من يومين كده أنا قـولت هاروح القاهره أقعدلى يومين... تقولى رايح أعمل إيه مش عارف... طب السبب إيه برده مش عارف... طب ناوى على ايه ياعم والله ما أنا عارف... المهم سافرت وقعدت وطبعا زى العاده مش لاقى حاجه أعملها... وقـاعد فى الشقه طول النهار... وبالصدفه جه عليّا إضراب 6 ابريل... فقولت ياواد إضرب معاهم... ما إنته كده كده قـاعد... وأهو لو نجح الإضراب ده وعمل حاجه ممكن التاريخ يذكرك عشان انته كنت معاهم... فلقيتهم بيقولولك أخى المواطن ماتخرجش من بيتك يوم 6 ابريل وما تروحش الشغل... وأنا فعلا ما خرجتش وأصلا مفيش شغل... وقالولك علق أعلام على الشبابيك...بس للاسف ماعملتش كده مش عشان مفيش معايا حق العلم... لأ دا عشان الشقه اللى أنا فيها مفيش غير شبالك واحد بس وكمان طالل ع المنور يعنى لو علقت حاجه الناس مش هاتشوفها ... وقالولك كمان يـاريت تلبس أسود فى اليوم ده... وأنا مش هاقولك مالبستش أسود عشان ما عنديش أسود... لأ دا أنا عندى بدله سوده بس ما لبستهاش عشان ماكانشى عندى انترفيوهات فى اليوم ده...
وخلصوا هما اضراب وفضلت أنا مكمل مع نفسى وقربت على الاكتئاب... والعمليه بدأت تضلم أكتر وأكتر... بس فجأتا قولت لأ ووقفت كده زى الأسد... وقولت أنا مش هاسيب نفسى للزعـل... ومش هاستسلم وهقاوم وهقاوم وهاخلى عندى أمل... وأكيد فى نور جاى على رأى أحمد فرحات... وقولت أنا لازم أقوم وأتحرك وأخرج من جو الإكتئاب ده... غيرت هدومى وخرجت وبرده مش عارف رايح فين... قـعدت أفكر فى حد صحبى أروحله مالقتش... واللى لقيته لإما بعيد أوى لإما راجع من الشغل تعبان ومش هايقدر يخرج معايا... فقولت خليها تمشى وشوف رجلك هاتوديك لفين... ركبت المترو وفضلت أعد ف المحطات... لحد ماجات محطة رمسيس قولت ياواد رمسيس دى فيها ناس كتير أوى... ممكن تقعد تتفرج عليهم وأهو هاتشوف واحد رايح وواحده جايه وأهو الوقت بيعدى... ولما نزلت رمسيس وقفت شويه وبسرعه مليت... الناس الكتير الموجوده معظمهم حالتهم بؤس وحاجه تصعب عليك... وفكرونى بنفسى فقلت هى أصلا مش طالبه... قوم يابنى مشّى رجليك لنص البلد... وانزل طلعت حرب اتفرج على المحلات والسينمات وأهو جو يلهيك شويه...
ولما وصلت طلعت حرب شوفت السياح والبنات والموضه والشباب الفانكى بتوع مامى اللى بتجيب عربيات ودادى اللى بيجيب موبيلات... والناس اللى الدنيا ماشيه معاهم فل ومفيش أى مشاكل... قولت فى عقل بالى يالله ياولاد الكلب وأتخنقت من الناس دى وحسيت كده بالحقد الطبقى... فكبرت دماغى وسيبتنى منهم واتفرجت على المحلات... لقيت شوية بدل وتى شيرتات إنما إيه روعه...! وبصراحه عينى طلعت عليهم... بصيت ع السعر لقيت التى شيرت معدى ال400 جنيه... والبدله معديه ال 1000 جنيه... بصيت فى جيبى مالقيتش غير 20 جنيه... إتخنقت وإفتكرت حالى وقعدت أندب فى حظى وميلت بختى... ماهى كل ماروحلها كده تجيلى كده اعملها ايه يعنى...؟؟ زهأت ورجع الاكتئاب أزيد من الاول... وقلت يارتنى ماخرجت وقعدت فى الشقه... وكملت إضراب وركبت أول مترو راجع ع الشقه... يلا سلام...ادعولى...!!
6 ســــــــايق عليك النبـــى تجبر خاطرى بكلمتين...:
فكرة كتير قبل ما علق على كلام ياحمام قولت نفسى اكتر من مره اكتب حتى لا تعليق وبس وانا بكتبلك والله صدق جه فى بالى قوله سبحانه وتعالى ( اليس الصبح بقريب)صدق الله العظم.
وعيز اقولك حاجه كمان من اخ حسس بيك طول ما انته عندك احساس اعرف انك لسه بخير
اخوك
م.رجب
نسيت اقولك الحمد لله انك بخير والله كان نفسى اطمن عليك ياربت تكتب كده على طول على شان اطمن عليك ديما
ازيك يابو حجاز وحشتنا ياراجل بقي في حد يسيب المنصورة ويروح يقعد في القاهرة.
من كلامك حاسس ان العملية بقت خلاص اسود من السواد
بس ان شاء الله خير والله خير وربنا هيكرمك ان شاء لانك بالفعل تستاهل كل خير .....
وفرج ربنا قريب ...... ولكنكم تستعجلون.
عاند الدنيا الرديئة وأبتسم . إن بعد الليل فجر يرتسم . لا تقل حظي رديئا . إنما قل . قدر الله هذا ما قسم.
أنا قاعده أفكر أكتب إيه بس بصراحه أول مره أحتار أوى كده بس أنا عاوزه أقوللك على حاجه إنته إن شاء الله ربنا هايكرمك ويوفقك ويحقق لك كل اللى بتتمناه علشان إنته تستاهل كل خير وصدقنى كل ليل مهما طال له نهار يطلع عليه وإن شاء الله هيبقى نهار زى الفل مليان بكل حاجه حلوه وقولتهالك وهافضل أقولهالك "ضاقت فلما استحكمت حلقاتها فرجت وكنت أظنها لا تفرج " وبإذن الله هتفرج عن قريب بس انته إوعى تفقد أملك فى ربنا وخلى عندك ثقه فيه وفى إنه عاينلك حاجه حلوه. يلا باى باى يا بشمهندس وياريت ما عنتش تغيب علينا أوى كده عشان كلامك الحساس الجميل جدا ده بيوحشنا.سلاااااااااااااام
الأول مساء الخير بصراحه أنا قولت طالما مش بترد على الموبايل ولا حتى برنه جايز مش شايفه لكن أكيد هاتشوف البلوج بتاعك...أنا بس والله كنت عاوزه اطمن عليك وعلى أخبارك وعموما يارب بجد تكون كويس و بخير."اللهم فى كل صباح ومساء يصبح أو يمسى هذا الوجه فأكرمه بعظيم سلطانك ويسر له أمره وسخر له الطيبين من خلقك وأشرح له صدره ولا تجعل فى يومه أو ليلته سوء الا دفعته ولا ذنبا الا غفرته ولا دينا الا قضيته ولا هما الا فرجته....آمين يا أرحم الراحمين" إيه رأيك بأه فى الدعاء الجميل ده؟ وياترى بتدعيلى انته كمان ولا خلاص القاهره نسيتك يلا تصبح على خير وعلى فكره نفسنا فى بوست جديد بأه انته اتأخرت علينا أوى...يلا باى باى.
-واعلم انه كلما اشتد الكرب فقد اقترب الفرج
-واعلم انه كلما زاد الضغط ازداد الانسان صلابه وتحمل
-واعلم انه ما من احد الا وله رزق مقدر له
اخوك اسلام العر
إرسال تعليق