من كام بوم كده لفت انتباهى اعلان جميل كده ولذيذ...وكالعاده اول ماتسمع صوت طارق نور تعرف توماتيكى ان الاعلان ده تبع الحكومه... المهم الاعلان ده بتاع سكك حديد مصر... اللى فيه المقوله المشهوره "المصرى اللى على حق هو اللى يقول للغلط لأ"... وطبيعى جدا ان الاعلان ده يستفزك وبالذات لوكنت من رواد السكه الحديد... بس أنا هنا مش زى الناس وهاقولك ان القطر اللى كان موجود فى الاعلان المستحمى النضيف ده مش مصرى...ده من المانيا القمح اه والنبى... ومش هاقولك ازاى ولاد الايه قدروا يعملوا ديكور زى محطة رمسيس بالظبط بس على نضيف شويتين... ولا هانتكلم عن التذكره المدعمه اللى بيقولوا عليها اللى فارقه عن الميكروباص جنيه واحد... بس القطر افضل لانك بتفضل طول الطريق واقف على قفاك... ولا برده هاحكيلك ع البلطجه بتاعة محطة رمسيس اللى عشان تعدى من الميدان وتروح احمد حلمى ومش هاتركب حاجه والنعمه ما هاتركب حاجه دا انته هاتعدى بس... يقولك ادفع جنيه ياستاذ رسم مرور اصله شايفنى عربيه لانسر... ولا بقى هاقولك عن المواعيد اللى زى الالف بتاعتهم القطر معاده يطلع 4:45 وهو اصلا بيدخل المحطه عشان يركب الناس 5:00... ولا هانقول ان الراجل اللى كان مسطح فى الاعلان كان مسطح عشان مش معاه حق التذكره لا وحياتك دا بس مش لاقى مكان تحت فقال اطلع الدور التانى اوسع....
لالالالا سيبك من الكلام ده كله واخدين عليه ومتعوده ديما على المرمطه فى القطره دى... انما ايه بقى حكاية المصرى اللى على حق دى تفتكر قصده يقول ان احنا مش مصريين... وعشان كده مش بنقول لأ على اى حاجه... ماهو احنا كل يوم بنشوف ونسمع الف غلط... وبنحط جوانا مليون لأ ومع ذلك ما بنقدرش نطلعها ونقول للغلط لأ... لما هو كده امال احنا مين يكونشى احنا هنود ومش واخدين بالنا ماهو بردك الشبه قريب من بعضه... ولا تفتكر انه فى القاموس بتاعه كلمة غلط معناها تزويغ وتسطيح ع القطر وبين قوسين كده ليس لها ا ى معانى اخرى عندنا... يعنى الميه اللى فيها مجارى دى... والفاكهه اللى بتتروى بالصرف الصحى... والعيش ابو فيران... والزحمه المؤرفه... والكوسه فى كل حاجه... والزباله فى الشوارع... والبلطجه من سواقين السيرفيس... ولا ياعينى التباعين وكمان مره التباعين... كل ده مش معناه غلط هو القاموس بيقول كده... ولا يكونش قصده بكلمة المصرى اللى حق دى زى سمرعلى حق ماهى على الطبله نزلت ترقص واحنا على الغلط بقينا نطنش والحكومه علينا نازله استهبال وتسقع...
انا عن نفسيتى شكيت فى نفسى واول حاجه عملتها روحت جريت على اذاعة صوت القاهره جايز بقى بيقول "هنا بومباى" ولا حاجه بدل "هنا القاهره"... ده مش اعلان يااساتذه... ده قصدهم ينكشونا ويقولونا انتوا مالكوش لازمه فى البلد... وبكل بساطه الحكومه بتطلب مننا نقول لأ... ياجماعه حد يقول لأ... زهقنا من كتر ماحدش بيقولنا لأ... ياناس عايزين حد يوقفنا بأه... سايق عليكوا النبى حد يتنحرش ويوقولنا لأ مره ... مفيــــــش فايده... بس انا عن نفسى هاقول لأ بس بشرط لما اعرف الايد اللى فى الاعلان اللى بتقول لأ وتأفش على افا الغلط ايد مخبر عادى ولاامن دوله...؟؟؟ يالله بأه احنا من زمان يابنى مضحوك علينا... الله يرحمك ياحسن ياعابدين...
5 ســــــــايق عليك النبـــى تجبر خاطرى بكلمتين...:
السلام عليكم اولا وبما اني من رواد السكة الحديد اللي اساسا مش سكة حديد وانت عارف معاناتي يا محمد فالقطر من المنصورة للشرقية مسافة صغيرة متتاخدشي الا في 40 دققة ياخدها القطر في سا عتين وزيادة دة غير التأخير بتاعة واظن انك جربت يوم ما كنتم جايين تفطروا عندي في رمضان فاكر ولا نسيت القطر معادة 3:25 جة سعادتة 4:15 ودة مش العادي دة ااقل من العادي.واحد يرد عليا ويقولي العادي اية ااقوللك اعادي اية ان القطر اساسا ميطلعش ويولولك انة مفيش جرار بسم الله الرحمن الرحيم .لية بقي لان احنا معملناش تغير فالسكك الحديدية من ساعة لما الانجليز عملوها وبتتسرق القضبان بتاعتها علي عينك يا تاجر ويروحوا اي محطة ويشوفواوكل اللي السكك الحديدية بتعمله زيادة التذاكر ومعونة الشتاء وتحط زيت عالقضبان . هو مين اللي محتاج معونة مش الشعب والسكك الحديدي ولا لما قعدت سنة يا جماعة كل يوم اسافر في القطر بعد الفجر ومفهوش شباك ولا كراسي ولا اي حاجة وبلطجةوقلت ادب ويقولولك سكة حديد. ولا لما جددوا القطر من فترة عملوا لخط المنصورة القاهرة مرورا بالشرقية قطر كراسية زى المترو .طيب ازاي دا الغلابة اللي بيركبوة ولمدة 3او 4 ساعات مش مترو دة علشان الواحد هيستني نص ساعة وينزل . حسبي الله ونعم الوكيل فيهم
انا لوماشي في مكان نضيف ومعايا ورقة وعايز ارميها عمري ماهرمي الورقة دي الا في سلة المهملات
لكن لو القصة زي ماحنا بنشوف في كل مكان بنروحة في المعمورة دا انا هرمي الورقة ومش بس كده دا انا هجيب اللي في سلة المهملات وارميها علي الارض
وباعدين انا لو هقول للغلط لا في البلد دي هافضل اقول لا لغاية ماموت ومش بس كده دا اولادي واحفادي هيكملو بعدي
من الاخر ياعم انا مش مصري علي حق
والله يا أستاذ محمد أنا مش معاك لأني من الناس الي بتقول لأه بس مش لأه بتاعت الاعلان لأه بتاعتي يعني فكك وكبر دماغك أنا أصلا مستني في مصر لما أخلص تعليمي وبعد كده هي حره اذا كانت اتعدلت هخليني معاها شويه انما لو لسه فاسف معنديش استعداد أضيع عمري وأقول لأه وولادي يقولوها بعدي دا أصلا لو اتجوزت لأن الي بيقعد لو مكنشي أبوه من أسياد القوم مش هيعرف يتجوز وابقي قابلني ولا أيه يا حجاز ولو بقيت زي ما هي هطلقها بس طلقه واحده يمكن في يوم تنعدل ساعتها أعرف أردها وابقي سلم لي علي مصر
ياسيدي أنا علاقتي بالقطار مصر - إسكندرية و دايماٌ بيجي في معادوه , بس مره روحت إسكندرية في 4 ساعات عشان في وسط الطريق الجرار إتعطل فبدلوه
على فكرة أنا بعدي من المحطة عشان أروح أحمد حلمي عادي من غير ما أدفع حاجة
بلاش تيجي أوي كده عل حكومة لأن مش كل الغلط عل حاكومةههههه مش كده:)
إرسال تعليق