* تدوينات مميـزة *

الأميرة والدغف...

منذ فترة ليست بالقليلة وأنا أتابع كتابات الجنس الناعم المنتشرة على صفحات الإنترنت أو على صفحات البلوجر (الله يستره)... ومن أكثر الأشياء المعروفة هو أن معظم كتابتهن تتمحور حول الحب والحبيب والمشاعر والأحاسيس ،، وذلك يبدو أمراً طبيعيا جدا ،، اذ أنهن منذ طفولتهن وهن يحلمن ويتمنين ذلك الفارس ذو الحصان الأبيض الذى يأتى من بعيد ليخطفها ويذهب بها بعيدا الى الجنة التى رسمتها دائما فى أحلامها...

Read More
* تدوينات مميـزة *

صدفة قابلتك...

قررت هذه المره أن أفعل مثل ما تفعل الناس المتهنيه وأحجز فى أحد القطارات المكيفه للرجوع الى المنصورة وذلك كبداية للتمرد على حبيبى وعشرة عمرى الميكروباص... وفى الطريق الى القطار غصت الى ذهنى أفكر فى ذلك البرستيج الذى يتعامل به أهل ذلك القطار المكيف عادة... إذ أنهم لا يأخذون المحطة جرى من أولها لأخرها عشان يلحق القطار كما كنا نفعل...

Read More
* تدوينات مميـزة *

مِتـقَـدّمْـلى عروسة...

بينما أنا أدخل من باب بيتنا فعلمتُ بوجود غرباء عندنا فى غرفة الضيوف.. فدخلتُ إلى غرفتى متجاهلاً إياهم فلحقتنى أمى عند باب غرفتى قائلة »عارف مين جوه«... فهززت رأسى نافياً... فقالت لى »مدام أميرة وبنتها سارة«... فانتهبت إلى ذكر كلمة بنتها سارة وقلتُ لها »ما سألوش عليا..؟؟«... فقالت »لأ ،، سألو عليك.. انته تعرف أصلاً هما جايين ليه..؟؟«... فقولت »ليه..؟؟«...

Read More
* تدوينات مميـزة *

فى إنتظار اللـى ما يتسمى...

اكتر كلمه تلاقيها على لسان الشعب المصرى كلمة "يالله على ما تفرج" وهى كلمة تعنى انتظار الفرج وربما ياتى وربما لن ياتى ابدا ولكن اهو احنا مستنيين... ويعرف فى التاريخ ان المراه هى من تحترف الانتظار وخاصة المراه الصحراويه... اذ انها اعتادت ان تنتظر الاب او الاخ او الحبيب الذى يرحل عنها لغرض ما كتجاره اوحرب او صيد او غير ذلك واحترفته لانها كانت تستطيع النظر الى السحب فى السماء وتدرك قدوم الحبيب او عدم قدومه...

Read More
* تدوينات مميـزة *

حاجه تجنن...

دقة عقارب.. عدت دقايق.. واتسرقت ساعات... أنا كنت حابب.. اقولك حقايق.. وشوية حاجات... لما جيت اضحك.. عينيا دمعت.. وخطفنى السكات... ولما جربت ابكى.. عينيا رفضت.. تهدينى الدمعات.. حاجه تجنن!!! لا عارف ابتسم.. ولا راضيه ترتسم.. على شكلى الابتسامات... وكل ما افتكر.. احاول اتسطل.. وتضرب معايا اتجاهات...

Read More
* تدوينات مميـزة *

أغنية على ممر التحرير...

أما من هم؟؟ فهم مفجرى الثورة... شباب 25 يناير... العيال السيس... السيكى ميكى... بتوع كنتاكى... العيال الأجندات... العملاء... اللى عطلوا مصالحنا... اللى خربو بيوتنا... أما أنا فأسميتهم بناة المجد... رموز التحضر... فرسان التحرير... سفراء حرية الرأى... فدائى الجيل الحالى... قناصى الكرامة المهدرة... كوماندوز الحرية... نعم بالضبط هم كوماندوز ويعلقون رتبهم على أجسادهم...

Read More
* تدوينات مميـزة *

ما بين الهاءات والأقواس...

إنه لغريب حقا ذلك المدعو بالشاتنج... فهو يفعل ما لايستطيع الكلام أن يفعله أبدا ،، يجعلك تتواصل مع أشخاص لم تعرفه أبدا وربما لن تقابلهم يوما ما... يجعلك تٌكن لتلك الغرباء محبة ومودة ومشاعر خاصة... فالقارىء لأى سطور بينك وبين هؤلاء الناس يشعر وكأنكم -أصحاب جدا ومتربين مع بعض-... يستطيع بسحره أن يجعلك تضحك بصوت عالى لمجرد رؤيتك لحرف الهاء مكتوبا بتكرار على هذا النحو [هههههههههههههههه]...

Read More

بص ياباشا قبل ما تقرأ اى حاجه لازم تعرف ان احنا هنا Minimum Charge يعنى م الاخر لازم تسيب تعليق ولو ماسيبتش عادى برده ولايهمك كفايه انك نورتنا.



الأربعاء، مارس 30، 2011

Knock Out

(Knock out) أو ترجمتها الضربة القاضية وهو فيلم هندي مأخوذ عن الفيلم الأمريكي الشهير (Phone Booth) ورغم إنه هو شهير وأنا أعرفه من زمان لكن ما اتفرجتش عليه أصلا وما أعرفش ليه... المهم هذا الفيلم الهندى يحاكى واقعنا الحالى... فهو عبارة عن محاربة الفساد لكن بطريقة درامية... تبدأ القصة عند موظف البنك (Irrfan Khan) أو سمسار الحسابات السرية الذى يتاجر بكل شيء بداية من الضمير نهاية بتجارة البغايا صغار السن ويعمل لأجل رؤوس الفساد فى البلاد... بدأ الفيلم وهو بمرافقة أكير شخصية في الحزب الحاكم في سويسرا لفتح حساب سرى تودع فيه الأموال المنهوبة... وبعد رجوعه وكل إليه توزيع الأموال الخاصة بعملية الإنتخابات القادمة على رعايا الحزب الحاكم في البلاد... وذهب إلى كابينة تليفون عامة ليجري مكالمة سرية ليضمن عدم مراقبتها وبعد أن أنهى مكالمته وجد من يتصل به...


من المتصل؟؟؟ إنه قناص يدعى (Sanjy Dutt)... هذا القناص أخذ في تهديده وترويعه وأخبره بأنه في مرمى طلقاته ويجب عليه أن ينفذ ما يأمره به... اعتبر عرفان أن الأمر هراء... فكان على القناص إثبات جديته وأطلق النار على يده مره واثنين وثلاثة... ثم ظهر في الصورة مدمن مخدرات عن طريق الخطأ والذى كان بدوره يظن أن عرفان جاء إلى تلك الكابينة ليقوم بتسليمه المخدرات... فحاول عرفان أن يخبره أن ليس له علاقة بالموضوع (ومش وقتة يعمنا احنا فى ايه وانته فى ايه)... حاول المدمن تهديده بالسلاح فما كان من القناص إلا وأطلق النار عليه فأرداه قتيلا... وهنا تجمهر العامة وظنوا أن القاتل هو عرفان... وبالتالي أصبح عرفان في موضع مأساوي...


وحضرت الشرطة بقيادة الضابط (Sushant singh) وطوقت المكان وبدأت في عملها المعتاد بمساومة القاتل عرفان... وبالطبع في لحظة حضر الأعلام متمثلا في المذيعة الجميلة (Kangana ranaut) والتي تميزت بذكائها وجرأتها بعيداً عن هي أصلا زي القمر ولووز لوووز الصراحة... وبمجرد حضورها بدأت في بحث موقع الخبر بعين المحترف وبينما هي كذلك فقد لاحظت بوجود أربع رصاصات في زجاج الكابينة تشير إلى وجود قناص فى مكان ما... وأخبرت سوشانت بذلك على أن يمنحها كل الأخبار الإكسكلوسف في هذه القضية...


إذاً نحن الأن نمسك أربع أطراف المجرم والقناص والضابط والمذيعة... عمل القناص (سانجى)على ايقاظ ضمير المجرم (عرفان) وإخباره بأن هؤلاء الناس الذى يعمل لديهم ينهبون البلد وأن هذه أموال الغلابة...ومع تطور القصة إنجذب الرأي العام للقضية عن طريق شاشات التليفزيون فكان أول ما أقلق رجال الحزب تلك الأموال التى كان يعمل عرفان على توصيلها وبالتالي خمنوا أنها توجد بسيارته الموجودة بالقرب من الكابينة... حينها لاحظ القناص (سانجى) بقدوم رجال يحومون حول سيارته فأجبر المجرم (عرفان) على إعطاء مفاتيح السيارة لضابط الشرطة (سوشانت) لكشف ما فيها أمام شاشات التليفزيون... وبالتالي كانت المفاجأة إذ كان يحمل في سيارته ما يقرب من خمسين مليون روبية... فحضر ممثلو النيابة العامة لتحريز الأموال...


مع تطور الأحداث حاول رجال الحزب على التخلص من عرفان بإرسال بلطجية يطلقون عليه النار ولكن فشلت المحاولة لوجود القناص المحترف... ثم حاول رجال الحزب مرة أخرى في رشوة الضابط المسئول عن العملية بعشرة ملايين روبية... لكنه كان ضابطا شريفا فرفض الرشوة ولكنه كان يعلم أن القصة لن تنتهى عند هذا الحد فسيقومون بإقصائه وتكليف ضابطا غيره... وعندها حاول الضابط التلميح لعرفان و القناص بطريقة غير مباشرة أن الأمر لن يدوم طويلا والأمور خرجت عن سيطرته...

قام القناص بإخبار عرفان بأنه ليس هناك وقت وأنهم قد قرروا التخلص منه فيجب عليه الأن استرجاع جميع الأموال المودعة في الحسابات السرية في سويسرا... وحدث ما توقعه الضابط إذ تم إقصاؤه وتكليف ضابط كفء يتميز بعدم الضمير (زي رجال أمن الدولة عندنا كده)... وكان أول مهمة قام بها التخلص من الضابط وقتله... ثم أمر القناصين باعتلاء أسطح المباني (زي اللي حصل في ميدان التحرير بالضبط) وكانت الأوامر تقضى بالتخلص من جميع الشهود عرفان والإعلام والجمهور المتواجد في الميدان... وبالطبع لم ينسوا القناص...

بدأ عرفان في استرجاع الأموال المنهوبة باستخدام اللاب توب الخاص به وطلب من ممثلو النائب العام في التأكد من وصول تلك الأموال... ومع وصول كل دفعة من الأموال وتأكد النيابة العامة من أنها أصبحت بحوزتهم كانت جموع الناس تهلل فرحا باسترجاع أموالهم المنهوبة... وبدأ إطلاق النار ومحاولة التخلص من الجميع... لكن القناص المحترف كان موجوداً بالمرصاد... وعمل عرفان على استرجاع جميع الأموال المنهوبة وأعتقد أنها كانت ثلاثمائة مليار روبية... وتم استرجاعها جميعا وتهلل الشعب كله وتهافتت وكالات الإعلام على البطل عرفان الذى استيقظ ضميره مؤخرا... واسترجع عرقهم وتعبهم وشقاهم وحقوقهم المسلوبة من رجال الحزب الحاكم... وانتهى الفيلم وظل البطل مجهول الأساسي مجهول لأنه كان يعمل من منطلق ضميره


الشاهد في الفيلم أمور كثيرة...

  • سانجى ذو الضمير المستيقظ الذى أقسم على محاربة الفساد ويقابله شباب 25 الذين بدأوا الثورة وثاروا على الفساد
  • الإعلام ذو الضمير المستيقظ المتمثل في كانجانا والتي تمكنت من التعرف على القناص لكنها رفضت الإفصاح عنه وعملت من منطلق ضميرها ويقابلها مواقع الأخبار التي رفضت الأوامر وكانت مع الثورة من أول يوم
  • الضابط سوشانت ذو الضمير الحى الذى قُتِل لرفضة الرشوة ويقابله الضابط المصري الذى قتل لرفضة تهريب المساجين من سجنه الذى كلف بحراسته
  • القناصين إياهم المعتلين أسطح البنايات ويقابلهم قناصي الشرطة الذين إعتلوا أسطح بنايات ميدان التحرير وعمل الاثنين على تصفية الشهود
  • رجال الحزب الحاكم الذى فعلو كل شيء للحفاظ على مناصبهم وقابله اسم النبي حارسهم وصاينهم مبارك ورجالته


في النهاية أتمنى أن أرى الفرحة على وجوهنا جميعا عند استرجاع أموالنا المنهوبة في حسابات سرية في سويسرا وجميع بنوك العالم...


حجـاز

الخميس، مارس 24، 2011

حصرى فى المترو المصرى...


هناك اشياء ربما لم تجدها فى أى مترو فى الدنيا غير عندنا فنحن لنا طرق خاصة للتعامل مع المترو... واليك التفاصيل...


عندما قدم المترو الى محطة رمسيس وجدت النساء فى عربة السيدات وقد تجمعوا أمام باب الصعود وقد تركوا تماما الثلاثة أبواب الأخرى (بابين للنزول وباب للصعود) وذلك بسبب أن باب الصعود تلك يقع مباشرة أمام السلم رغم أن الفرق بينهم متر واحد أو أقل... صحيح العقل زينة وزينة مكسلة تمشى مترين...


بينما أنا أصعد درجات السلم وجدت رجلأ عجوز يصعد السلم بمعاونة الحائط واذ هو كذلك فقد قدم القطار الى المحطة فرأيته أسرع الخطى وما إن وصل الى باب المترو فهرول مسرعا حتى أنه لكمنى بعصاه وهو يجرى للحاق بالكرسى الفارغ... صحيح اجرى يابن أدم جرى الوحوش عشان تلحقلك مكان


عندما وصل القطار الى المحطة وانفتحت أبوابه فرأيت الناس كالعاده تسرع مهرولة الى السلم المتحرك وقد تزاحمو لصعود السلم وأنا كذلك زاحمتهم الى أن صفعتنى المفاجأه... فقد وجدت السلم عطلان والناس دى كلها بتطلع بردك ولا فارق معاهم... صحيح الروتين به سم قاتل..


عندما تنزل من باب النزول تجد أشخاص يعيقون نزولك بصعودهم وتجدهم يتمتمون "ماتخلص ياكابتن السواق هايقفل الباب"... وعندما تكون أنت النازل من باب الصعود تجدهم يتمتمون "ماتخلهوش ينزل دا مش باب النزول"... وعندما تصعد من باب الصعود تجدهم يزاحمونك أيضا قائلين "استنى اما الناس تنزل ياكابتن ايه مفيش نظر"... وعندما تصعد من باب النزول تجدهم يزاحمونك قائلين "ياكابتن فيه باب للطلوع ماتطلعش من هنا"... صحيح دوختونا ياولاد التيت


فى خط حلوان رأيت الركاب يتكلمون بصوت عالى لدرجة أنك تشعر وكأنك ربما تمشى فى سوق أو تجلس فى قطار اشاش محطات... ولكن على النقيض تجد خط شبرا الركاب معظمهم لا يتكلمون أصلا والصمت يخيم ع المكان وان وجد فتجد الكلام يكون بصوت منخفض... ومن الجميل أننى تتبعت اثنين كانوا بيتكلموا وعاملين فرح فى المترو الأول وانتقلوا للركوب فى المترو الثانى واكملوا فرحهم بصوت منخفض ما الرابط لا أعرف... صحيح الكلام بيقلب سايلنت تحت الأرض...


نسبة 95% من ركاب المترو يستقلون السلم المتحرك والنسبة الباقية يستقلون السلم العادى... هل لاحظت أن هؤلاء النسبة يتحركون على السلم سواء كان صاعدا او نازلا (قال يعنى عشان يختصر الوقت) ومن الغريب أن ظاهرة التحرك ع السلم المتحرك نادرا ما تشاهدها فى المولات العامه... صحيح حصرى فى المترو المصرى...


جميع موظفين شباك التذاكر لابد أن يلتقط منك الجنيه أولا ويطمن أنه أصبح فى حوزته ثم يعطيك التذكرة لاحقا وجميعهم يفعلون ذلك مهما كانت حجم الزحمة خارج الشباك مما يجعل الامر بطيئا بعض الشىء وتساءلت كثيرا لماذا لا يتم التبادل فى الحين كأن تكون هكذا بينما أنا أضع الجنيه يقوم هو بوضع التذكرة... ووجدت أن إجابة هذا السؤال عشان يضمن ان محدش ياخد التذكرة والجنيه ويجرى وبالتالى مش هايعرف يجرى وراه... صحيح لو جدع حصلنى...


فى مترو حلوان تلاحظ أن جميع المقاعد معلق عليها يافطة مكتوب عليها "هذه المقاعد مخصصة لكبار السن وذوى الإحتياجات الخاصة" فهل يعنى ذلك أن الجلوس مش كويس على صحتنا نحن معشر الشباب... صحيح ليت الشباب يعدى ويخلصنا بأه عشان نقعد



الأربعاء، مارس 16، 2011

20 سببا ساعدو على قيام الثورة المصرية...


  1. أسماء محفوظ فى الفيديو المروج لها ع الفيس أثناء الدعوة لمظاهرة 25 وهى تُحَمسنا بلتتها الشهيرة "لو انت ياجل(راجل) انزل يوم 25 يناير عشان تحمينى" وبالتالى نطت الشهامة من بين الضلوع قائلة "طبعا راجل ونص ياقمر"...

  1. إصدار قرار إلى كافة محطات البنزين بمنع بيع البنزين فى جراكن بعد تكرار حوادث الناس اللى بتولع فى نفسها أمام مجلس الشعب... فيها ايه لو كنتو سيبتو الجراكن تولع فى نفسها ما ياما ولع عندنا كتير

  1. جمال مبارك فى الفيديو الشهير عندما وجهت اليه بعض الأسئلة المنطقية فقال مستهزأ "طب رد عليه انته ياحسين"..... أهو حسين رد عليك حتة رد وقف فى زورك

  1. الرئيس السابق عندما قال مستظرفا ومنكتا على شهداء العبّارة المنكوبة بقولة "عبّارة من اللى بتغرق" وذلك ردا على الموظف إياها اللى بيروح الشغل فى عبّارة... مالهم يعنى اللى بيروحو الشغل متشعلقين فى المترو

  1. الإعتصامات الفئوية المتوالية وأقربها إعتصامات "أصحاب المقطورات" والتى كانت سببا فى رفع معظم الأسعار وتعامل الحكومة معها برفع شعار "مطنشين احنا ،، واللى مش عاجبه يشرب من البحر"... دلوقتى رافعين شعار مقهورين احنا

  1. تزوير الانتخابات بشكل سافر وفاجر واللى فرسنا أكتر ظهور أحمد عز فى أولى جلسات المجلس وهو يحمل "الأى باد" وكأنه بيترسم علينا... طب اهو احنا اترسمنا على أهلك

  1. تصريح الرئيس السابق مستظرفا بردك عندما علق على البرلمان الموازى قائلا "سيبوهم يتسلوا"... شوفتنا واحنا بنتسلى ياعمو

  1. تصريح أحمد نظيف بشأن الإنتخابات البرلمانية قائلا "إكتساح الوزراء للإنتخابات البرلمانية دليل على شعبية الحكومة"... اكتساح اكتساح حتى يسقط السفاح

  1. تفجير "كنيسة القديسين" وإعلان الشرطة فى عيدها بأنه قد تبين بالدليل القاطع تورط جيش الإسلام الفلسطينى فى العملية... فيلم هندى يافوزى

  1. إهانة رمز البطل "جمعة الشوال" وقصة رفض الحكومة القيام بعلاجة وتعاملهم معه بشكل مهين مما أثار المهانة فى نفوسنا جميعا... نفسى حد يجيبلى رقم تليفونه

  1. فوز قطر بتنظيم كأس العالم وزاد الطين بله عندما خسر المنتخب المصرى أمامه فى مباراه ودية... وهو ده العادى من منتخب مصر

  1. قتل "شاب مصرى فى لبنان والتشفى فيه والتمثيل بجثته" وأيضا مقتل شاب فى السعودية وجلد طبيبان وترحيل شباب من الكويت وغيرهم ومع ذلك كالعاده ،، وزارة الخارجية ودن من طين وودن من عجين... اتفرجو علينا دلوقتى بره مصر

  1. برنامج "واحد من الناس" وعرضه لحال الناس وعيشتهم المأساويه والذى كان سببا فى إنفطار قلوب معظم العامه... ربك حنان ومنان والله

  1. تصريح وزير الداخلية الكويتى معللا استقالته من الوزارة "لا أتشرف بالبقاء فى وزارة تعذيب المواطنين"... وعجبى

  1. إعلان وزارة الصحة بتشغيل المستشفيات الحكومية "نظام شفتات" شفت الصبح مجانا وشفت أخر النهار بنص التمن والشىء المستفز ان زكريا عزمى طلع يتمنظر بإعتراضه على هذا القرار... حتى المستشفيات الغلابة باصين فيها

  1. مشكلة "مياه نهر النيل" مع دول الحوض والحل الجهنمى اللتى قدمته الحكومة بإقامة بطولة حوض النيل لكرة القدم... بيشتغلوا نفسهم البهوات

  1. إرسال مبارك "طائرات وفرق إنقاذ مصرية" لمواجهة الحرائق المندلعة فى غابات الدلعدى إسرائيل... ليه وراح فين الماس الكهربائى

  1. وبالطبع بوعزيزى وقيام الثورة التونسية ورحيل بن على بعد مقولته الشهيرة من تحت النضارة "فهمتكم انا فهمتكم" وكذلك المواطن التونسى الذى كان يصرخ فى درب الليل قائلا "بن على هرب بن على هرب"... أما نحن فهارمنا هارمنا ،، تحية للشعب التونسى ولجميع الشعوب العربية

  1. قضية "خالد سعيد" وتلاها قضية سيد بلال بالاضافة الى انتهاكات الشرطة الصارخة والمنتشره على اليويتوب...

  1. الفيس بوك والتويتر واليوتيوب وخاصة قصيدة "كأنك مفيش" لأحمد فؤاد نجم عندما أعلنها صراحة قائلا "لملم عيالك ،، وجمع فى مالك ،، واسحب جمالك وسيبنا وغووووور"... أهو الحمد غار يعم أحمد

مساعده: معظم هذه الأحداث وقعت قبل الثورة بثلاثة شهور فقط...



المقالة فى كلمتين: محاولة للتنفيس ع النفس والهروب من الكتابة فى موضوع التعديلات الدستورية


حجـاز




الأربعاء، مارس 09، 2011

الحمدلله حصلت فتنة طائفية...


بعد أن كنا قد فقدنا الأمل فى الحياة الكريمة وكرهنا كل شىء حتى الابتسامة الحلوه والتى كنا نشعر انها تزرونا كل سنة مرة... وكنا دائما نشعر بالانتظار... كنا ننتظر معجزة تحدث من السماء... كنا نقول دائما يارب افرجها من عندك... رغم انهم كانو يؤكدوا لنا ليل نهار أن ما نحن فيه من الثوابت ولن يتغير شىء ،، وماهى الا مسالة شهور لبدء الانتخابات الرئاسية والنتيجة بالفعل محسومة وبالتالى لا أمل لا أمل...


لدرجة اننى راودنى حلم ذات ليلة بأننى استيقظت من نومى فى الصباح ووجدت الحزن يخيم فى الأجواء... ونظرت الى السماء فوجدتها حزينة وتقترب من بكاءها... نزلت الى الشارع وصوت عبد الحليم حافظ يردد فى كل مكان وهو يغنى عدا النهار...ورأيت أبو الهول واخد فى ايده الأهرامات الثلاثة وشايلين كل حاجتهم وماشيين... ورأيت النيل وقد أعلن أنه لن يأتى الى مصرنا بعد اليوم... ورأيت الجميع وقد انشغل بحاله ويملؤهم كل الاحباط اللى فى الدنيا...


فهرعت الى التليفزيون فوجدته يغنى اختارناه وبايعنها وعشان كده احنا اخترناه... فنظرت الى شريط الأخبار أسفل الشاشة فوجدته يعلن فوز الرئيس محمد حسنى مبارك بفترة رئاسية سادسة... فأدركت أنه قد حان وقت الرحيل ،، خلاص ملناش عيش فى البلد دى ،، البلد دى بقالها تلاتين سنة مش بتاعتنا ،،، مين يوم ماعرفنهاها وهى مش بتاعتنا ،، هانسيبهاله هو وولاده يتهنوا بيها.... وكان هذا هو حالنا وجلسنا ننتظر المعجزة رغم يقيننا ان زمن المعجزات انتهى...


وكانت الشرارة التى اطلقها بائع خضار باشعال النار فى جسده فى تونس الشقيقة فاندلعت المظاهرات فى جميع أنحاء البلاد... وحتى هذه النقطة لم ننتبه بعد فما أرخص البنى أدم فى بلدنا وياما ولع عندنا كتير... ولكن كانت الفارقة عندما أُعلن ان بن على يحلق بطائرته فى السماء مذعورا يبحث عن مأوى فعندها انتبه الجميع وأدركوا أن الشعوب تسطيع أن تخلع حكام... وانتقلت الشرارة الى مصر وكأن طائرة بن على دون أن يدرى أحد كانت تحمل رذاذ من تلك الشرارة وفى المدة التى ظلت تبحث فيها عن مأوى كانت بدورها تبعثر تلك الرذاذ على الدول العربية أجمع... ولكن كان لمصر النصيب الأكبر...


فظهر فى الأفق أناس أعلنو أنه اذا كانت الولعه الحل فسهله أولعلكو فى نفسى... وهكذا واحد واتنين وتلاتة وحداشر ولعو فى نفسهم ولا حياة لمن تنادى... ولكن زاد الحلق غصة ووجعتنا الكرامة المهدرة أكثر وأكثر... الى كانت بادرة الأمل بالدعوة لعمل تظاهرات يوم 25 يناير... وانطلقت التظاهرات مع انطلاق لهجات الاستخفاف أكثر أكثر وبالتالى قويت العزيمة أكثر وأكثر....


كانت تداعبنا المهانة التى شعرنا بها طوال تلك السنين بل وبكل تحديد طوال عمرنا فنحن لم نرى سنين غيرها لذلك قويت حناجرنا وارتفعت أعيننا الى السماء راجين فرج الله... ويوم واتنين وتلاتة وسقطت جيوش الشرطة واقيلت الحكومة وزغردنا للشهيد... ويوم وأربعة وخمسة واتشكلت حكومة بيقولو عليها جديده وتنازلات أكثر وأكثر... ويوم وستة وعشره وأصوات تنادى بالفتنة وكفاية كده وتغيرات فى الحكومة اللى بيقولو عليها جديدة... ويوم واتناشر وتنمتاشر و و و و و و و و وتنحى الرئيس وانتهى التوريس وانتهى النظام... هكذا بكل بساطة حدثت المعجزة فى زمن انتهت فيه العجزات...


نعم حدثت المعجزة ياصديقى وزارت قلوبنا الفرحة ورقصت جميع الشعوب العربية لفرحنا... وتغنى العالم كله بكرامتنا وبعزتنا... وتبادر الى الأذهان حب الوطن... واعتذر الجميع على ما كان منه من سخط على الوطن فى الفترة الماضية... وعم التفاؤل على كل الوجوه... وتعالت الأصوات بالبناء من جديد....


وعند البناء ياصديقى كنا نعلم جيدا أن هناك من لايريدنا أن نبنى ،، كنا نعلم أن هناك من يضع العراقيل فى طريقنا...كنا نعلم أنه عشان يتوهونا فى سكتنا هايشيلوا من ليالينا نور القمر... وتملك الخوف قلوبنا وظللنا نبحث عن الهواجس ليل نهار... ونصنع الأشباح ونهول فى حجمها بل أننا نستخدم نفس الأدوات التى كنا نستخدمها لنجاح الثورة.... خوف ،، رعب ،، قلق ،، فوضى ،، ثورة مضادة ،، جهل ،، إعلام مضلل ،، تظاهرات فئوية ،، تعصب ،، لكن تقريبا تغلبنا على كل هذا... لكن أصدقك القول ياصديقى فأنا كنت دائما أقول أن الصورة لم تكتمل بعد هناك عامل لم يأتى بعد ليتمم نجاح الثورة... ألا وهو الفتنة الطائفية...


نعم ياصديقى والحمدلله فقد حدثت بالأمس وفى طريقهم الى السيطرة عليها... نعم أحمد الله على أنها حدثت... حدثت لأننا كنا نتظاهر بأنه لا توجد أى أحقاد طائفية ولا ضغينة والتى للأسف استطاع النظام البائد أن يزرعها فى قلوب العامة الجهلاء... نعم أنا وكام مليون مثلى يستطيعون أن يحكموا صوت العقل دائما... ولا فرق عندهم بين مسلم ومسيحى ،، مسلم مسلم لنفسك ومسيحى مسيحى لنفسك وربنا اللى هايحاسبنا كلنا ،، واحنا اللى اتنين فى مركب واحده وايدنا ايد واحده...


لكن هناك من لا يعى ذلك... من لا يفهم أساسا لماذا قامت الثورة... وكان دورهم الفرجة فقط... المسلم يعتقد أن المسيحين واخدينن حقهم تالت ومتلت ولو سبناهم كده هايجو بعد كام يوم يقولك احنا عايزين ننفصل... والمسيحى حاسس انه مقهور وانه فريسة سهلة ومهضوم حقه واى اتنين مسلمين بيتخانفو مع بعض يجيبوا مسيحى يضربوه... وبالتالى رٌفعت راية الدفاع عن الاسلام والمقاومة عن المسيحية... والمتخلفين فى البلد دى كتير ،،


وحقيقة تعودنا على ذلك الحدث بل وفى كل مره يكون السبب ولد ووبنت بيحبو بعض ولازم تكون البنت مسيحية مش فاهم ليه... وبالتالى مع وجود مثل هذه الاحقاد فى قلوب المتخلفين مسلمين ومسيحين (وما أكثر العربجية فى بلدنا) كان من غير الطبيعى أن لاتحدث تصادمات فى ظل الإنفلات الأمنى الذى نعانى منه حاليا... فمثلا هل من المعقول أن لا تجد فى هذه الأيام حادثة سرقة واحدة مستحيل طبعا ... لهذا كنت أشعر بوجود خلل ما... وعدم حدوث مثل تلك التصادمات فى هذه الوقت ينذر بكارثة محققة... لكن ربك كريم أوى أوى أوى


فوقعت تلك التصادمات وإحنا فى بداية البناء... وبالتالى إكتملت الصورة... وبالتالى تسير الثورة على طريقها الصحيح... وباءت جميع المحاولات بالفشل... وسنتوقع محاولات أخرى لكن أكثرها جدية الحمد لله قد مرت بسلام... فمنذ اليوم الأول فى المظاهرات كان الجميع يهدد بالفتنة الطائفية... كانو يطربوننا بها ليلا نهارا وارتجفت قلوب الناس وارتعشت أرجلهم عند ذكر الفتنة الطائفية وهانبقى عراق تانية والاكم ده... لكن الأن بخ الحمدلله حدثت وهاتعدى على خير بإذن الله...


وبلدنا هاتقوم من جديد ،،وهانحلم بالخير والمجد ،، واوعى تفتكر ان الليل الحزين ،، أبو النجوم الدبلانين ،، أبو الغناوى المجروحين ،، يقدر ينسيها الصباح ،، أبو شمس بترش الخير والحنين... أبداً ،، أبداً... دا احنا بلدنا ليل نهار ،، بتحب موّال النهار (وطول عمرها هاتفضل كده) ،، لما يعدّي في الدروب ،، ويغنّي قدّام كل دار ،، والليل يلف ورا السواقي زي ما يلف الزمان ،، وعلى النغم تحلم بلدنا بالسنابل والكيزان ،، تحلم ببكره و اللي حيجيبه معاه ،، تنده عليه في الضلمة و بتسمع نداه ،، تصحى له من قبل الأدان ،، وتروح تقابله في الغيطان ،، في المتاجر ،، والمصانع ،، والمعامل ،، والمدارس ،، والساحات ،، طالعة له فى صحبة جنود ،، طالعة له فى صحبة رجال ،، وأطفال ،، وبنات ،، وكل الدروب واخدة بلدنا للنهار... ايوه والله واخدة بلدنا للنهار... فياهل ترى ياهل ترى هاتحط ايدك فى ايدنا نجيب لبلدنا النهار اللى بتحب موال النهار... ولا هانضيع مجهودنا ع الفاضى...


المقالة فى كلمتين: تذكر أن الثورة نجحت حين طرحنا الخوف والقهر والأفكار السيئة جانبا... وأن الحب بين الجميع كان موجودا عندما كان التغيير للأفضل هو الهدف...


حجـــاز


مصادر: أغنية عبد الحليم حافظ عدا النهار كلمات عبد الرحمن الأبنودى


الثلاثاء، مارس 01، 2011

فعودوا إلى التحرير متى تشاءوا...


فعودوا إلى التحرير متى تشاءوا... هذه الكلمات رددها الكثيرين فى الفترة التى سقطت فيها الشرطة وبدأت عمليات الترويع للمواطنين وخاصة بعد خطاب مبارك الثانى والذى أسميته فى قاموسى "خطاب الحشتفة"... وبدا واضحا فى ذاكرة الجميع ما حدث من إنقسامات وتخوين كلا الفريقين الى الأخر والحرب التى واجهناها جميعا وخاصة على صفحات الفيس بوك من كلمات مثل هاتخربو البلد ،، امريكا هاتحلتلنا ،، هو كده كده ماشى ،، ومش هايمشى والخ... وبما أننا نواجه نفس الموجه هذه الأيام بالخلاف حول رحيل شفيق وحكومته ام لا ،، والبلد هاتخرب أم لا ،، والبلد هاتولع ام لا ،، ومين اللى هايمسك غيره الخ... لذلك قررت الإستناد الى التاريخ والرجوع الى أرشيف صفحتى على الفيس وقراءة تعليقات هذه الناس بعينها فى تلك الفترة وقراءة شعورهم وكلماتهم المرتعبة وذعرهم من وقوع البلاء وإستغاثتهم بأرجوكم كفاية كده ،، روحو بيوتكم بأه... والتى بالطبع نسيناها جميعا إعتمادا على ذاكراتنا الهباب إياها ،، لذلك قررت أن أعرض عليكم بعض من تلك التعليقات بتواريخها وربما معظمها تقع فى يومين إثنين فقط فلتقرؤها اذا عشان تفتكرو وتعرفوا أد ايه هما كانو بيبصوا تحت رجليهم وراضيين بشوية السمك الصغير اللى رماهم لهم الموج كانو يرددون دائما "لو ما غيروش حاجه انزلو التحرير تانى بس ارجعو بيوتكم دلوقتى"... أما من كانو فى التحرير فكانو على متن مركب صغيرة فى وسط تلك الامواج الهائجة يصارعون من أجل السمكة الكبيرة وهى سمكة الحرية... ومازال هؤلاء يصرخون بكفاية بقى حرام عليكم ومازال الأخرين يصارعون ويصارعون والحكم بيننا التاريخ اذا... وسوف تلاحظون فى تلك التعليقات أنها نفس الكلمات التى تردد حاليا مع اختلاف بسيط فقط... الى التعليقات اذا...


حرام عليك بلاش اشاعات ومشى ورا الجزيرة والدستور مش ابراهيم عيسى يبقى رئيس تحرير الدستور وبيتكلم عن الفقر ورغيف العيش والكلام ده حضرتك تعرف راتب ابراهيم عيسى الشهرى كام 80000 وبالعربى تمانين الف عشان محدش يفتكر انى غلط فى صفر ولا حاجه لا حول ولا قوة الا بالله... ابراهيم عيسى ظل واقفا وسقط الاخرون

February 2 at 5:55pm


لا واللى يستفزك أكتر ان اللى عايزينه حصل طب ايه كفاية خرااااااااااب بقه حرام عليهم بجد... وقولنا فى النهاية كتر خيرهم

February 2 at 5:02pm


coming soon

مصر الشمالية ومصر الجنوبية... مصر حلوه ولابسه جديد

February 2 at 5:52pm


تعبت ونفسيتي تعبت الكل حوليا بيعيط من المنظر يجماااااااااااااعه ارحمووووووووهم الكبار بيعيطوا... مش وقت مظاهرات دلوقتي ارجوووكوا اتوحدوا احموها ووقفوها علي رجلها تاني... هاتقف على رجليها ان شاء الله

February 2 at 5:58pm


الله يحرق الاعلام كله فى يوم واحد مش هيسكت الا لما يولع الدنيا بذمتك انت منظر واحد دا ينتقم دا اصلا واحد بيموت (الكلام على مبارك) وبعدين حتى لو هو باللى عامله الشباب دا يقدر يقول بم بعد كده مش قادرين تصبروا ليه شهور قليلة استنوا شهرين وبلاش ست شهور وشوفوا اللى هيحصل... بعد شهر ولما جينا نننزل لمتونا تانى

February 2 at 8:21pm


مش هقول غير ربنا يصلح الاحوال ويهدينا بس كلامك غير منطقى هو مين الاقوى دلوقتى انت ولا هو انتم عرفتوا ازاى تاثروا وتاخدوا حقكم والميدان موجود انزلوا فى اى وقت واحنا معاكم بس العناد دا بقى اعمى وهودى البلد فى داهية لو مش خايفين على نفسكم خافوا على بلدكم... بردو رجعتوا ولمتونا لما حاولنا ننزل تانى

February 2 at 8:26pm


انا بحب بعضهم لكن مش معاهم فى النزول لان لو نزلوا حنسمع للسفلة بالاندساس و حتبقا مجزرة بلاش علشان الخسيس اللى عاوز يولعها يلاقى نفسه لوحده ...بلاش بليييييييييز و البرادعي مالوش فى مصر زي ما لينا ده اصلا عايش برة يعنى ممكن تلاقيه يوم السبت لم شنطته و سافر... البرادعى فضل ومبارك اللى لم شنطته وسافر

February 3 at 10:34pm


يبقا بلاش الكلام اللى مكتوب بليييييز لان فيه ناس لو شافت اسم من الاسماء اللى بتحبها حتلاقى ناس نزلت و لو حصلهم حاجة مش حيبقا كويس و النبي تشيلها و اكتب دعاء و دعوة لعدم النزول بليييييييييييييييييييييييز.... دعوه للنزول

February 3 at 10:39pm


ما خلاص بقى ياعم انت قاعد تهيج الدنيا كدا ليه هو انت جزيرة الفيس بوك ولا ايه... بعد اللى حصل تحية للجزيرة والفيس بوك

February 3 at 11:28pm


ممكن تخرج من الازمة دي أقوى ٢٠٠ مرة مما كانت عليه قبلها .. بس نستنى لسبتمبر وممكن تخرج من الازمة دي : كوتديفوار وبوروندي ورواندا .. انقلابات كل اسبوعين .. لو الفوضى عمّت بكرة تختار ايه ؟... اهو مشى وماحصلتش فوضى

February 4 at 10:17pm


لقد حصلوا بالفعل علي مطالبهم وأنا مع بقاء الريس حتي تنتهي فترة رئاسته فلم يبقي الا شهور بسيطة... واهو الريس مشى ولسه المطالب

February 7 at 12:58am

هو لو رحل تفتكر اللى بيحصل ده حيتوقف؟؟؟؟؟ انا بقولك لأ مبارك ماشي ماشي بس لازم اللى فى الشارع يفهم ان اللى دخل و بيخرب ناس وجدت ثغرة تدخل منها.. و احنا لازم نفوق بقا و نقفل كل الثغرات و علشان نقفل الثغرات ديه لازم ندخل بيوتناعلشان الوحش ما يرميش غلطة و يعلقها على الشباب الجميل بتاع 25 يناير... لو كنا دخلنا بيوتنا كان حصل اللى انته بتقول عليه ده

February 2 at 4:32pm


تعرف يامحمد انا في الاول كنت عايزاه يمشي فعلا لكن بعد الي حصل والتخريب والدمار الي حصل وبعد كلامه الي قاله سواء كان فعلا هايتنفذ او لا انا مع انه يكون موجود علي الاقل الفتره دي مش علشانه هو كشخصه لا علشان البلد دي علي الاقل نلم الي اتبعتر مننا ونحاول نصلح ويكمن تكون الفتره دي فتره اختبار حقيقي الي حصل ده فوق الوصف يعني ايه تبقي في بلدك ومش حاسس فيها باي طعم للامان والي حاصل دلوقتي بين مؤيد ومعارض والله فتنه يعد ماكنا ايد واحده كل همنا مصر دلوقتي الناس بقي همها الشخص وجوده من عدمه مش هايفرق المهم نحافظ علي البلد... الجيش والشعب ايد واحده

February 2 at 4:54pm


بس انا شايفة يامحمد انه لو سابنا ومشي هتولع اكتر والسلب والنهب هيزيد مبارك باعد برضو عننا حاجات كتير اكيد عارفها وبعدين فيها ايه لو نديله فرصه مش يمكن يغير فعلا البلد مش هيتصلح حالها لما يمشي والله هتولع اكتر واكتر والبشاير بانت من دلوقتي... الشعب بيضرب ف بعضه لما يمشي والشعب يفضل كده امريكا هتدخل تعدل المايل وتقول لازم يبقي في نظام واحنا داخلين نصلح حال البلد ده هيبقي كويس؟ وبعدين الريس خلاص هما اللي باقيلنه كام شهر ومتنساش ان اي نظام حكومي في الدنيا ليه مميزات وليه عيوب وزي ماليه حاجات مش كويسه ليه برضو حاجات كويسه كتير ليه دايما كله بيفتكر الوحش بس؟... الريس بخ وامريكا برده بخ

February 2 at 5:11pm


وفكرك لو رحل بالصوره دى البلد هاترتاح وشكل مصر هايبقى عاجبك لما رئيسها يخرج بالشكل ده كل الحكاية 7 شهور على فكره انا مش بقيده هو طبعا له اخطاء بس ماينفعش نعلقله المشنقه... ليه ماينفعش هو مش بنى ادم زينا

February 2 at 5:26pm


وبعدين يامحمد المظاهرات برضو عملت حاجه لان محدش كان يتوقع انه ممكن ياخد القرار انه يغير حكومة باكملها

يبقي لازم نصبر شوية ولو معملش حاجه خلاص الشارع معروف طريقه تقدروا تتجمعوا تاني وتعملوا المظاهرات تاني البلد يامحمد بقت ف النازل واللي بيحصل... دلوقتي تاثيره هيبقي كبير اوي ف المستقبل وبالذات اقتصاديا كفاية كده المظاهراات السلمية دلوقتي بقت طحن ف الشارع بين مؤيدين ومعارضين مش دي الحرية ولا دي الديمقراطية مش المفروض برضو ان كل واحد يقول رايه بحرية؟... واحنا طالبين الحرية مش اكتر

February 2 at 5:32pm


والله يامحمد الريس قال اللي عنده واوعي تفتكر انه ممكن يتنازل عن الحكم

المعارضين كام؟

2مليون

8مليون

؟

الشعب اكتر من كده بكتير الباقي عاوزه متمسك بيه... اهم الباقى دول كانو بيرقصو فى الشوارع يوم ما مشى

February 2 at 5:37pm


والله الريس لو مشى دلوقتى البلد هتخرب وتبقى دمار وتشمت فينا الكلاب يااخى اللى عنده كلب ولا لامؤاخذة جموسه بتموت بيزعل عليها حرام اللى بيحصل فى البلد ده... الكلاب بيحسدونا ع اللى عملناه

February 2 at 6:56pm


البلد مش هنضغط على الزر فتصبح مثلما تريد انت او انا البلد لابد من ظابط ورابط لها وانا بقول ان حسنى ده عمل على الاقل حاجة واحدة لمصر استحملتم وصبرتم 30 سنة فاضل كام شهر اصبروهم... والمكاسب اللى طلعنا بيها لحد دلوقتى مكانش اكتر المتفائلين يتوقع انها تحصل فى 10 ايام والميدان موجود مش مدور وطالع ولا حاجة... ودلوقتى ايه رأيك فى المكاسب اللى وصلنالها

February 4 at 1:07am


انتو مش عوزين تفهموا ليه ان الراجل مش هيمشي ولا هيتنحى يا جماعة بارك الله فيما رزق وتذكروا < لا تضيع الممكن في طلب المستحيل >... تتلاشى الممكنات فى طلب المستحيلات


يا ابنى انت راجل مثقف عيب عليك البلد بتولع هانغور امه والله بس يعدى بينا الزفت اللى البلد فيه ده وبعدين عيب ده راجل فى سن ابوك ما يصحش ابدا ان انت تقوله خلى عندك دم... العيب ان ابويا يسرقنى


هل لاحظت أنهم هم من قالو "انزلو لو بعد شهر لو ما عملوش حاجه" والان يقولون "يعنى انته عايزهم يلحقوا يعملو حاجه فى شهر"... هل لاحظت أنها كلمات انهزامية وذعر وخوف ومحاولة الاثبات ان ما وصلنا اليه هو أقصى شىء يمكن الحصول عليه والغريب جدا أنها نفس الكلمات ونفس الاسلوب ونفس الذعر ومن نفس الاشخاص وللعلم هم ليسو عملاء للحزب الوطنى او بلطجية ولكنهم أناس عاديون مشكلتهم الوحيده أنهم أنسو الخوف ودائما ما يؤثرون السلامة... وهم فعلا كانو يتكلمون بكل ثقة لكن من يأمن لمكر المستقبل والذى فجأهم برحيل مبارك... فعندما رحل مبارك ،، اصحاب تلك التعليقات ،، هم بعينهم ،، فرحوا واتنططو فى الشوراع رقصا وتهليللا واكدوا لشباب التحرير أنهم كانو على حق... وبجد والله اللى كان يشوف الفرحة فى عيون الناس دى يقول الناس دى ما شافتش فرحة قبل كده... لكن سبحان الله نسوا كل ما حدث ونسوا ان الناس دى بتفكر صح ورجعوا يهاجموهم تانى... لذلك أرجوكم أن تتذكرو ان الفجر عمره ما بيجى ببلاش لابد من بعض الخساير حتى يتم البناء على أكمل وجه... لذلك سأطلب منكم ما طلبته سابقا "من فضلكم توقفوا عن انتقادهم ،، واتركوهم ،، وثقوا فيهم ،، وفقط ادعو لهم ،، فهؤلاء املنا وقدموا لنا ما لم نكن نحلم به ابدا"... وفى النهاية سأختم لكم بمقولة عندليب الصحافة محمود عوض


إنني أستطيع أن أعطيك قلبي.. فأصبح عاشق,

أعطيك طعامى.. فأصبح جائع,

أعطيك ثروتى.. فأصبح فقيراً,

أعطيك عمري.. فأصبح ذكري ولكنني لا أستطيع أن أعطيك حريتى

"إن حريتي هي دمي... هى عقلي.. هى خبز حياتي.. إننى لو أعطيتك إياها فإنني أصبح شيئاً له ماض... ولكن ليس أمامه مستقبل"


المقالة فى كلمتين: أرجوكم توقفوا عن انتقادهم ،، واتركوهم ،، وثقوا فيهم ،، وفقط ادعو لهم ،، فهؤلاء املنا وقدموا لنا ما لم نكن نحلم به ابدا...


حجــاز