وعندك واحد كماله...

أولا كده كنت عاوز اقولكم سامحونى عشان اتأخرت عليكم المره دى ...أصل كانت فيه شوية تغييرات وتنطيطات كده حصلت... وكمان لسه مش قادر اتلايم على وصلة نت فى الشقه اللى ساكن فيها... فيالله خلوها عليكم المره دى وعدوهالى...

----------------------------------------------------

فى ناس اصحابى ناس زى العسل كان الوقت معاهم بيبقى جميل ولما جت الدنيا وبعدت بينا المسافات كنا بردك بنقرب المسافات دى بالاتصالات... لكن فجأه كده الاتصالات دى اتقطعت ومفيش اى خبر عنهم وانا بصراحه نفسى اعرف عنهم اى حاجه واطمن عليهم... اولهم صحبى احمد منصور سافر الكويت وكان فيه اتصالات بينا وفجأه كده من يجى تلات شهور مفيش حس ولا خبر وانا مش عارف اوصله ولا لاقى رقمه ولا اعرف حاجه عنه...فيارب لو بيقرا الكلام ده يعرف انى نفسى وهاموت ويجيلى جيل من الكويت قصدى نفسى وهاموت ويتصل بيا ويطمنى عليه...تانيهم زميلتى منى العربى حاجه كده زى العسل ... من الناس اللى تسأل عنك وتخدمك وتساعدك كده لوجه الله ومن غير مقابل... ودى كانت بداية معرفتى بيها... وانقطعت اخبارها مره واحده من ساعة ما قبضت اخر شهر من المنحه... واظاهر كده الله اعلم خدت الفلوس وهربت... المهم يارب اسمع عنها كل خير وتكون اشتغلت فى شركه انترناشيونال زى ما كانت بتتمنى... وتالتهم حبيبى عمار صادق بس الحمد لله اتصل بيا وطمنى عليه من تلات تيام كده وعرفت انه حى يرزق...فيارب الناس دى تكون بخير وطمنا عليهم ديما...

----------------------------------------------------

نظرا للنجاح الباهر والانتشار السريع والشهره المنقطعة النظير والتصييت ع الفيس بوك للمدونه بتاعتى... فأنا حاطط بلان ان شاء الله انى اعمل شوية تغييرات.... فياريت تبعتولى وتساعدونى بأى اقتراح روش كده... وقولى نفسك اتكلم فى ايه وعن ايه وايه اللى عجبك فى اللى فات واللى ماعجبكش واوعدك انى هابقى اعدى عليك لو عدت معايا... وبالمره ابعت مع الاقتراح ده اى حاجه كده من اللى فيه النصيب اصل بعيد عنك اخوك مديون وهنيالك يافاعل الخير والاجر والثواب على الله....

----------------------------------------------------

الا صحيح ما قولتلكوش مش انا قابلت الصفر... اه والنبى حصل زى ما بقولكم كده... اتخايلت بيه فى الشارع كده وانا ماشى... واول ما شوفته طبقت فى زميرة رقبته وكأنى لقيت لقيه... ولقيته ياعينى غلبان ومكسور ومبهدل ومش لاقى ياكبدى ياكل لقمه... قولتله انته فين ياعم دا انا بدور عليك من زمان اصل قالولى ان البدايه من عندك... قالى يحنن يابنى انته ما تعرفش ان اللى ما يشوفش من الغربال يبقى اعمى... فطست على نفسى من الضحك وقولتله تصدق طلع العيب فينا احنا مش فيك... قوم يابركه قوم اما اجبر خاطرك بطبق كشرى وندور على حد يساعدنى ويساعدك...صباح الفل

----------------------------------------------------

دا انت حبيب الكل يــــــــــارب....

كل اتنين على الحب حبايب قربهم وماتبعدهمش... كل جيران وأصحاب وقرايب جمعهم ماتفرقهمش....واللي في قلبه عذاب أو جرح طييب هوله... واللي ماداقش الهنا والفرح دووهوله... واللي سهران الليالي ليلو اصروا... واللي شايل هم غيره سعده قدره... واللي غريب عن داره اللي اختار مشواره حلي يارب مراره... هون غربته نور سكته صبر دمعته ما انت حبيب الكل يــــــــــارب..."محمد فؤاد"

اوقات كتيير الواحد بيبقى محتاج يقرب من ربنا شويه... والحالات دى عادة بتبقى وقت زنئتنا... وبصراحه طول عمرنا الزنأت كتيير... واهم الزنأت دى زنئة الامتحانات...ايام بتبقى صعبه جدا... واصعب يوم فيها أول يوم... بتفضل تسأل نفسك ياترى هانجح ولا لأ... ياترى الامتحان اللى جاى بكره ده صعب ولا سهل... ياترى اللى ذاكرته كفايه ولا لأ... واحلى لحظه لما تكون خارج من الامتحان وحالل... واسعدها لما يكون اخر يوم فى الامتحانات كلها... واجمل حاجه بقى فى الامتحانات انك بتسأل كل اللى حواليك انهم يدعولك... وتلاقى كل اللى يعرفك بيدعليك... واكيد هاتلاقى حد فيهم بيدعيلك من قلبه(وطبعا هى ست الحبايب وحد تانى كمان)... ويقولك روح ربنا يوفقك ويذكرك ويفرجها عليك ويفتحها فى وشك... والدعوه دى لوحدها بتديك دافع تروح الامتحان وانته لحد ما مطمن... وحاطط ايديك على قلبك من الخوف وبتقول يــــــــــــــارب استرها وماتفضحنيش....

تانى الزنأت دى لما تلاقى حد متغرب... بعيد عن اصحابه وحبايبه وكل الناس اللى بيحب مناكفتهم... وعادة هو بيتعود ع الوضع اللى هو فيه... بس لما الايام تيجى عليه ويحصله شوية مشاكل... ومايلاقيش حد يقف جنبه... ولا يلاقى حد يشتكيله... ساعتها بس بيحس بغربته وبتهون عليه دمعته... وبيفتكر الناس اللى بيحبوه... والليالى الحلوه اللى كانوا بيسهروها مع بعض لحد الصبح قاعدين بيضحكوا... ويجرى يدور على حته ضلمه عشان يغمض عنيه ويحط ايده على قلبه ويقول يــــــــــارب رجعلى الايام دى تانى... وافضل مع الناس دى وماسيبهاش ابدا تانى...

تالت الزنأت دى بأه لما يكون عندك مشكله فى شغلك... وتلاقى نفسك محطوط فى مكان كله صراعات ونفاق وناسى بتكره بعضها... وبتاكل فى بعضها... واى حد واقفلك على غلطه... ومستنى منك هفوه وانته ياما عملتله... ومع انه بيضحكلك فى وشك... وديما يجرى عليك يظهرلك حبه...وهو اصلا ماسكلك سكينه ورا ضهره... والواحد يفضل يسأل نفسه انافق واعلم زيهم ولا اعمل ايه بالظبط... وعشان كده بحط ايدى على قلبى وبيقول يـــــــــــارب ماتشمت فيا حد خالص... وابعد عنى غدرهم قادر ياكريم....

وعندك بأه زنأت كتير صغيره... زى مثلا لما يكون مزعلك اهم شخص عندك... ولما تحس ان حلمك بيضيع منك وانته واقف بتتفرج... ولما موبايلك يضيع منك... ولما تصحى الصبح تلاقى نفسك اتقلبت وانته نايم... ولما تصبح فى يوم بوش واحد فقرى...ولما واحد مابيتصلش بيك من زمان وتلاقيه فجأه بيتصل بيك... ولما تلاقى فجأه بقى بيحبك أوى وبيموت فيك...ولما واحد تنقطع عنك اخباره ومش عارف ايه اخبار الدنيا معاها... ساعتها بس بتحط ايدك على قلبك وبتقول يــــــــــــــــــارب سلم يـارب سلم يارب سلم...

ومع اختلاف نوع الزنأت ومهما كانت المشاكل اللى عندى بلاقى ديما امى تقولى روح يابنى ربنا يسعدك ويسهلهالك ديما يارب...وعشان كده بقول لكل واحد عنده زنأه روح ربنا يسعدك ويسهلهالك ديما...
... يـــــــــــــــــــــــــــــــــــــارب ...

وأنا ماشى...

مساء الفل...وانا جاى يوم الخميس اللى فات من القاهره شوفت موقفين عجبونى جدا فقولت احكيلكم عليهم يلا نبدأ...

تباع بس ايه ادارجى...

العربيه اللى ركبت فيها شغال عليها تباع شكله زى اى تباع بس هو مش عادى... عشان هو حافظ جميع اماكن الكماين اللى موجوده فى طريقه... وكمان الظباط اللى موجودين وازاى يتعامل مع معاهم... اول ما طلعنا من رمسيس فوجأت بيه بيقول ياجماعه بعد اذنكم اى واحد جنبه شباك مفتوح يقفله... وقفل المسوجر بتاع البابين اللى قدام واللى ورا... فأنا سألته هو الشباك اللى مفتوح عليه غرامه اليومين دول ولا ايه قالى بس اصبر واتفرج على اللى هايحصل... وبعد شويه قال للسواق اول صنيه هاتقابلك ادخل يمين واطلع الكوبرى اللى فى وشك وانته نازل انزل من على اليمين والزق فى العربيه اللى قدامك عشان تخبى النمره... عشان فيه كمين الظابط اللى فيه اسمه خالد فتحى دا ظابط ابن تييييت السواق نفذ اللى حصل بالحرف وفعلا نفد من الكمين... واحنا داخلين على الكمين اللى بعديه قاله لا الكمين ده بأه ادخل شمال... دا فيه حبيبنا الظابط حمدى هياخد عشره جنيه كان بياخد خمسه بس هو رفعها من شهرين... الكمين اللى بعديه قاله هاتلاقى عندك كارته فوقك امسكها وروح ناحية اليمين خالص (الكمين بيبقى ناحية الشمال) ووريله الورقه كده من بعيد وزمرله واعمل فيها مستعجل وطبعا وقد كان عدا بسهوله جدا مع ان العربيات كلها كانت متثبته... وفى كام كمين كده برده بس مش فاكر اللى حصل...
................................................................................................................................
مفيش حاجه اسهل من كده شويه...

اليافطه دى وانا نازل قريتنا لاقيتها متعلقه واول ما قريتها موت على نفسى من الضحك عشان اصلا انا متهيألى اللى كاتبها مش فاهم فيها حاجه... انا باه راضى زمتك مين بأه فى قريتنا اللى فاهم كلمة شرائح... طب فئات بتاعت الانتخابات وعارفنها امال بأه موضوع المحاكم العسكريه دى مش ماشى... يعم دا الناس دى اخرها محكمة الاسره تقوم تقولهم محكمة عسكريه... اراهنك هاتلاقى الناس كل ما تقراها يقولوك انهم اظاهر هايعملوا عندنا قاعده عسكريه زى بتاعت ويش... ولا كلمة مدنيين دى بأه هى اللى جامده طب انا مهندس وفاهمها عشان عارف المهندس المدنى وكده يعنى... بصراحه اليافطه دى انا متأكد ان الناس ما فهمتش فيها الا كلمة الاخوان المسلمين... والله اللى معلق اليافطه دى حرام عليه كده هايجيب احباط للناس... يعم علق حاجه على اد الناس اللى هايقروها... وخليك فى حالك واتكلم على ادك كلنا بناكل عيش فى البلد دى يابا يعم دا بيقولك منيو الخمسه لسه بخمسه...ولا ايه...

نعمة النسيان...

مياده الحناوى قالت " انته مكتوبلك يابختك اه يابختك نعمة* النسيان...يـــابختك"

وهى فعلا نعمة* بس لما تكون بشكلها الطبيعى بمعنى لما تحصلك مواقف زباله فى حياتك ومع مرور الوقت بتنساها تبقى دى كده نعمة لكن لما يكون الموضوع ماشى بالعكس وما تنساش المواقف الصعبه اللى فى حياتك وتفضل لازقه فى دماغك والحاجات العاديه اللى بتحصلك فى يومك بتنساها ساعتها ما تبقاش نعمة*... زى مثلا واحد طلب منك حاجه وتنسى تعملهاله... تعمل حسابك تكلم واحد صحبك وتنسى... تاخدحاجه من حد زى فلاشه مثلا وكل يوم تنسى ترجعها لصاحبها... والحاجه الرخمه بقى انك لما تاخد فلوس من حد بتنسى انته خدت كام وياترى رجعتهم ولا لسه وممكن كمان ترجعهم مرتين... وياعينى بأه لو حد استلف منى فلوس (دا كان زمان وجبر فينك يادى الايام وحشانى والله) بنساها طبعا وفجأه كده الاقى اللى جاى يدينى فلوس اقوله ايه ده يقولى كانوا عليا وانا الله ناسى... وفيه طبعا ناس اصحابى بيستغلونى احسن استغلال وبيطرمخوا ع الفلوس... المهم فى ناس بتقول دا طبعا زهايمر بس انا بقولهم تفوو من بؤوكم كفرله الشر ان شاالله اللى يكرهونى دا انا لسه صغير وقولت بأه احكيلكم على شوبة مواقف واحكموا انتوا بأه بس من غير تريقه...

انا السكن بتاعى فى الدقى بين محطة مترو البحوث ومحطة جامعة القاهره وديما كنت بركب من الجامعه فجيت فى يوم وقولت اختصر واروح اركب من البحوث ما انا كده كده برجعلها تانى روحت وقطعت التذكره وركبت المترو وبعد كده فوجئت بالمترو وصل محطة جامعة القاهره (ركبت اتجاه مخالف)...

وبمناسبة المترو اول امبارح انا كنت راجع الشقه ولقيت تلاته راكبين ومعاهم شيلة حديد انا استغربت هما دخلوا بيه ازاى المهم واحد فيهم نزل السادات وهو نازل اللى معاه قاله قولهم يستنونا فى محطة البحوث عشان يشبيلوا معانا فقولت لنفسى الناس دى نازله البحوث وهايعملوا قلق ع الباب لما اجى نازل وجات محطة البحوث وفضلت اتابع باستمتاع هما بينزلوا الحديد ازاى بسرعه قبل ما الباب يقفل وطلع المترو وعملت حسابى ان نازل المحطة اللى جايه وفوجئت انها محطة جامعة القاهره والمفروض انزل اللى فاتت...

اما الموقف ده بأه بيحصلى كتير عايز اعمل شاى اروح املا البراد واحطه ع البوتجاز واجيب الكوبايه واحط السكر والشاى و أقف فى انتظار الميه تغلى وكل شويه اروح ابص ع البوتجاز الاقيها مش عايزه تغلى وفى الاخر اكتشف انى ما ولعتش البوتجاز اصلا...

مره كنت باكل وقاعد زى العاده بتفرج ع التليفزيون وبعد ماخلصت اكل حطيت الاطباق على دهر التليفزيون والريموت فى المطبخ...

والموقف العسل بأه انى لما اكون رايح اصلى بتوضى وبعد كده انزل اجرى فى الشارع وبعد شويه افتكر انى مالبستش النضاره ارجع تانى...

واحد يكلمنى فى التليفون ويقولى عدى عليا عشان عايزك اقوله حاضر نص ساعه وجايلك وانسى اروح اصلا...

واللى بيحصلى بردك ان اجى كده العصر واقول انا هاروح عند اختى العشا ولما تيجى العشا افتكر انى المفروض فى حاجه اعملها لكن هى ايه مش عارف...

لما كنت فى الشركة الاقى حاجات كتير كده عايز اخدهم عا الهارد اقول خلاص هاجيب الهارد بكره اخدهم وعلى كده شهرين على ما افتكر اجيبه ويوم ما افتكر انسى انا كنت عايز انقل ايه اصلا...

وساعات كتير ببقى ماشى فى الشارع وفى واحد اعرفه جاى مقابلنى على بعد 30 متر وافضل افتكر فى اسمه مش عارف... و بيحصل برده انى اقول فلان جاى هناك اهو هاسلم عليه بقى ولما اروح عنده اكون نسيت انه مقابلنى واتلهى فى اى حاجه... واللى يقولى ازيك يامحمد اقوله ازيك يااااااااا اسمه ايه اسمه ايه؟؟ يلا ازيك ياباشا...

والحاجه اللى بتزعل انى ساعات انسى اكلم ناس اصحابى عشان ما سلمتش عليهم من فتره وكمان ممكن توصلنى رساله واقول هابقى ارد عليها وانسى...

وفى حاجات من دى كتير بس دول اللى قدرت افتكرهم... اللى يفتكرلى حاجه بقى يقولها... وياريت اكون ضحكتكم شويه اصل الناس كل شويه تقولى كأيتنا كأيتنا يلا هيصوا بأه وسمعنى اغنية الباشا فضل شاكر نسيت انساك...

* ربنا يرجعهلنا بالسلامه ومعاها اللى طالبينه طبعا...

حد لقى حلم...؟؟؟

طول عمرى حاسس ان انا من دون كل الناس فوق... وعايش فى حلم وتايه فيه وبحلم ببكره وما كنتش فاكر ان هايجى عليا يوم وافوق... والاقى نفسى عايش تحت... والدنيا دى ياصـحبى بخت... تجرى فيها مهما تجرى وترسم مهما ترسم... ومهما جيت او حتى روحت...اللى ربنا كاتبه لازم يشوفه الخـد... واوعى تفكر ان انته مـخير... لا والنعمه دا انته مسير... ربنا كتب والامر نافذ... ما عليك انك تقول حاضر...

بس مش بقولك كده عشان تبطل حلم... لا بجد احلم وارسم بس ما تنساش تكتب حلمك فى ورقه... قبل ما يجى عليك اليوم وتنساه... ما غيرك يـاصـحبى فى بكره تاه... وتصـحى تلاقى نفسك فى يوم مش فاكر حلمك كان ايه ياولداه... ولا انته اصلا عاوز ايه... وكل اللى بتعمله فى الدنيا دى بس الواجب... بتنام من كتر الوقت... وبتاكل عشان دا معاد الاكل... وبتضحك عشان دا حق الناس عليك... وبتزعل من مـجي الناس عليك... وهاتعيش وبينك وبين اللى نفسك فيه مليون حاجب... وهاتلاقى الناس بتسألك أصعب سؤال... بم تفسر اللى بيحصلك ده...؟ طب يعم علل انته ليه حالك كده...؟

شوفت مش عارف تحل ما انته طول عمرك خايب ونايب... وعملى فيها لبن رايب...ما اصل ياجماعه والله عقدتى طول عمرى سؤال بم تفسر ... وكنت اول ما اشوفه فى الامتحان هو وعلل يركبنى الغم واقول يارب استر يارب يسر... انا والله اذا كان عليا نفسى اقول للدنيا لأ... وبالاستيكه امسح وكمان بالشكوش اكسر اى فرق... بينى وبين كل اللى نفسى فيه... واللى بحلم بيه يتحقق والناس بأه تبدأ نأ... ويقولك شوفت يعم دا راكب عربيه بيجو307... وشايل موبايل سامسونج امنيه i900... ومعاه كمان لاب توب ابل... وبيلبس ياحبة عينى هدوم ماركة... دا بيشيل الالفين جنيه فى جيبه فكة... ولو اتسرق منه حتى 500 جنيه معاه مش فارقه... والدنيا كده تمشى وتبقى حلوه والواحد ما يبقاش فاضى يرد على تعليقات حد... واعمل فيها مشغول وابقى احاول مره كده اراضيكم بأى رد... وتقول بأه شوف الندل... نيته سوده من دلوقتى... ناوى يطنشنا ويقولك معلش وقتى... طب انوى خير يعم وهى تبقى بمبى...

على فكره الكلام ده كله حلم... واعمل ايه ما انا مش عارف ابطل احلم... بس مشكلتى بحلم كتير لدرجة انى بنسى اللى بحلمه... وقررت انا امشى ورا كلام الست لما قالت "قد يكون الغيب حلوا انما الحاضر احلى"... والحمدلله على الحاضر.... ومهما كان الغيب احنا بنقول يارب حاضر....

هـانت...!! ولاّ اللى بـاقى كتير...؟؟

من يومين كده أنا قـولت هاروح القاهره أقعدلى يومين... تقولى رايح أعمل إيه مش عارف... طب السبب إيه برده مش عارف... طب ناوى على ايه ياعم والله ما أنا عارف... المهم سافرت وقعدت وطبعا زى العاده مش لاقى حاجه أعملها... وقـاعد فى الشقه طول النهار... وبالصدفه جه عليّا إضراب 6 ابريل... فقولت ياواد إضرب معاهم... ما إنته كده كده قـاعد... وأهو لو نجح الإضراب ده وعمل حاجه ممكن التاريخ يذكرك عشان انته كنت معاهم... فلقيتهم بيقولولك أخى المواطن ماتخرجش من بيتك يوم 6 ابريل وما تروحش الشغل... وأنا فعلا ما خرجتش وأصلا مفيش شغل... وقالولك علق أعلام على الشبابيك...بس للاسف ماعملتش كده مش عشان مفيش معايا حق العلم... لأ دا عشان الشقه اللى أنا فيها مفيش غير شبالك واحد بس وكمان طالل ع المنور يعنى لو علقت حاجه الناس مش هاتشوفها ... وقالولك كمان يـاريت تلبس أسود فى اليوم ده... وأنا مش هاقولك مالبستش أسود عشان ما عنديش أسود... لأ دا أنا عندى بدله سوده بس ما لبستهاش عشان ماكانشى عندى انترفيوهات فى اليوم ده...

وخلصوا هما اضراب وفضلت أنا مكمل مع نفسى وقربت على الاكتئاب... والعمليه بدأت تضلم أكتر وأكتر... بس فجأتا قولت لأ ووقفت كده زى الأسد... وقولت أنا مش هاسيب نفسى للزعـل... ومش هاستسلم وهقاوم وهقاوم وهاخلى عندى أمل... وأكيد فى نور جاى على رأى أحمد فرحات... وقولت أنا لازم أقوم وأتحرك وأخرج من جو الإكتئاب ده... غيرت هدومى وخرجت وبرده مش عارف رايح فين... قـعدت أفكر فى حد صحبى أروحله مالقتش... واللى لقيته لإما بعيد أوى لإما راجع من الشغل تعبان ومش هايقدر يخرج معايا... فقولت خليها تمشى وشوف رجلك هاتوديك لفين... ركبت المترو وفضلت أعد ف المحطات... لحد ماجات محطة رمسيس قولت ياواد رمسيس دى فيها ناس كتير أوى... ممكن تقعد تتفرج عليهم وأهو هاتشوف واحد رايح وواحده جايه وأهو الوقت بيعدى... ولما نزلت رمسيس وقفت شويه وبسرعه مليت... الناس الكتير الموجوده معظمهم حالتهم بؤس وحاجه تصعب عليك... وفكرونى بنفسى فقلت هى أصلا مش طالبه... قوم يابنى مشّى رجليك لنص البلد... وانزل طلعت حرب اتفرج على المحلات والسينمات وأهو جو يلهيك شويه...

ولما وصلت طلعت حرب شوفت السياح والبنات والموضه والشباب الفانكى بتوع مامى اللى بتجيب عربيات ودادى اللى بيجيب موبيلات... والناس اللى الدنيا ماشيه معاهم فل ومفيش أى مشاكل... قولت فى عقل بالى يالله ياولاد الكلب وأتخنقت من الناس دى وحسيت كده بالحقد الطبقى... فكبرت دماغى وسيبتنى منهم واتفرجت على المحلات... لقيت شوية بدل وتى شيرتات إنما إيه روعه...! وبصراحه عينى طلعت عليهم... بصيت ع السعر لقيت التى شيرت معدى ال400 جنيه... والبدله معديه ال 1000 جنيه... بصيت فى جيبى مالقيتش غير 20 جنيه... إتخنقت وإفتكرت حالى وقعدت أندب فى حظى وميلت بختى... ماهى كل ماروحلها كده تجيلى كده اعملها ايه يعنى...؟؟ زهأت ورجع الاكتئاب أزيد من الاول... وقلت يارتنى ماخرجت وقعدت فى الشقه... وكملت إضراب وركبت أول مترو راجع ع الشقه... يلا سلام...ادعولى...!!

مبسوط ومزأطط...

فجأه فتحت عينى... ومن غير تردد ولا تفكير... قمت انا من ع السرير...
ومش متعود انا على كده... وديما على ما اقوم لازم اخدلى ربع-نص ساعه كده...
روحت على الحمام جريت... وغسلت وشى واتوضيت...
وبسرعه غيرت هدومى والله ع المرايا ما بصيت... وعلى السلم نزلت جريت...
ونزلت الشارع ولقيت... الدنيا المليانه بقت فاضيه... والناس الشقيانه كلها نايمه...
وقابلتنى نسمة هوا جايه... صوت الشيخ مصطفى اسماعيل معاها شايله...
بيردد ويرّتل فى اجمل أيه... تقريبا من سورة الانسان...

وسمعت ام بتدعى بامتنان... يـارب يـارحـيم يـامنـان... شفع فينـا القرآن...
واحشرنا يـاكريم يـارحمان... مع حبيبك النبى العدنان "عليه الصلاة والسلام"...
وراجل عجوز ماشى...من شدة البرد بيقاسى... وقـادره عليه الكحه...
يديك ويدينى الصحه... قالى صباح الخير يابنى ــ صباح الخير يابركه...

مديت وراه خطوه... وخطوه وراها خطوه... سمعت صوت زقزقه...
من عصفورة صغيوره محندقه... بتتنطط من حته لحته... احساسى انها مبسوطه...
بصيت فوق فى السما... مالقيتش اجمل من كده صفا...
ولقيت سحابه صغنططه... مع النسمه ماشيه متمختره...حاضنهم نور الصبح والشقشقه

وديك عمال ينادى... كوكوكوكو... اصحى بأه ياهنادى...
وبعده سمعت ديك تانى... كوكوكوكو... اصحوا يااهلى ياجيرانى...
وبعده ديك تالت... كوكوكوكو... وماشاء الله صوته واصل لحد ميت نابت...
وكأنهم بيصّحوا بعض الرجاله... والناس يعينى حالتهم حاله...
مش حاسين بأى حاجه... نايمين فى سابع نومه... ومحدش فيهم سمع النوبه...
وحتى لو حد سمعها... بيطنش وبيبيعها... يعم نام دا الدنيا ساقعه...
وأنا اكتشفت ان مفيش حاجه مانعه... دا والله بس حبة خيبه...
بالعكس دا انا حسيت بسعاده وفرحه... ومبسوط اوى ومزأطط...
وعايز اجرى كمان واتنطط... وعلى كل الابواب اخبط...
ووقفت قدام كل البيوت... ياناس ياهوو خلاص سكوت...
انا من غير ما اكسل ولا اتردد ولا حتى استنى افكر...

...صحيت ورايح اصلى الفجر...

يوم عيد ميلادى...

فى يوم عيد ميلادى (20/3).. قولت افتكر انجازاتى.. كام مره ركبت تاكسى.. ولاّ كام مره كلت عندى حاتى.. واكتشفت ان عمرى ما دوقت الجمبرى.. بس بقيت محترف جيلاتى.. ويوم ما فرجت اوى جربت البليله بتاعت الفخرانى.. ويوم ما كانت بتزنّأ كنا بنتمشى ع المشايه بشوية فول سودانى...

عارف انا عدى عليّا 24 عيد ميلاد ماجاليش غير هديتين والباقى تهانى.. وما احتفلتش غير مره بس بعيد ميلادى.. العيال ولاد الايه اصحابى.. جابولى سخان الشاى الكهربائى.. وولعوه وطفوا النور وغنوا هابى بيرث داى ياغالى.. وقعدنا نضحك ونهرّأ وبجد ما كانشى يوم عادى.. وكان اليوم ده فعلا من احلى ايامى...

طب عارف طول عمرى فيه حاجه محيرانى.. يوم ما جيت للدنيا كنت واد ابيضانى.. ولما دخلت المدرسه قالولى لأ دا انته قمحاوى.. وعشان كده رجّعونى وقعّدونى ف اخر تخته فى اولى ابتدائى.. ولقيتهم بينجحونى غصب وقالوا لازم كده عشان ده التعليم الاساسى.. وخضّونى بكتاب هالو وبت باى بت وجيم بتاع الانجليزى.. ولقيتهم بيدّرسولى خمس مناهج فى تلات سنين اعدادى.. ودرست سانغفوره والحياه فى القطب الشمالى.. وقولت لنفسى افريقيا ماشى امال بأه تاريخ امريكا الجنوبيه مالها ومالى.. ولقيت نفسى لا عرفت انجليزى ولا حتى عرفت تاريخ بلادى...

ولقيتهم برده تانى زأّونى وعدّونى اولى ثانوى.. وقالوا الدنيا هنا مختلفه واللى هاتدرسوه نظرى هاطّبقوه فى المعمل الكيميائى.. وانا وغلاوتك عندى لاشوفت معمل ولا شاركت حتى فى يوم رياضى.. بس فى تالته ثانوى انا بأه اتشطرت وكنت واد تانى.. اصل كلام فى سرك انا كنت واد معجبانى.. وقابلت ست البنات الأموره وقولتلها انا...! قالت لأ لازم الاول ياشاطر تثبتلى وتطلع الاولانى.. واتذليت اخر ذل وجيبت مجموع يجى منه بس ما طلعتش حتى التانى.. ودخلت هندسه ولما عملت فيها عبقرينوا شيلت رسم فى اعدادى.. واستعبدتنى الدكاتره وعشت ليالى كتير وجعانى.. واشتغلونى وحسسونى ان احنا صفوة الخلق والسوق بره علينا بينادى.. وفرشولى الدنيا الوردى ورسمت على كلامهم الامانى.. وقالولى لما هاتتخرج هاتبقى مهندس بالشىء الفولانى.. وادينى اهو اتخرجت ولا لقيت كبده ولا لقيت سجق ولا دوقت العكاوى وكل مااقولهم ياجماعه دا انا مهندس يقولولى يعم روح دا حكاوى...

وفضلت طول عمرى عايش فى الدور التحتانى.. ولما اتجرأت مره وبصيت على الدور الفوقانى.. اتسكعت قلم على وشى ورجعت تانى لمكانى.. ومن يومها اتحوالت ومش عارف ابص قدامى.. وبقيت ماشى فى الدنيا مغمض عنياّ بس ساعات كده بمشى بدماغى وافردها ع الدنيا واقولّها يانت يانى.. ومش عارف ايه اخرتها.. وامته هاخطب وياترى مين هى الحلوه اللى مكتوبالى..

اه نسيت اقولكم ان انا بقيت للكتابه غاوى ومره اشتريت كوتشى من محلات القناوى.....سلام

مش من عوايدنا...

أوقات يا دنيا معاكى بعيش.. وساعات مابفهمكيش.. وانتى ولا فاهمانى.. أوقات بحس ان أنا مجروح.. عايش حلاوة روح.. ودمعتى محوطانى.. أوقات فى عز العتمة بشوف.. وساعات بموت من الخوف.. وغصب عنى بدارى.. بحلم يعدى عليّا الليل.. من غير عذاب ولا ويل.. وتحسي مره بناري.. أوقات بتاخدى أعز الناس.. وأقول نصيب وخلاص.. واصبر على أحزانى.. أوقات بحب قلوب بتبيع.. وفي ألف لحظه بضيع .. وبرضه مش حساني.. صابر ع اللى بيجرالى.. وانتى لا ليكى عزيز ولا غالى... (أغنية محمد فؤاد وكلمات مصطفى كامل)

هو أنا ليه ماخدتش.. بالى مره وكمان مافكرتش.. إن أنا ممكن اجرح ناس وكمان أخربش.. وديما بقول إن أنا مأبأذيش.. وأتارينى بأذى ناس.. وبعاملهم من غير احساس.. وأرجع أقول دا أنا اسف دا كان قصدى والله خير.. دا أنا بس كان عندى مشكله.. وكنت مشغول فى حلها.. والحمدلله وصلتلها وعرفت أيه اصلها.. وياريت ماتزعلش منى وأنا اسف مره تانيه.. واقول لنفسى ما أنا خلاص اعتذرت.. يعنى هاعمّله إيه أكتر من كده.. أنا خلاص عملت اللى عليّا.. وأتارينى سيبت قلب بيبكى وكمان بيقاسى.. وهايفضل يتألم سنين وسنين.. مع انى سألته وقالى دا أنا مسامحك.. وعادى ماهو ده طابعك.. طول عمرك مش متعود تيجى تقول أنا أسف باقتناع.. ولا عمرك حتى قولت متشكر بإيقاع.. طول عمرك بتقول أسف وبحس إنها غصب عنك.. وكمان متشكر وهى يعينى مخاصمه قلبك...

عارف انته لما تزعل حد منك كأنك دقيت مسمار وشيلته تانى فلازم يسيب أثر فى مكانه...

طب عارف مره إتنين كانو بجد إخوات.. وديما بيقضوا مع بعض أحلى أوقات.. ومن كل قلبهم بيدعوا لبعض ويتمنوا أمنيات.. ولعب وضحك ودمع وهزار وحاجات وحاجات.. جه الشيطان دخل بينهم من سكات .. وزعلوا من بعض واتخاصموا ساعات وساعات.. ومع مرور الوقت كل واحد فيهم كان بيستخبى جوه قلبه ويتمنى ترجع تانى الضحكات.. ونفسه يجى اليوم اللى يرجعوا فيه تانى اخوات.. بس كان واقف بينهم للأسف شوية عناد.. بأه أروح اقوله أنا اسف.. أنا جرحتك.. أنا اذيتك.. أنا زعلتك.. أنا ظلمتك.. سامحنى دا أنا كل همك.. دا أنا صحبك.. دا أنا أخوك ..دا أنا نفسى أبقى جنبك.. وأرجع تانى امسحلك الدمعات...وفضلوا اللى الاتنين يكابروا ويكابروا مع العناد.. وعدى الوقت وجات اللحظات.. اللى فيها اتصالحوا بس للاسف مش زى الاخوات.. وعشان مش عارفين يرجعوا تانى اخوات.. فضلوا طول عمرهم يندموا على اللى فات.. واعتبروها بس برواز لأجمل ذكريات.. وكان ده كله سببه إيه إن اننا مش متعودين نتعامل بشوية مصطلحات...

فيها ايه لو قلت من كل قلبك متشكر.. ومعاها إبتسامه بكل تحضر.. ولو جريت عليه وقولت بكل جوارحك أسف.. وصدقنى لو لفيت الدنيا مش هاتلاقى حد أكتر منى عليك خايف.. يابن الناس... ما تنساش كلام عليه الصلاة والسلام "تبسمك فى وجه اخيك صدقة"..."لا يحل لمسلم أن يهجر أخاه فوق ثلاث ليال‏ "..." إن الله قد أعطى كل ذي حق حقه " فيها ايه لو جيت مره وانته بتشترى حاجه.. او بتقرا حاجه.. او بتنزل حاجه من على النت وقولت متشكر.. او لو انته ماشى وخبط حد من غير قصد.. او ظنيت ظن سيىء.. او حتى شتمت او عملت اى تصرف غلط ..وقولت انا اسف... صدقنى هى حاجه جميله جدا وهاتزعل أوى لو قولتلك الناس بره بيتعامله كده وبيقولوا عليها تحضر مع انها عندنا أصل فى إسلامنا..

وكبدايه منى متشكر على قرايتك وأسف ان كنت صدعتك...

أصل بيقولك الأزمة جات عندنا...

تضحك أوى لما تسمع واحد بيقولك إحنا حظنا وحش السوق نايم ومفيش شغل عشان الأزمه العالمية... والتباع يقولك يأستاذ الفلوس القديمة دى مش هاتمشى إنته ماسمعتش عن الأزمة ولا إيه... تروح تشترى أى حاجه يقولك معلش هى غلت شويه عشان الأزمة... وسبحان الله الحاجات كلها بترخص وعندنا إحنا بتغلا... ويقولك عشان الأزمة وهما مش عارفين الأزمة دى بتاعت إيه أصلا...

والى يغيظك اكتر إنك تسمع عن الشركة الفلانيه بتاعت العربيات سرحت 20% من عمالها وبتدى عربيه هديه على كل عربيه متباعه... والشركة العلانيه بتاعت الأجهزة الإليكترونية قفلت 30 مصنع... وشركة مش عارف إيه فلسّت... وشركة إسمها ايه بتقول حاجة لله يامحسنين... أمال بأه عندنا عمرنا ماسمعنا عن شركة واحده فلسّت أو سرّحت حد من عمالها... عز الدخليه زى ماهو والأسمنت ميه ميه وفى العالى كمان... وفودافون وموبينيل شغالين عروض اشطه والدنيا تمام وميت فل وعشره... أمال بأه فين الأزمة اللى بيقولوا عليها... هى جات بس على الحاجات اللى بنشتريها يعنى...

طب الأمريكان عندهم أزمة عشان الناس دى بتتعامل بفيزا كارد... يعنى الواحد من دول بيفضل يشترى من هنا ومن هنا بالفيزا والبنك مفيش فيه فلوس اصلا يعنى مش هايعرف يحول قيمة الحاجات اللى صاحبنا اشتراها للمكان اللى اشترى منه وبكده يبقى البنك مديون والناس تفضل تصرف وهو ديونه تزيد أكتر ومايقدرش يسد يقوم يحصل عجز عنده وبكده حصلت الأزمة... أمال احنا بأه اسم النبى حارسنا وصاينّا... فين بأه الناس دول اللى بيتعاملوا بالفيزا دى يطلعوا كام واحد يعنى... طب لو قولنا فى ناس معاهم فين الاماكن اللى هايصرفوا فيها بالفيزا دى...

هو بينى وبينك حاجة عسل أوى وحركه شياكة... لما أروح لإبراهيم لولو وأقوله "بجنيه جبنه وجنيه لانشن ونص جنيه كيس شيبسى وكيسين كاتشب ياعم ابراهيم" يقولى "فيزا ولا كاش ياستاذ محمد" أقوله "فيزا طبعا ياعم ابراهيم هو فى حد لسه بيتعامل بالكاش اليومين دول خد الفيزا أهى بس وحياتك ياعم ابراهيم زود عشرين جنيه على حسابك واديهالى عشان بس محتاجها" يقولى "وماله خد ياستاذ محمد الفيزا بتاعتك والعشرين جنيه كمان"... ولا بأه يعم تشيل فكه ولا جنيهات فضيه وكده بأه لما حد يقولى أزمة أصدقه بجد...

من الأخر ياجماعه أنا واحد من الناس لاشفت أزمة ولا أعرفها ولا والنعمه حتى قابلتها... ولا سمعت إن اقتصادنا إتأثر بيها دا إذا كان فى إقتصاد أصلا... الحاجه الوحيده اللى سمعت إنها إتأثرت بيها قناة السويس عشان فيه شركات فلسّت... يبقى مفيش بضايع بتتنقل... يبقى مفيش سفن بتعدى... وبالتالى حركة المرور هاتقل... يبقى مفيش فلوس جايه... ومن يوم ما الأزمة دى حصلت قناة السويس قلت إيرادتها 13% وبما انه كان فى اصلا نسبة 80% بتتسرق... فالحرامى قالك أنا أعمل فيها ابن بلد ودور جدعنه وأرضى بقليلى واسرقلى 63% بس المرّادى ونبقى نعوضها لما الأزمة تعدى... وعشان كده فضلت الدنيا هىّ هىّ ومفيش أزمة عندنا ولا حاجه... مفيش غير النصابين والحراميه اللى بيضحكوا علينا وبيتاجروا بينا ويغلوا الحاجه... واحنا ما بنصدق هما كدبوا الكدبه واحنا ساعدناهم فيها... قال ازمة قال ياعم روح... دا لو الأزمة دى بجد كانت مصر بحالها أعلنت إفلاسها أكتر ماهى... والحاجات كلها رخصت وكان الواحد اشتراله موبايل اى فون ب 300جنيه ولا حاجه وخد عليه واحد هديه كمان هى دى الأزمات ولا بلاش...

مفيش فايده...

عندى كلام عايز أقوله....هو إنتو ليه مستكترينه....يعنى هو إنتو اللى كنتو مدونينه.. اللى يقول دا سارقه.. واللى يقول دا مش كلامه.. واللى قالت دا أكيد مجمعه.. واللى قال يعم أنا عارفه.. وبالأماره دا مش شعره.. والأخير قال يعم دا انت آرفنا.. هو دا يعنى اللى انت شايفه.. طب كتر خيرك يعم عارفه.. هو اللى حصل إيه يجماعه.. هو أنا يعنى جبت من بره.. ولا يعنى اخترعت الذره.. ياناس دا أنا بس حلمت بفكره.. أقدر بيها أرسم ضحكه.. ولاّ يمكن بيها أمسح دمعه.. أو حتى ممكن أوصل فكره.. وكان كل أملى أسمع دعوه.. يارب زيده وكمان باركله...

ماهو إحنا لازم نحلم ببكره.. ونرسم أمل للّى بعده.. ونقول يارب حققه.. بس لازم نمد خطوه.. ومش كفايه بس الكلمه.. هو يعنى باراك لما حلم بمجده.. قالو عليه ياهناه ياسعده.. أكيد قالوا ساعتها دا ابن هبله.. بس هو فضل ورا حلمه.. وأمه قالت يارب ساعده.. وأصحابه قالوا لو وقفنا جنبه.. دا أكيد فى يوم هيبقى حاجه.. وأهو بقى رئيس لأكبر دوله.. وهايعملهم كل حاجه...

ياناس ياهووو خلاص كفايه.. وفكروا بقى فى أصل الحكايه.. ونبطل بقى نحل الفزوره.. وكفايه خلاص نبص ع الصوره.. ونحاول مره نبص ع اللى ورا الصوره.. ونفهم بقى مين اللى قاصد يرميلنا دى فزوره.. ماهو زمان أمي قالتلى يابنى ياضنايه.. بيوتنا عشان يسرقوها الحراميه.. لازم ولابد يعملو تمثيليه.. وعشان كده عملوا حريقه.. وسابونا احنا نجرى ندور ع الحقيقه.. الحقيقه اللى هما أصلا مزيفينها .. وفضلنا نألف كم قصه بريئه.. وقعدنا نضيّع دقيقه ورا دقيقه.. ودخلوا هما سرقوا الجميله.. أحلامنا وأمالنا العظيمه.. وقدروا يحققوا منها الغريبه.. وأدينا أهو عشنا وشوفنا الحديده.. بتغنى سعيده ياحلوه سعيده.. وخلينا بأه قاعدين ونقول لا يعم دى بعيده...

فيها ايه لو عملنا وقفه.. بس المره دى مش من اللى هيه.. المجتهد نساعده بفكره.. والشاطر نشد ساعده.. والكسلان نقوله همه.. والناجح نسأفله سأفه.. وتبقى كل أمالنا نبنى أمه.. ونبطل بأه نكسر مأدفه.. ونقول ربنا يعينه.. ويديله كمان ويزيده...

وفيه واحد مش هيبقى عاجبه.. ويقول حجاز ده عامله دوشه.. أنا قلت ياجماعه سيبكوا من الواد ده .. داعاملّى فيها سبع البرمبه.. ماتلم نفسك ياد أصل والله بالقديمه.. خلاص يعم من غير شتيمه.. وبلاش تقول ألفاظ رذيله.. وأنا عارف إن قصدك تقول مفيش فايده.. وعلى فكره مش انت لوحدك اللى بتقول مفيش فايده.. أقولك أحسن تعالى نشربلنا كاسين ونحاول ننسى...

الباحث عن الصفر

الناس الحلوه الطيبين...

إن ما قدرتش تضحك .. ما تدمّعش ولا تبكيش... وإن ما فضلش معاك غير قلبك...إوعى تخاف..!! مش هاتموت.. هاتعيش... وإن سألوك الناس .. عن ضي جوا عيونك ما بيلمعشي...!! ما تخبيش ..قولهم العيب مش فيا ده العيب م الضي...وأنا مش عاشق ضلمة..ولا زعّلت الضي... مسير الضي لوحده هايلمع... ومسير الضحك لوحده هايطلع... ما بيجرحش ولا يئذيش... " كلمات محمد ناصر وفى ناس بتقول فؤاد حداد "

من أجمل مميزات الشعب الصينى واليابانى الابتسامه المرسومه طول الوقت على وشوشهم فى الشارع فى الشغل وفى كل حته مع ان المفروض دى تكون عندنا احنا.. شوف بأه وانته ماشى فى الشارع مره بص لوشوش الناس مش هاتلاقى حد بيضحك اصلا.. طب اركب عربيه كده مره هاتلاقى الناس كلها موجوعه ومكتئبه وكل الناس دى غرقانه فى تفكيرها وشايلين على راسهم كل همومهم ومشاكلهم... اللى شايل هم عياله.. واللى مش لاقى شغل.. واللى شايل هم المذاكره والامتحانات.. واللى مرتبه مش مأضيه.. واللى عايز يتجوز.. واللى داخل الجيش.. واللى عايز يسافر.. واللى خطيبها مزعلها.. واللى مخطوبه لواحد هى مش عايزاه.. واللى نفسه يخطب واحده ومش عارف.. واللى مديون لخلق الله.. واللى واللى واللى ...

لكن نفس الناس دى لما يكون عندك فرح بتجيلك وترقصلك وتفرحلك وكأن مفيش عندها اى مشاكل فى حياتها... تقولهم نجحت يزغردولك.. تقولهم انا خطبت يباركولك.. تقولهم انا اتجوزت يغنولك... انا لقيت شغل يتبسطولك.. انا مسافر يدعولك.. انا مضايق يقولوك تعالى نخرج شويه وعن نفسك تفك.. انا عندى مشكله طب احكيلنا ونحاول نحلهالك.. انا عندى امتحان يقولولك ربنا يوفقك.. وبعد ما تطلع من الامتحان تلاقيه بيتصل بيك ويسألك أكيد ربنا ما زعلك.. وتقولهم مش لاقى شغل ومكتئب يقولوك لا لا مش كده صلى ع النبى وان شاء الله بكره الفرج يخبط على بابك .. تقولهم خلاص انا زهقت يقولوك لا مش كده امال يلا قوم اتحرك .. ابعت ..اتفائل ..اضحك.. تقولهم انا خلاص ماعدتشى عندى يقولولك بكره ربنا يديك.. تقولهم راح منى يقولك اكيد دا مش مكتوبلك واكيد ربنا مش رايدلك ... ولما انته بأه تزعلهم تلاقيهم جايين يجروا عليك ويقولولك سامحنا دا ما كانشى بإيدنا مع انك انته اللى جيت عليهم.. وطول الوقت تشتكى وهما طول الوقت يطبطبوا عليك ...

والغريبه اننا عارفين ان هما كمان مهمومين.. ولما نيجى نحط ايدينا على جرحنا تلاقيهم مالوا على جنب وهمسوا مع نفسهم وافتكروا إن عندهم الف جرح وجرحين ..بس هما فى ثوانى نسوا همهم لما لقوا انهم ممكن يساعدونا وممكن يضحكولنا وكمان يقفوا جنبنا وعلى اوجاعنا معانا متحملين...

مانعرفش هما بيعملوا دا ازاى... ومانعرفش هما بيجيبوا القلوب الطيبه دى منين.. ولانعرف هما بيقدروا يطلعوا الحنيه دى كلها امته.. بس اللى نعرفه كويس ان الناس دى احسن من الصينيين واليابانيين.. واللى نعرفه كويس ان الناس دى مش هايكونوا ولا هايبقوا غير اصحابنا وحبايبنا الكويسين.. الناس اللى طول عمرهم لهمومنا شايلين.. الناس اللى طول عمرنا بنقولهم احنا لينا ايه عندكم ياطيبين.. وعمرنا ما قولنالهم انتم لينا محبوبين.. ولا حتى عرّفناهم انهم من قلبنا قريبين.. بس اكيد جه الوقت اللى نقدر نقولهم فيه احنا بجد متشكرين.. وعلى رد جمايلكم يارب نكون قادرين.. ولأحلامكم وامانيكم يارب محققين.. وعلى همومكم ومشاكلكم يارب متغلبين.. ويخليكم لينا ربنا يا حلوين وما يحرمنا منكم أبدا ابدا ابدا يارب امين...

الباحث عن الصفر

هو إحنا إيه ذنبنا..؟

حبيبتى أم الدنيا...

أنا بعتب عليكى وعايز أشتكيلك.. أصل أنا خلاص فاضت بيه وصعبت نفسى عليّا..والحزن مالى عنيّا والفراغ هايقتلنى... ما أنا لما كنت بسمع عن البطالة اللى زادت كنت بقول دول مش عايزين يشتغلوا.. دول الناس اللى اتعلموا وهما مش عايزين يتعلموا.. دول اللى كان بياخدوا الشهاده وهما مش عارفين هما اصلا ليسانس ولا بكالوريوس.. دول الناس اللى معاهم ما كانتش فارقة النهارده زى بكره.. لكن إحنا إيه ذنبنا إتعلمنا وعمرنا ما قصرنا.. وليل نهار مذاكره وما قولناش مش عاجبنا.. وأعلى الدرجات والتقديرات تعبنا وآدينا جبنا.. ولما قولتى ولادى قولنا فدائى فدائى أفديكى بدمائى ومكتوب ونصيبنا.. وبعد كده لفينا فى شوارعك وحواريكى وطلعنا ونزلنا.. وأخرتها إترمينا على أهاويكى ومفيش عندك شغل وزهقنا...

ياأم الدنيا هو إحنا قصرنا فى إيه..؟ عمرنا ماقولنالك إنتى ساكته على ظلمك ده ليه.. ولا سايبه حكومتك تعمل فينا كده ليه.. ولا عمرنا مشينا فى مظاهره.. ولا لعنا الارض الطاهره.. ولما بنتثبت فى كمين بنطلع البطاقة ونقول آمين.. ولا قولنالك ليه القطر بيتحرق والطياره بتقع.. ولا ليه الزيت بيغلا والغاز بيتسرق.. ولما الحديد ولّع قولت هاسكن ومش بانى.. ولما عمل زيه الدهب قولت كفايه دبله وتغور الأمانى...

ياأم الدنيا دا إنتى بأت أرخص حاجة فيكى المرض والعلاج بأه غالى.. والأكل الملوث إتفرض وقال الجسم آه وآه آه يانى.. والخير والقلب الطيب إنقرض والشر والقلب الجاحد علينا بأه جانى...

ياأم الدنيا لمى عيالك فى حضنك ووصى الكبار علينا.. الكبار اللى زمان رضعوا من سدرك ودلوقتى بيسرقوا فينا.. ياأم الدنيا دا احنا كل اللى عايزينه منك مش غير إنك تقدرينا...

ياأم الدنيا إلحقينا دا إحنا محركاتنا لسه ما عملتش ولا كيلوا.. ولو السفر فتح بابه صدقينى مش هانرجع تانى.. ولو بعد ما سافرت صرختى وقولتى إلحقنى ياولد..؟ هاقولك نعم..! بقى أنا أرجع وأتزل تانى.. أنا مالى خلى حاميكى يسرقك.. والمطافى تحرقك.. ومستشفياتك تمرضك.. وجيشك يقتلك.. والأمريكى يجى يقول دى أمى.. والأنجليزى يقولى دى حضارتى.. والصهيونى يقول دى بلادى وأرض ميعادى.. بس خليكى فاكره إنتى اللى قسيتى علينا.. وإحنا اللى ولادك جوعتينا.. ونصرتى الحرامى علينا.. ومشيتى فى سكه غلط.. والظلم علينا إنخرط...

ياأم الدنيا دا احنا بقالنا كتير بنضحك والدمع جوه عنينا.. ولما بنتسأل بنخبى ونقول هاتفرج وطلع العيب مش فينا.. مع كل إحترامى انتى خدتى مننا كتير فيها إيه لوجيتى على نفسك يوم و ادتينا.. أصل هاخد أهلى وصحابى وجيرانى وناسى و نمشى وماتبقيش بأه تلومينا...

الباحث عن الصفر

حبيبى طب قولى دا يبقى إيه...؟

لما جه عيد الحب لقيت نفسى حيران أعمل إيه لحبيبى أعمل ايه ..؟ ما انا كل عيد اقوله بحبك وبموت فيك ومفيش جديد ..ولقيت مفيش غير إنى أقوله ان ف ناس تانية غيرى بتحبك أكتر منى ودايبه فيك وعندى الدليل إسمع...

روحت جريت على قلبى وقولتله بقولك إنته بتحبه..؟ قالى دا أنا بموت فيه ..قولتله إزاى..قالى دا كفاية لما بشوفة بحس إنى ف سعاده وفرحه.. وكل ما تقرب منه بحس إن هايجيلى سكته..ولما تقوله "إزيك" بيحصلى رجفه..ولما يرد عليك ويقولك "إزيك انته" الله الله يسلام على دى رقه..بحس انى هايم ..طاير ..عايم فى ارق نسمه..وكل ما يتكلم اكتر أقول يارب ينسى ويكتر ومايمشيش.. وحتى لما بيمشى بفتكر انه لسه مامشيش لانه بكل بساطة أعز منه مفيش...

قولت اما اسأل عينى ..بتحبيه..؟ قالتلى بتمنى رؤياه ..كل ما أفتّح مابشوفشى غير إياه...وكل ما أغمّض أحلم وأحلم وأبنى قصر ليّا معاه.. عارف لما بشوفه بيبكى باكى وابكى بحرقة ولو بالدم عشانه أتمناه...

ولما سألت رجلى قالت ..دا أنا حفظت طريق بيتهم ..وكل نيجى رايحين مشوار أستهبل وأحاول أروح من هناك ..ولما بتشوفه من بعيد بجرى عشان اقرب منه كمان وكمان.. ولما تيجى تمشى بمكر فيها واقول آاه وآاه يانى مش قادره أنا عايزه اقعد شوية وكمان شوية وشويات ..بقولك مش عايز تروح مشوار...

قولت أسال إيدى.. قالت لا سيبك من الموضوع ده انا كنت عايزه أشتكيلك ..عارف البنت اللى زى القمر دى اللى هيه رقيقه أوى دى ..ياعم اللى عندها نوخزه على خدها زى العسل دى ..اللى عيونها سوده لا مش سوده مش عارفه لونهم إيه بالظبط بس عامله زى البحر تغرق فيه وتقول مش عايز اطلع..ياسيدى كل ما تيجى تسلم عليها وتحطنى فى حضن إيديها من كتر الحنيه ما أعرفش افرد نفسى تانى ..ولو مش مصدقنى تعالى نروحلها نشوفها وبالمره نجرب..طب هاقولك إيه رأيك نكتبلها رسالة ما إنته عارف إنى بقيت شاطره فى الموضوع ده...

قولت مفيش غير عقلى إيه رأيك..؟ قالى يعم أنا مش عارف إيه ده من يوم ما انته شوفتها وأنا متبرجل طول الوقت قاعد أفتكر فى كل كلمة قالها لك.. افتكر نظره افتكر همسه افتكر لمسه افتكر بسمه ..عمرى ما بنسى شوقه ليّا ولا هانسى خوفة عليّا ولا لهفته وهو بيجرى عليّا..وديما بفكر أقنعك إزاى تروحله أو تكلمه او حتى تكتبله ..والله يعم انا تعبت والله تعبت ما تجيبه يقعد معانا على طول وتريحنا ...

على عينى والله اجيبه معاكم بس اعمل ايه كفايه علينا الهمسه واللمسه والرقه وكمان البسمه.. وانا عارف ان انا نفسى وانتم وكلنا نتمنى ..بس خلاص كده هو عرف أهو وهايقوم يكلمنا...

الباحث عن الصفر...

الجنيه المنبوذ...

سيدى/الجنيه الفضية الجديد ...
تحية طيبة وبعد....
يؤسفنا انا نبلغك بأنه غير مرغوب فى تواجدك بيننا... حيث أنك ياسيدى حظيت بشعبية جارفة من المواطنين الذين يرفضون التعامل مع سيادتك (رجالة ونسوان)... معللين ذلك بأنك ما بتعمرش فى جيوبهم لا إما بتقع لاإما العيال الصغيرة ولاد أختى بيستالئطوك من جيب البنطول بدل ماكانوا بياخدوا ربع جنيه...وكده أو كده يعتبر إهدارا للمال العام حيث كل مواطن بيقع منه نص مرتبه والنص الباقى العيال ولاد اخواتهم بياخدوه ...هذا وقد رصدت مصادرنا أكثر من حادثة فى جميع أنحاء المحروسة تؤكد ذلك الرفض...حيث تؤكد المصادر الأولية أن شعب المنصورة الباسل يحقق أعلى نسبة إعتصام عن التعامل مع سيادتك والامتثال لأوامرك وبالذات فى السيرفيس... فلو أخطأ مواطن وطلعك من جيـبه عشان يحاسب فإنه بذلك قد أعلن الحرب على نفسه تلك الحرب متمثلة ف مشادات كلامية وممكن توصل لحد الضرب والذى يهدف إلى زعزعة الإستقرار ف المنطقة... وقد استطاعت مصادرنا من رصد الواقعة التالية مما يؤكد صحة الخبر...
الزمان .../1/2009
المكان سيرفيس الجامعة -الترعة-جديلة جديلة جديلة
أبطال القصة تلاتة من الزباين منهم اتنين مكومين فى الكرسى الرابع ورا مع ان فيهم واحد طخين والتباع والسواق والجمهور بقيت الناس اللى راكبة يعنى يطلعوا حوالى 19 شخص وشخصايه والعربية اللى راكبين فيها ميكروباظ موديل 41 متهيألى هتلر جه بيها مصر وإتقلبت منه عندنا ...
التباع/الأجرة ياستاذ...
الزبون/ خد تلاتة من الجنيه...
التباع/إيه ده ياستاذ بقولك الأجرة...
الزبون/إيه يعم هو ده مش جنية ولا إيه..ولا إنته مستصغره يعنى...
التباع/لا ياستاذ ده مابيمشيش ...
اللى كان مع الاستاذ/مين قال كده..؟ هو صحيح مالوش رجلين بس بيمشى...
التباع/خلص ياستاذ هات الاجرة والنعمة دى (قصده الفلوس الورق مش الفضية اللى ف إيده) أنا معايا عشرين جنيه فضية مرميين على التبلوه (ملحوظة التبلوه ده على حسب ما شوفت الشلن بجلالة قدره ما يقدرش يصلب طوله عليه)...
السواق/ولا ياحمــــــو فى إيه عندك..؟
التباع/لا ياسطى سيبلى الموضوع ده مالكشى دعوه بيه أنا قادر عليه..لو سمحت ياستاذ الاجرة ولو ما معاكشى مش مشكلة...
الزبون/لا يعم معايا كتير خد اجرتك أهى ومعاك الشيماء...
التباع/خلاص ياأستاذ شكلك ما معاكشى مش مشكلة عادى...
الزبون/مامعاكشى ..! طب معاك الشيماء بأه...
(فى هذة اللحظة.. السيرفيس يتوقف ف محطة الشيماء والاستاذ بدأ ينزل هو وصحبه والتباع راح يجرى عليه قائلا/ايه ياستاذ الاجرة يعم...
الاستاذ/مش انته بتقول ما معاكشى..انا بأه ياسيدى مش معايا غير الجنيه ده...
التباع/ماتخلص ياستاذ هات الاجرة خلينا نشوف شغلنا هو كل يوم الأرف ده يلعن ام الجنيه ده ياجدع...
اللى كان معا الاستاذ/هات يعم الجنية ده اللى عاملك أزمة (وحط إيدة ف جيبة وطلع جنية فضية بردك بس جديدة شوية وعطهوله)...
التباع/إيه ده ياستاذ هات يعم دا زباين بنت تييييييييييييييييييييييت وجنيه ابن تيييييييييييييييييييييييييييت جايبلنا وجع دماغ كل يوم نتخانق ونسب لأم الزبون إطلع يعم إنته كمان...جديلة جديلة جديلة..

من الواضح سعادتك انك تنال الشتائم وعدم الرضا من المواطنين لذا فنرجواك ياسيدى ان تتنحى عن منصبك رحمة ورأفة بنا فلقد طفح الكيل بنا قبل ما تعمل زيك الخمسة والعشرة جنية وبقيت العيلة ودول بأه أرصتهم هاتوجع أوىمش هايبقى فيه مرتب أساسا ...فلقد أحببناك وأنت ورقيا ....بليـيـــــــــــــــز إرحل عنا....وإرحمنا بأه كفاية السنين اللى فاتت...

الباحث عن الصفر

الباحث عن الصفر

تعريف الصفر...
يعتبر الصفر أشهر الاعداد وأكثرها أهمية وأشدها روعة.. إذ بواسطته يستطيع أى عدد صغيورعنده طموح من الاعداد التسعة أن يبدأ حياتة ويكون نفسه.. فمثلا العدد 9 بمساعدة اول صفر تبقى 90 ولو شدت حيلها شوية وقلبت رزقها من هنا شوية ومن هنا شوية من ده حتة ومن ده منحة تبقى90000 ياقطة وربما 9000000.. شوف بأه لو استثمرتهم ف البوسطة يعملوا كام؟ ...ربنا يخليك لينا ياصفر ...
وعشان كده انا قولت ما بدهاش بأه وأنا لازم أعمل واقفة من اللى هى وأدور ع الصفر ده فين ..مش كفاية ضيعت 24 سنة من عمرى منهم 18 سنة تعليم من غير ما أستغل ولا صفر فيهم.. يعنى تصور احنا عندنا فى كل سنة متوسط 6 مواد لو جيبت فى كل مادة فيهم صفر.. يبقى أعملى فى السنة 6 اصفار (1000000) أضرب بأه فى 18 يطلعلك (18000000).. أه ممكن نقول نصهم (9000000) دروس خصوصية وكورسات ( مع انى انا ماكنتش باخد دروس كتير يعنى المفروض فيه توفير ).. وممكن تقول كمان (3000000) كتب وكشاكيل وجلاد وتكت وأستيكة ومسطره ولوح وقلم رصاص روترنج وتصوير ورق والاشتغالات دى ..وكده يتبقى (6000000) أشوف نفسى بأه لبس وأكل وكده ..أيه ده أيه ده دا كده الواحد مش هايتبقى معاه حاجة وكده هايضطر يشتغل.. لأ يبقى المفروض يزودوا المواد شوية.. ويعملوا لكل مادة صفرين صفر عشان الامتحان وصفر عشان جيبت صفر فى الامتحان اللى اتعمل.. ماهو مش معقول كده يعنى ياجماعة تركيا تدخل موسوعة جينس عشان فى الامتحانات المؤهله للثانوية العامة فيه خمسة وستين الف طالب جابوا صفر وف نفس السنة بردك فى نتيجة الثانوية العامة 33000 طالب جابوا صفر.. يسلام ياولاد هى دى الطلبة ولا بلاش.. شوف بأه الواحد منهم عامله كام فى السنة دى.. أتاريها ماشية معاهم ومتقدمين عننا وهاتلاقيهم خطبوا يابختهم.. ياااه لو الصفر يقف فى صفى شوية الدنيا هاتتملى اصفار وهاتلعب ياحمااااده ...
يعنى تصور لو الصفر استجدع معايا شويتين.. دا انا هاخطب وأعزم العيال اصحابى فى كوكدور وأجيب موبايل ان 81 وماعدتش هاركب سيرفيس.. وعشان كده ياجماعة انا قررت أعمل البلوج ده عشان اعمل إعلان عن الصفر وياريت تساعدونى ف البحث عنه.. ومجدعة منى وكلمة رجالة ومن غير ندالة من دلوقتى هافتكركم وهاظبتكم ...
خد عندك بأه
"ياولاد الحلال حريقة ع الجسر قصدى عيل تايه إسمه صفر وشكله كده مقلبظ ومدوركده وحليوه اللى يلاقيه يجيبه وما يصهينش عليه/أصل الواد ده مورزق ابن سعديه اللى يتعتر فيه ويدخله بيته بيتفتحله باب الرزق ع طول وتنغنغ معاه وهايخطب/كبدى عليها امه سعدية مته مته مته "حشتفه " من يوم ما الواد تاه وغلبانه يعينى ومكسوره وبتركب سيرفيس الجامعة وبتتخانق ع الشلن الباقى من ال30قرش كل يوم الصبحية وهنيالك يافاعل الخير والاجر والثواب على الله"

الباحث عن الصفر