقات وبالطبع كنت أكذب بشأن اسمى (الأمر مايسلمش بردك) ولكن بعد كل صداقة كانت تهجم الشرطة فنجرى متفرقين فيتوه منى الصديق ويكفى أن أخبرك أننى صنعت خمس صداقات تائهة الى الأن منها لله الشرطة بقى...


وأخيرا نتنمى أن يحصل المتظاهرين على مطالبهم حتى ينعم الشعب المصرى بمستقبل واعد وحر وعشان اللى قاعدين فى الضل يقولوا يارتنى كنت معاهم يارتنى كنت معاهم... لقطة من فيلم الطريق الى ميدان التحرير



6 ســــــــايق عليك النبـــى تجبر خاطرى بكلمتين...:

ألف حمد وشكر ليك يارب أخيرا أخدت طارك من السواقين ومن بتوع الشرطة اللهم لا شماتا ياأخى والله انا فرحانه فى السواقين عشان يبقوا يتبلطجوا علينا وكمان ظباط الشرطة بقوا شبه الغفير اللى اتسرقت منه البندقية
ههههههههه محمد انا سمعت ان المرتبات هتزيد ياترى الاخبار دى ممكن تبقى صح بما انك متابع يعنى

بجد يسلم قلمك يابشمهندس

منى القلب ليلى

تحفة

انا بعد أذنك شيرتها على الفيس

منى

تصدقى انى دى اكتر حاجه مبسوط منها وبقيت انا اللى ببلطج على السواقين
واى حد يكلمنى اقوله لا دا الكلام ده كان قبل الثورة
هههههههه

اما بأه بالنوسبة للمرتبات حضرتك فللأسف نقصوها قال ايه عشان اقتصاد الدولة بيمر بفترة عصيبة لو كنت أعرف كنت نزلت اتظاهرت عشان مبارك
ههههههه

دايما منورانى يا منى

شمعة
تدفعى كام؟؟

وبعدين ايه موضوع وعامله نفسى شمعة
يعنى شمعة مستخبية يعنى ولا ايه

نورتينى ياكندى

جامد جداااااا يا محمد و الله
عجبني الجزء دا أوي
--
كنت أعانى من عدم وجود أصدقاء لى فى المظاهرات فقررت أن أصنع صداقات وبالطبع كنت أكذب بشأن اسمى (الأمر مايسلمش بردك) ولكن بعد كل صداقة كانت تهجم الشرطة فنجرى متفرقين فيتوه منى الصديق ويكفى أن أخبرك أننى صنعت خمس صداقات تائهة الى الأن منها لله الشرطة بقى
----
بس و الله في يوم لما تتلاقوا
هتحس بشعور جميل أوي
ربنا يجمعكم تاني يا رب
:)

تسلم ايدك و الله مبدع
:):):)

ولاء
كلامك صج فعلا ولو لاحظتى هاتلاقى واحد منهم كتبلى على الشات اللى فى البنر وقالى انه فضل يدور عليا كتير بعد الفركشة وانا قولتله يبعتلى ميله

بجد ناس جميلة وايام اجمل

نورتينى ياولاء وتسلمى على اهتمامك