طول عمرى حاسس ان انا من دون كل الناس فوق... وعايش فى حلم وتايه فيه وبحلم ببكره وما كنتش فاكر ان هايجى عليا يوم وافوق... والاقى نفسى عايش تحت... والدنيا دى ياصـحبى بخت... تجرى فيها مهما تجرى وترسم مهما ترسم... ومهما جيت او حتى روحت...اللى ربنا كاتبه لازم يشوفه الخـد... واوعى تفكر ان انته مـخير... لا والنعمه دا انته مسير... ربنا كتب والامر نافذ... ما عليك انك تقول حاضر...
بس مش بقولك كده عشان تبطل حلم... لا بجد احلم وارسم بس ما تنساش تكتب حلمك فى ورقه... قبل ما يجى عليك اليوم وتنساه... ما غيرك يـاصـحبى فى بكره تاه... وتصـحى تلاقى نفسك فى يوم مش فاكر حلمك كان ايه ياولداه... ولا انته اصلا عاوز ايه... وكل اللى بتعمله فى الدنيا دى بس الواجب... بتنام من كتر الوقت... وبتاكل عشان دا معاد الاكل... وبتضحك عشان دا حق الناس عليك... وبتزعل من مـجي الناس عليك... وهاتعيش وبينك وبين اللى نفسك فيه مليون حاجب... وهاتلاقى الناس بتسألك أصعب سؤال... بم تفسر اللى بيحصلك ده...؟ طب يعم علل انته ليه حالك كده...؟
شوفت مش عارف تحل ما انته طول عمرك خايب ونايب... وعملى فيها لبن رايب...ما اصل ياجماعه والله عقدتى طول عمرى سؤال بم تفسر ... وكنت اول ما اشوفه فى الامتحان هو وعلل يركبنى الغم واقول يارب استر يارب يسر... انا والله اذا كان عليا نفسى اقول للدنيا لأ... وبالاستيكه امسح وكمان بالشكوش اكسر اى فرق... بينى وبين كل اللى نفسى فيه... واللى بحلم بيه يتحقق والناس بأه تبدأ نأ... ويقولك شوفت يعم دا راكب عربيه بيجو307... وشايل موبايل سامسونج امنيه i900... ومعاه كمان لاب توب ابل... وبيلبس ياحبة عينى هدوم ماركة... دا بيشيل الالفين جنيه فى جيبه فكة... ولو اتسرق منه حتى 500 جنيه معاه مش فارقه... والدنيا كده تمشى وتبقى حلوه والواحد ما يبقاش فاضى يرد على تعليقات حد... واعمل فيها مشغول وابقى احاول مره كده اراضيكم بأى رد... وتقول بأه شوف الندل... نيته سوده من دلوقتى... ناوى يطنشنا ويقولك معلش وقتى... طب انوى خير يعم وهى تبقى بمبى...
على فكره الكلام ده كله حلم... واعمل ايه ما انا مش عارف ابطل احلم... بس مشكلتى بحلم كتير لدرجة انى بنسى اللى بحلمه... وقررت انا امشى ورا كلام الست لما قالت "قد يكون الغيب حلوا انما الحاضر احلى"... والحمدلله على الحاضر.... ومهما كان الغيب احنا بنقول يارب حاضر....
12 ســــــــايق عليك النبـــى تجبر خاطرى بكلمتين...:
الكلام جامد بجد يامحمد والله بس كأبتنى اكتر مانا ربنا يوفقك
انا علياء صحيح, هى الاغنيه دى بتاعت وجيه عزيز
جااااااااااااااااااااامد
غير معرف
متشكر ع التعليق ويعم سيبك من الكآبه قبل ما تبقى طبع جواك وماتعرفش تخلص منه واعطى لنفسك احساس انها حلوه احسن ماتحلو اكتر من كده وما ترضاش بيها ساعتها وبالتوفيق يو تو
غير معرف
ازيك ياعلياء عامله ايه وايه اخر اخبارك؟ ايوه ده وجيه عزيز البوم ناقص حته
غير معرف
شكرا ياجااااااااااااامد
طبعا كلام الست جميل وعندها حق بس دا ما يمنعش انك تحلم ببكره ويا سيدى لو نسيت احلامك القديمه اعمل لنفسك احلام جديده بس اوعى تنسى تكتبها بأه علشان ماعنتش تنساها تانى. إحلم معايا بكره جاى...ولو ماجاش نجيبه احنا بنفسنا...مهما نقع نقدر نقوم...نشق نتحدى الغيوم...نلاقى ليلنا الف يوم...بس إحنا نحلم. There is nothing like dream to create the future.بالتوفيق يا بشمهندس يلا باى باى.
eng.sea
احلم وعيش لأنك لو بطلت تحلم هتتجنن وهتكرة الدنيا واللى فيها بس عايزين حاجه تصبرنا مش تقلب علينا المواجع
مرمر
على فكره انا هاحلم بالنهارده هو النهارده مالوش نفس ولا ايه ما كل الناس بتحلم ببكره وظالمين النهارده وبعدين انا اللى بقول ما تبطلوش تحلموا بلاش غش بأه وعلى العموم الاغنيه دى جميله جدا واحلى حاجه فيها انها سيمبل وشكرا على التعليق الجميل.
سماح
شكرا كتير ع التعليق وبعدين اصلا انا اتجننت من غير ما احلم وصدقينى المواجع ورايا وريا فقرى بأه اعمل ايه.
مش عارفه امته هنبطل نلف فى الدنيا كده من غير هدف امته بقى هنفوق ونركز فى احلامنا ونحاول نحققها تعرف انا نفسى افتكر احلامى القديمه حتى احلامى القديمه مش فكراها!!!الله يسامحك قلبت عليا المواجع أصل اكيد انا ياما حلمت بس فى الآخر...!!!على العموم مدونتك رائعه جدا .
أنا شايفه كله بيقول احلم...احلم ببكره ومش عارفه ايه بس أنا بقى معاك فى اخر حته أحسن حاجه نعيش النهارده ونعمل زى ما قالت الست ومادام الانسان مش مخير زى ما بتقول واللى ربنا عايزه هو اللى هيكون سواء كان هو ده حلمنا بأه ولا مش هو احنا هنقول حاضر وبس يبقى ليه بأه نحلم ونتعب نفسنا ولو يعنى عايزين نحلم زى بقية الناس على رأيك نحلم بالنهارده
غمض عنيك واحلم معايا و..... نسيت باقى الاغنيه يا خساره كنت عايزه اكملها...هههههه الحلم حاجه حلوه بس بقى فى ناس بتحلم احلام يقظه ممكن تتحقق بس فى المشمش يا جماعه لو عايزين تحلموا احلموا بس وانتوا فايقين وما تسرحوش أوى فى احلامكم عشان بعد كده ما ترجعوش تعيطوا انها ما اتحققتش انا عن نفسى بحط دماغى على المخده وبنام على طول ولا بحلم بأى حاجه بس انا هادعيلكم يارب كل اللى عنده حلم يقدر يحققه او حتى يحقق حته منه بلاش نكون طماعين. وانتوا كمان ادعولى انى الاقى حاجه احلم بيها وبعدين اقدر احققها...تشااااو
لو بطلنا نحلم نموت .. لو عاندنا نقدر نفوت لو عدينا مره خلاص .. حبه صبر حبه حماس ..يبقى الحلم صوره وصوت. أصل انا بحب محمد منير أوى. احلم بالموبايل والعربيه واللاب توب وان شاء الله تقدر تحققهم .انا اعرف ناس كانت لا شىً ودلوقتى عندهم عربيات واحدث موبايلات واراهنك لو كانوا مره حلموا او حتى يعرفوا يعنى ايه حلم هى مسأله حظ ورزق ربنا بيقسمه على الناس ربنا يجعل رزقك كتير يا ضنايا يابنى هههه
الحلم شيء جميل وضروري كمان... لولا الحلم ماكنتش هتلاقي التطور والتكنولوجيا...
اجمل مافي الحلم ان مفيش عليه ضرايب احلم براحتك وزي ماتحب ....
لازم نحلم ونحاول ونفضل نحاول ان احنا نحقق حلمنا ولما نحققه نحلم حلم تاني ونحققه هو كمان وهكذا
وطبعا طبعا لازم نؤمن بالقدر ونرضي باللي ربنا قسمه لينا لو خير نشكر ربنا عليه ولو في نظرنا كان شر نصبر عليه ....
ولازم يابو حجاز ناخد بالاسباب .........
إرسال تعليق