انا مش عارفنى... انا تايه منى... ولا قادر حتى اركز ولا عارف اعمل ايه فى همى... لا دى أحلامى ولا دى حياتى... ولا حتى دا اللى كنت ناوى على عمايله... هو ليه ده بيحصلى... هو ليه الدنيا كده بتلخبطنى... وما بتبطلش تناكفنى...وعلى طول بتيجى عليا... كتير اقول كفايه... ومش هاقبل تكون دى نهايه... بس برجع اخد على دماغى... واقول موافق وماله هو فى احلى من كده بدايه... وأقف مع نفسى وقفه... ولنفسى أحط خطه... واحد اتنين تلاته لحد سبعين خطوه... عملت اول خطوه... وكسلت شويه فى التانيه... وطنشت اعمل التالته... وشكيت فى نفسى فى الرابعه... وقولت اكيد انى غلط غلطه... انا هابدأ من الاول واحط لنفسى كمان خطه... وادينى مقضيها خطط ولا بتقدم حتى زأه...
متحير ومش عارف اخد قرار لنفسى... وقولت اسال الناس وياريتنى اعتمدت على نفسى... واحد يقولى اتوكل على الله وجرب... والتانى يقولى لا اوعى حرام عليك اوعى تجرب... والتالت لا هو مفيش احسن من الاتجاه اليمين... والرابع يقولى لا يعم سيبك من الناس دى واحود شمال وطوالى على طول... يعنى هو مفيش احسن من الكلام... وحياتكم هى مش ناقصه لخبطه... على اساس ايه بتقولى اطلع يمين واحود طوالى... والنبى هى مش طالبه فهلوه... ويقولك دا انا احلهالك بصباع رجلى الصغير... دا انا امشيهالك وانا قاعد بالشورت بتاعى القصير... على طول كده هانفضل نتفلسف... ونعمل فيها ورك نمله... وننصح الفين نصيحه... ونقدم سبعين مشورة... من غير خبره ولا حتى حكمه... ما يروح يعم فى الف غرقه...ماهو اكيد هايجرب وهايتعلم...
طب ما بدام كده انا بسألك من الاول ليه... وواجع دماغى معاك ليه... طب من الاول قولى انا مش عارف حاجه... اتوكل على الله وصلى استخاره... واسأل ربنا المشوره... وجرب مره والتانيه والتالته وان شاء الله ربك هايبعتلك الهدايه... للى فيه مصلحتك وكمان هايكتبلك البركه... واتوكل عليه ومن يتوكل على الله فهو حسبه... وسيبنى بأه اخد قرارى بنفسى... ماتلخبطنيش بأه وماتخوفنيش وماتنكدش عليا عيشتى...
عمرى ما عرفت اخد قرار لنفسى... ولا حتى اتعملت اخد القرار ازاى... وكل ما اخد قرار امسك ورقه وقلم... واقعد احسبلها من كل الاتجاهات... واقول لو الناحيه دى هاتمشى ازاى.... ولو الناحيه دى هاتمشى ازاى... واتأكد من كل حساباتى... واختار الاتجاه الاتى... اللى كل الحسابات ماشيه معاه... واقول يالله هى ورزقها...وان شاء الله مش هاندم... ومايعديش شهر والاقى نفسى ساقط حساب...وبدأت اقع فى بئر الندم... والاقى الناس اللى كانت بتقول شمال... بتقول انته ليه يعم ما روحتش يمين... انته مشكلتك انك اتنطت على اليمين... مع انها كانت حلوه وفرصه ما تتعوضش... الله اما انته يعم قولت روح شمال... اه ما انا والله لقيتك عايز تروح شمال... فقولت كلامى مش هيأثر معاك وعشان كده قولتلك روح شمال... وعشان كده اتعملت لو اتقالى روح يمين هاروح على طول شمال... وكبارنا قالوا زمان... شور الست واعمل العكس وانته ديما تبققى فى امان...
وهى دى المشكله لا انا عارف اخد قرار لنفسى... ولا حد عارف ينصحنى... وكل يوم ليلاتى... افكر فى اللى اتى... واقول يامين ينجدنى... يارب يامجيرنى اهدينى وساعدنى... وصبرنى على ايامى... وابعتلى حل لحيرتى... اوعلمنى ازاى اخد باسبابى... واقدر اواجه مشاكلى... ولااحتاج ابدا ابدا ابدا لحد يلخبطنى... يارب امين
10 ســــــــايق عليك النبـــى تجبر خاطرى بكلمتين...:
انت مين يابني وايه اللي جيبك هنا وايه التوهان اللي انت فيه ده
بص ياحبيبي ( ركز اوي في الكلام الكبير اللي هقوله ده)
انت مشكلتك هي انك بتتأثر بتركيبتك السيكولوجية فى اتخاذ قراراتك دون ان تقوم بدراسة موضوعية لنتائج هذه القرارات.
وارجع اقولك ان الموضوع موضوع وقت مش اكتر وباعدين ياسيدي خلاص الفجر لسه عليه تلت ساعة يعني علي ماتقوم تتوضي يكون الفجر اذن والدنيا هتبقي عنب ان شاء الله
وسمعني سلام البنت دي بنتي ..................
تعرف انا بستنى البوست بتاعك عشان اطمن منه عليك لكن المره دى ما طمنيش خالص انا مش عارفه ايه اللى حصل معاك خلاك متلخبط ومش عارف نفسك
بس عموما انا عاوزه اقولك ان احسن حل للى انت فيه ده انك زى ما قولت تستخير ربنا لانه هو الوحيد اللى يقدر يدلنا على الخير وعلى الطريق الصح اللى المفروض نمشى فيه
لكن لو سألت اى حد هتلاقيه اصلا هو كمان متلخبط وعاوز اللى ينصحه وممكن تلاقى واحد بيكرهلك الخير وينصحك بالطريق الغلط
فأحسن حاجه الرجوع لربنا ومتسمعش كلام حد
حاول تحدد هدفك وشوف انت عاوز ايه وبعدين تاخد قرارك
وبعدين بصراحه يعنى انا شايفه انك عجول ومش بتصبر
اصبر شويه واحمد ربنا على اللى انت فيه بيتهيألى انه احسن من قبل كده واستنى اللى جاى ان شاء الله يكون احسن
فى النهايه بتمنالك التوفيق وربنا يرشدك ويبعد عنك الحيره دى ويوصلك للى انت عاوزه....آمين
بد جامده يا ابوحجاز بس بلاش الياس بكره احلي كتير والله ومسير الدنيا تضحك تاني بس بجد يا حلاوته بالهوتشورت وهو واقف علي اسقاله بطوله وهيافته وانت فاهم
انافرحات
بص ياريس بعيد الكلام الكبير اللى انته قولته فانا مستغرب فعلا انته بتجيب الامل ده مع ان الحال من بعضه... وبعدين ياباشا فجر ايه اللى لسه عليه ربع ساعه الفجر يابنى اذن بقاله ساعتين داانته اظاهر اللى تايه
حيرانه
بعد طبعا حمدلله ع السلامه على غيبتك الطويله ويارب تكون العاقبه خير... فانا كنت عايز اسالك سؤال هو انتى ازاى اتخلصتى من الحيره اللى انتى كنتى فيها وبعدين حتة مستعجل اللى انتى مصدعانى بيها احب افكرك بحاجه انا بقالى سنتين متخرج والحمدلله ماعملتش اى حاجه لحد دلوقتى
اسلام باشا
الطويل طويل ياباشا وطبعا فاهم وان شاء الله هاطول زيه بس مش هاعمل زيه وبعدين انا عايز اقولك على حاجه هو مفيش يأس ولاحاجه بس ساعات الدنيا بتيجى عليك وما بتعرفش تسلك معاها فبتصعب عليك فبتزعل ويجيلك الحاله دى بس وان شاء الله فعلا خير
اوعي يصعب عليك حاجه وعمرك مهتبقي زيه لانك ابن اصول ومتئلئش مضاقت الا لما فرجت
وصدقني هطول اول منه
طول اطول منه
هطول اطول منه معلش اجهزه خربانه زي صاحبها
انا شايف انك انت واسلام بتلعبوا بالنار يابني انت وهو احنا كلنا بناكل عيش
والله انا شايف انى انتة يا فرحات مش بتاكل عيش دا انتة بتاكل فى نفسك وهئولك معلومة الضحك هو اقصر مسافة بين شخصين-من يغضبك فقد هزمك-اذا زللت فارجع واذا ندمت فاخلع وهما اتنين وانا التلات
إرسال تعليق