مياده الحناوى قالت " انته مكتوبلك يابختك اه يابختك نعمة* النسيان...يـــابختك"
وهى فعلا نعمة* بس لما تكون بشكلها الطبيعى بمعنى لما تحصلك مواقف زباله فى حياتك ومع مرور الوقت بتنساها تبقى دى كده نعمة لكن لما يكون الموضوع ماشى بالعكس وما تنساش المواقف الصعبه اللى فى حياتك وتفضل لازقه فى دماغك والحاجات العاديه اللى بتحصلك فى يومك بتنساها ساعتها ما تبقاش نعمة*... زى مثلا واحد طلب منك حاجه وتنسى تعملهاله... تعمل حسابك تكلم واحد صحبك وتنسى... تاخدحاجه من حد زى فلاشه مثلا وكل يوم تنسى ترجعها لصاحبها... والحاجه الرخمه بقى انك لما تاخد فلوس من حد بتنسى انته خدت كام وياترى رجعتهم ولا لسه وممكن كمان ترجعهم مرتين... وياعينى بأه لو حد استلف منى فلوس (دا كان زمان وجبر فينك يادى الايام وحشانى والله) بنساها طبعا وفجأه كده الاقى اللى جاى يدينى فلوس اقوله ايه ده يقولى كانوا عليا وانا الله ناسى... وفيه طبعا ناس اصحابى بيستغلونى احسن استغلال وبيطرمخوا ع الفلوس... المهم فى ناس بتقول دا طبعا زهايمر بس انا بقولهم تفوو من بؤوكم كفرله الشر ان شاالله اللى يكرهونى دا انا لسه صغير وقولت بأه احكيلكم على شوبة مواقف واحكموا انتوا بأه بس من غير تريقه...
انا السكن بتاعى فى الدقى بين محطة مترو البحوث ومحطة جامعة القاهره وديما كنت بركب من الجامعه فجيت فى يوم وقولت اختصر واروح اركب من البحوث ما انا كده كده برجعلها تانى روحت وقطعت التذكره وركبت المترو وبعد كده فوجئت بالمترو وصل محطة جامعة القاهره (ركبت اتجاه مخالف)...
وبمناسبة المترو اول امبارح انا كنت راجع الشقه ولقيت تلاته راكبين ومعاهم شيلة حديد انا استغربت هما دخلوا بيه ازاى المهم واحد فيهم نزل السادات وهو نازل اللى معاه قاله قولهم يستنونا فى محطة البحوث عشان يشبيلوا معانا فقولت لنفسى الناس دى نازله البحوث وهايعملوا قلق ع الباب لما اجى نازل وجات محطة البحوث وفضلت اتابع باستمتاع هما بينزلوا الحديد ازاى بسرعه قبل ما الباب يقفل وطلع المترو وعملت حسابى ان نازل المحطة اللى جايه وفوجئت انها محطة جامعة القاهره والمفروض انزل اللى فاتت...
اما الموقف ده بأه بيحصلى كتير عايز اعمل شاى اروح املا البراد واحطه ع البوتجاز واجيب الكوبايه واحط السكر والشاى و أقف فى انتظار الميه تغلى وكل شويه اروح ابص ع البوتجاز الاقيها مش عايزه تغلى وفى الاخر اكتشف انى ما ولعتش البوتجاز اصلا...
مره كنت باكل وقاعد زى العاده بتفرج ع التليفزيون وبعد ماخلصت اكل حطيت الاطباق على دهر التليفزيون والريموت فى المطبخ...
والموقف العسل بأه انى لما اكون رايح اصلى بتوضى وبعد كده انزل اجرى فى الشارع وبعد شويه افتكر انى مالبستش النضاره ارجع تانى...
واحد يكلمنى فى التليفون ويقولى عدى عليا عشان عايزك اقوله حاضر نص ساعه وجايلك وانسى اروح اصلا...
واللى بيحصلى بردك ان اجى كده العصر واقول انا هاروح عند اختى العشا ولما تيجى العشا افتكر انى المفروض فى حاجه اعملها لكن هى ايه مش عارف...
لما كنت فى الشركة الاقى حاجات كتير كده عايز اخدهم عا الهارد اقول خلاص هاجيب الهارد بكره اخدهم وعلى كده شهرين على ما افتكر اجيبه ويوم ما افتكر انسى انا كنت عايز انقل ايه اصلا...
وساعات كتير ببقى ماشى فى الشارع وفى واحد اعرفه جاى مقابلنى على بعد 30 متر وافضل افتكر فى اسمه مش عارف... و بيحصل برده انى اقول فلان جاى هناك اهو هاسلم عليه بقى ولما اروح عنده اكون نسيت انه مقابلنى واتلهى فى اى حاجه... واللى يقولى ازيك يامحمد اقوله ازيك يااااااااا اسمه ايه اسمه ايه؟؟ يلا ازيك ياباشا...
والحاجه اللى بتزعل انى ساعات انسى اكلم ناس اصحابى عشان ما سلمتش عليهم من فتره وكمان ممكن توصلنى رساله واقول هابقى ارد عليها وانسى...
وفى حاجات من دى كتير بس دول اللى قدرت افتكرهم... اللى يفتكرلى حاجه بقى يقولها... وياريت اكون ضحكتكم شويه اصل الناس كل شويه تقولى كأيتنا كأيتنا يلا هيصوا بأه وسمعنى اغنية الباشا فضل شاكر نسيت انساك...
* ربنا يرجعهلنا بالسلامه ومعاها اللى طالبينه طبعا...
5 ســــــــايق عليك النبـــى تجبر خاطرى بكلمتين...:
ههههههه والله يا سيدى حرام تخبى خفه الدم اللى زى العسل دى وتحرمنا منها بس انا شايفه انك ماتسكتش على نفسك روح يابنى اكشف واطمن احسن تكون حاجه خطيره ولا تكون معديه ولا حاجه ربنا يستر. طبعا بهزر وعاوزه اقولك مش انته لوحدك اللى كده عارف حكايه الشاى دى بتحصل معايا كتير اوى ومره كنت حاطه الموبايل فى جيبى وقلبت الدنيا عليه وفى الاخر اكتشفت انه فى جيبى اصلا وحاجات من هذا القبيل كتير بس معلش مش قادره افتكر اكتر من كده انته عارف الزهايمر بأه وده حكم السن هنعمل ايه.ههههههه بجد انا مبسوطه اوى انك الى حد ما رجعت محمد اللى بيهزر وبيضحك تانى ويارب تفضل كده على طول وياريت تكون انته كمان ضحكت من قلبك مش بتضحكنا احنا وبس . يلا بأه سلام اصل انا كتبت كتير وطولت عليك باى باى.
amira
اولا متشكر على المجامله الرقيقه دى اما بأه موضوع الدكتور اللى هاروح اكشف عنده ده فنخليه شويه عشان الدكاتره بتوع مخ واعصاب دول غاليين سبع شويات وانتى عارفه البير وغطاه وبعدين انا لسه بهزر وبضحك وربنا يخلينا دايما كده وشكرا على تعليقك وشدى حيلك فى الامتحانات بالتوفيق....
و الله موضوع زى العسل يا باشمهندس و يارب تفضل ف المود دا ع طول . فاكر انت بقى ساعه اما كنا راكبين العربيه مع عماد عند السماد و قالك ارجع بيها لورا يا باشمهندس و انت رجعت بس نسيت ان كان فيه دركسيون ف ايدك اصلا اكيد انت طبعا افتكرت عماد عمل ايه ساعتها تيت تيت تيت تيت و انا كنت اعد ورا شمتان فيك .اكيد انت عرفت انا مين صبح صبح
حاجة غريبة طبعا انك تكون بتنسي بالشكل الفظيع ده
ومع ذلك انت لسه فاكر المواقف دي كلها...ههههههه
النسيان طبعا نعمة ونعمة كبيرة جد (الحمد لله ).
والنسيان أسهل طريقة للحياة وكمان شكل من أشكال الحرية.
بمعني اصح علشان نعيش صح ونحس بالحرية صح كمان لازم ننسي .
حاول تنسي يامان بس اللي عندك دا مش نسيان دا توهان......هههههههههههه
انا حساس انك ممكن تنسي اي حاجه يحماده حتي الحزب اللي كنت انتي مؤسسه انتي يابني ربنا معاك
نصيحي من اخوك
حاول دايما يكون معاك مفكره يوم بيوم
تكتب فيها كل حاجه مفروض تعملها وتبص فيها كل شويه
وبكده هتنجز كل اللي انتي عاوزه
وبالنسبه لموضوع المترو مش لازم تبقي قاعد يعني
ممكن تقوم قبل المحطه اللي عاوزها بمحطتين وتشغل نفسك بالنزول
ما تفكرش في اكتر من حاجه في وقت واحد
خلي المفكره هيه اللي تفكرك
ودي هتديك ثقه في نفسك ودفعه للامام وهتقوي فيك الذاكره
انا مش عاوز اكتر عليك
بس يارب تفتكرني
إرسال تعليق