احنا كمصريين لينا ختم خاص على كل موقف او اسلوب او طريقه فى كل حاجه فى حياتنا... ولو روحت اى حته فى الدنيا ان شالله لو روحت المريخ وشوفت اى موقف من المواقف دى تقول على طول انا مصرى وابويه مصرى....خد عندك مثلا...
الوحيد اللى ديما يتكلم عن المبادىء... وعنده الحياه دى مسألة مبدأ... بس ياترى بأه يعنى ايه كلمة مبدأ...
الفشل والخساره عنده لها رد واحد بس مفيش غيره "اصل احنا طيبين زياده عن اللزوم"... مع انه يعرف الف معنى للطيبه الا معناها الحقيقى...
الشغل بالنسبه له دلع ومزاج وقلة اعتناء... واول ما يتزنق يبدأ بتنرفز ويتعصب ويديها بأه تركيز... وتلاقيه ينجز شغل بطريقه مش معقوله... عجب
مقتنع جدا ان الجرى مفيد للصحه... وعمره ما بيمارس الجرى الا عشان يلحق مكان فى اى مواصله....
تعامله باحترام وكبنى ادم يقولك يابرنس... تهزأه وتعامله خشن يقولك يابشمهندس... يحتاج منك حاجه يتكسف ويخبط على بابك ويناديك بي والنبى يااستاذ...
تبقى واقف قدامه فى المترو... واول ما يجى يقوم ينادى على واحد بعيد ويقعده... عايز يطمن ع الكرسى من بعده... أمال ايه بأه واخدين ع التوريث...
لما يشوف واحده يبقى مهتم جدا انه يقعدها... بس ده لما يكون هو كمان واقف... ولما يكون قاعد بيجيله حول ويفضل باصص لفوق ومتوه...
فى نظرها تبقى قليل الزوق اذا كنت قاعد وسيبتها واقفه... مع ان هى لو قاعده امبوسيبل تقوم لحد تانى حتى لو كانت واحده حامل...
هدفه فى الحياه هى ورزقها وخليها على الله... مع انه عمره ما رضا برزقها ولا اقتنع انها فعلا على الله...
الكلام عنده معناه الضد... لما يقولك احنا اخوات واى حاجه محتاجها انا تحت امرك... تفهم على طول انك لازم تستحمل اخوك ولو احتاجت حد يذلك ويطلع عين اهلك فااخوك موجود...
كل حاجه ف حياته ماشيه بسيستم...بالاماره عمره ما بيستريح لاى مصلحه الا اذا كان فيها طابور...
مثقف جدا لدرجة انه بيتكلم فى كل حاجه...ومطلع دائما على قضايا الساعه وكمان عنده حلها... مع انه عمره ما اشترى جرنان...
مغرم بالاتجاهات المعاكسه... تديها حزاينى يقولك يعم بأه كفايه نكد هى ناقصه... تدييها فرايحى يقولك بس الدنيا مش وردى اوى كده... تقول احنا وحشين يقولك حرام عليك ما تجيش علينا كده... تقول بحبك يامصر يقولك يلعن ابو تييييييييت مصر
باختصار الشخصيه المصريه... ممثل محترف فى سينما الحياه... ناقد متمرس لأى نوع من السيناريوهات اليوميه... مدير تصوير اى فضيحه او خناقه... مخرج لاى نوع من الشائعات المحبوكه...وعجبى
8 ســــــــايق عليك النبـــى تجبر خاطرى بكلمتين...:
عشرة على عشرة ياحجاز يا مصرى
محمودسليمان
الاول ببعت سلامي لصاحب الموضوع وكل من فكر يضيف تعليق
ثانيا الكلام موزون وفي محله بس ياريت نبص علي الايجابيات وكفانا احباط دا حنا شبعانين ياخونا
اخوك لو فاكره محمد السيد عبدالفتاح
جامد يا واد
جامد ياحجاز وعقبال الجاي ...احمد منصور
ماشي أنا معاك في قصة الشخصية المصرية
بس ....
تعرف أن الشخصية دي محتاجه قيادة(قدوة حسنة بينة) + تعلم القيادة(أنه يكون قدوة في تصرفاته دايماً)
تلاقي نهضة ملهاش حل
عـمــرو حــســن
والله ياحجاز انت دخلت فى موضوع شائك جدا وعلماء كثير اتكلموا فيه ولم يصل علماء الشرق ولا الغرب لتحليل حاسم حول الشخصية المصرية ، فلقد تحدث العالم الجغرافى الكبير جمال حمدان فى كتابه الذى يتكون من ثلاثة ألاف صفحة عن شخصية مصر ، وتحدثت الدكتورة نعمات أحمد فؤاد وغيرها الكثير والكثير عن صفات الشخصية المصرية .
على أية حال أنت أدليت برأيك وقد أتفق معك وقد أختلف
ولكن إلى الأمام
محمد منصور
صحيح الشخصيه المصريه عندها سلبيات كتير يعنى زى ما انته ذكرت المواقف دى وفيه كمان حته الفهلوه المصريه يعمل فهلوى وهو مش فاهم حاجه اصلا
بقى عنده ازمه فى الذوق والجمال
علاقته بالوقت العشوائيه و ضعف الاداره الجماعيه رغم كثره الكفاءات الفرديه عنده نظام داخلى لكن الفوضى هى الظاهره عليه
رغم كل ده لازم نقول ان الانسان المصرى كان جواه طيبه وحاجات جميله وايجابيات كتيره
بس كله بيتغير وكله بيتنسى فى الزمن اللى احنا فيه ده....
مشكووووووووووووووووووووووووووووووووووور عالكلام الحلو ده
انت استاااااااااااااااااااااااااذ
وفعلا الناس بتجرى عشان تلحق مواصله بس دى برضه رياضه
إرسال تعليق