إضحك او إبكى اللى يريحك...

اظاهر ان انا الوحيد اللى بقيت بكسب ثواب فى البلد دى

الزمان: الخميس اول يوم فى شهر 4 وفى تلات تيام اجازه عشان عيد المسيحين وشم النسيم.

المكان: موقف عبود والظاهر الله اعلم هما عملوا الموقف ده عشان الركاب تيجى تركن فيه والعربيات هى اللى عايزه تسافر تبقى تيجى الموقف ده وهاتلاقى ركاب .

وكالعاده يعنى زى اى مره لازم تحارب وتجرى وتضرب وتتنطط وتتزأ وتزوء وتاخدلك رجل فى بطنك وخبطه فى دماغك عشان تركب وبرده مش هاتركب كده بالساهل لسه ما تتعبلك كمان شوية... المهم بما أن اخوكم معاه شهادة خبره فى موضوع الزأ ده والمرمطة دى فأول ما لمحت عربيه جريت عليها واتشعلقت فى الباب وحاولت اركب خدتلى بونيه فى وشى وخبطه فى ركبتى والنضارة وقعت ع الارض قولت "لالا لالا شوفنا من ده قبل كده" خدتلى غطس تحت وجيبت النضارة وركبت العربية واتخبط منى اللاب قولت "وماله كله عشانك يامصر قصدى كله عشان نلاقى مكان"... لقيت واحد بيقولى المكان ده محجوز فكان الرد الطبيعى منى بعد الركوبة المحترمة دى انى اسمعه لفظ او ممكن تقول صوت ما أقدرش اقوله عشان الرقابة... وقعدت فى المكان وخدت نفسى وبلعت ريقى واحساس الانتصار وصلى وقولت الحمدلله ركبت ومش مهم الكرسى يقعد فيه اربعه مش مهم الاجره 12 جنيه زياده تلاته جنيه كل ده مش مهم المهم انى هاروح بيتنا... اذ فجأتا سمعت صوت ست كبيرة فى ودانى بيقول "ربنا ينتقم منك ياظالم يامفترى ان شاء الله ما تتهنى ان شاء الله ما تكسب ان شاء الله ما تفرح ابدأ"... بصيت عشان اشوف مين اللى بتدعى دى وبتدعى على مين... اكتشفت انى انا المقصود بالدعاء ده وأنا لا اعرف الست دى ولا عمرى ما شوفتها قبل كده... فحاولت ان افهم الموضوع اكتشفت ان الست دى بينما انا احارب ع الباب عشان اتنيل اركب هى جات من الشباك وحطت شنطتها ع الكرسى... وانا ساقنى القدر انى اتنيل برده واقعد على نفس الكرسى ده... وبالتالى هى اعتقدت انى ظلمتها واحتارت اوى هى ليه بتدعى عليا انا ما بتدعيش ليه على الناس السبب فى البهدله دى... الناس اللى خلونا نتنازل عن كرامتنا فى كل شىء... الناس اللى خلوا اسوأ طبقه فى المجتمع تتحكم فى خلق الله ويقولك مش عاجبك ما تركبش... الناس اللى اجبرتك انك تقعد رابع فى كرسى اربع ساعات وتدفع اجره اكتر... مش انا ياحاجه اللى المفروض تدعى عليه انا زى زيك... وبما ان هى ما تفهش الكلام ده... وبما ان انا اعرف قهرة المظلوم كويس... وبما انا وجعتنى دمعة المظلوم اوى ... وبما انا لسه ما اتهنتش عشان تقولى ان شا الله ما تتهنى... قررت ان اتنازل عن المكان لها... يعنى هى دى الحاجه الوحيده اللى هاتنازل عنها... ولا دى الحاجه الوحيده اللى تعبت ومالقتلهاش نتيجة... قولتلها تعالى اركبى مكانى ياحاجه... فاجأنى الجميع بقولهم "ايوه كده يااستاذ عشان تكسب ثواب"... فما كان من غيظى الا انا اقول لهم "اظاهر ان انا الوحيد اللى بقيت بكسب ثواب فى البلد دى"... ولكن اجمل حاجه سمعتها بردك وهى بتقول انا مسامحاك يابنى... الحمدالله

شهامة ولاد البلد

بعد ما نزلت ووقفتلى ساعاية كده ومع تكرار المعارك ربنا كرم بركوبة فى عربية متهالكه... اه رابع بس مش مشكلة... وبدأ السواق يستف عربيته اربعات وكان قاعد فى الكرسى اللى وراه تلات بنات... والمفروض يركب معاهم رابع... فاجأ الجميع شاب مبلط وقال "لأ دول حريم ما ينفعش يركب معاهم رابع صح ولا ايه ياجماعه"... استغربت من الشهامة اللى مش وقتها خالص... واذ بالجميع تتعالى اصواتهم "ايوه صح ما ينفعش دول حريم ازاى تركب معاهم رابع"... ووصلت الشهامة لحد الركب والدم فار فى العروق واصبح السواق فى موقف محرج... وعجبتنى الصحوه الغير عادية دى قولت ياسلام لو الناس كلها كده... فما كان من عمنا السواق الا انا جابلهم واحده تقعد معاهم رابع... لقيت اللى بيقولك "ايوه كده ماشى مفيش مشاكل حريم فى بعضهم"... ايه ايه..!! ياخويا انته وهو..!! امال ايه النشوة اللى سمعتها من شوية دى والدم اللى فار والصوت اللى علا مره واحده وحريم فى بعضهم والهيصة اللى حصلت دى... ما البنات دى يابو نشوة كانت واقفه ع الاض من شوية وانته ماعبرتهمش ودوستهم بالجزمة وهرستهم فى طريقك ولا واحد خلى عنده دم وركب واحده فيهم... ولا الظاهر احنا محتاجين حد يهيصنا واحنا نهيص معاه... ما تكمل شجاعتك وطالبلهم انهم يقعدوا تلاته محترمات جنب بعض... ما تكمل يعم وتقوله المفروض ندفع تسعه جنيه... ولا تقوله احنا ليه راكبين اربعه... ولا هو الظاهر ان الشهامه عندنا بقت محدوده زى النت المحدود كده... او الظاهر الواد كان بيرسم على واحده فيهم فهاص والناس هاصت معاه... او اظاهر ان انا اللى لسه ما اشتركت فى موضوع الشهامة المحدودة دى... ياقلبى لا تحزن.