مقال من صفحات كتاب مصر م الاخر...
أنا الأن ومنذ 25 عاما لم أعيش الا فى ظل حكم رئيس واحد -وإحتمال يكون هو اللى عندكم دلوقتى أو حد من العيله يعنى- والذى تميز عصره بعصر الحكمه والرخاء والنهضه والإزدهار والتنميه وشق الترع وإقامة الكبارى ومد الطرق وإنشاء المجتمعات العمرانيه الجديدة والمصايف فى مارينا وبورتو السخنه وتسهيل حركة المرور والمواصلات ودعم المواد التموينيه واللحمة رخيصة والنت 2 ميجا واليوتيوب مفتوح والفيس بوك للجميع والفضائيات شغاله 24 ساعه -وكل حاجه قشطه بالصلاه ع النبى-... بل ونغنى ليلا ونهارا بالمسئولين الذين يخبرونا اننا نعيش ازهى عصور الديموقراطيه ويقدمون لنا تقاريرهم التى تثبت اننا فى افضل حالة كساد اقتصادى شهدتها البلاد -اه والنبى شوفت!!- والكريدت كارد أصبحت الوسيلة التى يتعامل بها كافة الطبقات الاجتماعيه عند البقال والمحمول بقى فى يد الجميع والفلاش ميمورى هى الاخرى فى جيوب كل المواطنين رايحين جايين وكله فى اطار البرنامج الانتخابى للرئيس-وده اللى هاتلاقيه مكتوب فى كتب الوزاره-...
ولو حاول أحدهم الضحك عليك والتهكم بك وإخبارك بأننا ما كناش لاقين شغل وكانت نسبة الفقر عاليه ونص الشعب مسافر بره والنص التانى بينتحر... وإزداد كره العرب لينا كنتيجة لتلك الحكمه اللى واجعين دماغنا بيها... والترع نشفت من قلة الميه والنيل اللى احتمال يكون عندكم بقى ذكرى... والعبارات اللى بتغرق مش بيتقال عليها نكت ولا حاجه... ولا الاباحيات موجوده فى البيوت 24 ساعه.. ولا الشرطة هى اللى بتتحرش وبتعاكس البنات فى الشارع عينى عينك كده... ولا فى شغل استكراد واستنطاع من المسئولين اللى بيحسسوك انهم عاملين فينا جميله وسايبنا ناكل عيش فى البلد دى... ولا الغناء أصبح سافر والبغايا يطلق عليهم سيدات الصف الاول فى المجتمع... ولا النصابين ومنعدمى الضمير بقوا رجال اعمال ومعارضه لكشه واحده... فأكيد أكيد هذا الراجل من المعارضه والقله المندسه-ركز ع المصطلح ده شويه والنبى عشان هايفيدك كتير- وبيفترى عليهم ولاتصدقه...
ومن الثابت أن المعارضه كانت واخده راحتها خالص ومبحبه كمان وتقول اللى نفسها فيه... وينظمون المظاهرات والمسيرات وجرايد تتحدث باسمهم واحزاب هنا وهناك بل وكانت لهم كتلة فى مجلس الشعب وكانوا عاملين شغل جامد ويقدمون استجوابات وطلبات احاطه بشكل دائم ولكن لاحياة لمن تنادى... ونصيحتى لك ياصديقى لا تستمع أبدا الى قوى المعارضه تلك ولا تعمل عقلك بعقلهم -أصل والنبى ما منهمش رجا- فهم أناس بيعضوا الإيد اللى بتتمدلهم وبيرفسوا النعمه برجليهم… وبينكروا مدى الرفاهيه التى ينعمون بها ومدى حرية الرأى التى يستظلون بها... فعندنا الجميع له الحق أن يتكلم ويعترض ويسب -ويصدر اصواتا كمان لو عايز- لكن فى اطار المعقول والادب والاحترام والريموت كنترول -واهم حاجه الريموت كنترول- والحدود الموضوعه والمقننه سلفا طبقا لنظرية الخطوط الحمراء... وسيبوهم يقولوا اللى فى نفسهم مش احنا فى بلد ديموقراطى ولا إيه...
4 ســــــــايق عليك النبـــى تجبر خاطرى بكلمتين...:
طبعا يابشمهندس احنا فى بلد ديمقراطى ولا ايه سمعنى سلام صعبت عليا نفسى على رأى البت اللى فى الفيلم
مش عارفه ليه قلبى حاسس ان مدونتك ستغلق قريبا
منى
ما انا ماقولتش حاجه وربنا دا انا بشتم فى المعارضه انتوا بأه اللى بتفهموا بالمقلوب
وياستى تغلق وايه يعنى هاعمل غيرها
هههههههه
الكتاب هيعمل ضجة يا محمد وبعدين ممكن يعتقلوك وساعتها دي تكون دعاية جامدة جدا للكتاب .....هههه
تحياتي
رحاب
يعتقولنى!!
لا ان شالله ماعمل دعايه ولا اتباع اصلا مين قال انه يتباع دى مش كلامى اصلا دا البلوج اتهاك عليه من فترة كده
:D
إرسال تعليق